27-04-2025 ஞாயிறு மாலை 5-30 மணிக்கு மதுரை பெரியார் மய்யத்தில் உள்ள பெரியார் வீரமணி அரங்கில் தமிழர் தலைவர் ஆசிரியர் அவர்கள் வழிகாட்டுதலின் படி முன்னாள் அமைச்சரும் எந்நாளும் சுயமரியாதை வீரருமான பொன் முத்து ராமலிங்கம் அவர்களின் 85வது பிறந்தநாள் விழா-வாழ்த்தரங்கம்...மேனாள் அமைச்சர் பொன் முத்துராமலிங்கம் அவர்களின் ஏற்புரை:
அனைவருக்கும்
பணிவான வணக்கத்தைத் தெரிவித்துக் கொள்ள விரும்புகிறேன். எனக்குப் பிறந்தநாள்
விழா அதற்குப் பாராட்டு என்ற
அடிப்படையிலே, தாய்க் கழகத்தின் சார்பாக இந்த விழா ஏற்பாடு செய்யப்பட்டதில் எல்லையற்ற மகிழ்ச்சி அடைகிறேன். தந்தை பெரியார் அவர்களும் ,ஆசிரியர் வீரமணி
அவர்களும் நேரடியாகவே வந்து வாழ்த்தினால் எவ்வளவு மகிழ்ச்சியும் உணர்ச்சியும் இருக்குமோ அதே உணர்வை நான் இங்கே
உங்களிடம் பெற்று இருக்கிறேன் என்பதை மிகுந்த
பணிவோடு நன்றியோடு நான் தெரிவித்துக் கொள்கிறேன்.
தந்தை
பெரியாருடைய கொள்கை, கோட்பாடு என்பது நான் உயர்நிலைப் பள்ளியில் படிக்கின்ற பொழுது என்
உள்ளத்திலே பதிந்து விட்ட ஒன்று. சோழவந்தான் இரயில்வே
நிலையத்திற்குத் தந்தை பெரியார் அவர்கள் வருவார். அவர் மூன்றாம் வகுப்பில் தான் வருவார். நாங்கள் எல்லாம் சந்தோஷமாகப் போய் அவரோடு
உட்கார்ந்து பேசுவோம், கேள்வி கேட்போம். அதற்கெல்லாம் அவர் பதில் சொல்லுவார். அவ்வளவு எளிமையாகப் பேசிக் கொண்டிருப்பார். அப்போது என்னுடைய உள்ளத்தில் ஏற்பட்ட தாக்கம்
என்னவென்றால் இவ்வளவு பெரிய தலைவர் ,தீர்க்கதரிசி .எளிமையாக சாதாரண
மக்கள் வரக்கூடிய மூன்றாம் வகுப்பு. அந்த ரயில் பெட்டியில் பயணம் செய்து எந்த விதமான
காம்ப்ளக்ஸ் இல்லாமல், ஏற்றத்தாழ்வு இல்லாமல், நாங்கள் எட்டாவது, ஒன்பதாவது படிக்கிற பசங்க… நாங்க கேட்கிற கேள்விக்கு, அதை உள்வாங்கிக் கொண்டு பதில் சொன்ன அந்தப் பக்குவம் எங்களுடைய உள்ளத்திலே பசுமரத்தாணி போல ஆழமாகப்பதிந்தது. எளிமையான வாழ்க்கை, இனிமையான அணுகுமுறை, எவரையும் கடிந்து கொள்ளாத அந்தப் பண்பு எங்களை ஈர்த்துவிட்டது.
எனது
தாயார் ஆன்மீகத்தில் ஆழ்ந்த பற்றுக் கொண்டவர். அவர் சொன்னதைக் கேட்டது எட்டாம் வகுப்புவரை. அப்படியே அய்யா
கொள்கைக்கு மாறி விட்டேன். நாவலரின் சகோதரியைச் சோழவந்தானில்தான் திருமணம்
செய்து கொடுத்திருந்தார்கள்.அவரது தங்கையின் கணவர் ஆவுடையப்பன். அவர்தான் திராவிட முன்னேற்ற கழகத்தினுடைய முதல் மதுரை மாவட்டச் செயலாளர் .ஆதலால் அடிக்கடி நாவலர் சோழவந்தானுக்கு வருவார். வரும்போது அந்த வைகைக்
கரையின் ஆற்றுமணற்பரப்பிலே நாவலர் வந்து ஒரு மணி நேரம் இரண்டு மணி நேரம் பேசுவார். அந்தப் பேச்சைக்
கேட்பதற்காக நாங்கள் போவோம். அப்போது திராவிட இயக்கத்தினுடைய கருத்து எங்கள் உள்ளத்தில் பதிந்து விட்டது. அன்றைக்கு ரொம்ப
மோசமான மூடப்பழக்க வழக்கங்கள், பகுத்தறிவுக்கு ஒவ்வாத பழக்க வழக்கங்கள் இதுதான் கிராமத்தையே
பிடித்து ஆட்டிக் கொண்டிருந்தது. அய்யா அடிக்கடி வாடிப்பட்டி கூட்டத்திற்கு வருவார்.அன்றைக்கு வாடிப்பட்டி என்பது திராவிடர் கழகத்தின் ஒரு முக்கியமான மையமாக இருந்தது
அப்போதெல்லாம்
பேசும்போது கேள்வி கேட்பார்கள், இப்ப மாதிரி கிடையாது. துண்டு
சீட்டில் எழுதிக் கேள்வி கேட்பார்கள். ஒரு முறை சி.பி. சிற்றரசு-விடம் ஒரு கேள்வி கேட்டார்கள் நீ எந்த நாட்டுக்குச் சிற்றரசு என்று?.அதைப் படித்துவிட்டு ‘கனம் சக்கரவர்த்தி ராஜகோபாலாச்சாரியார் எந்த நாட்டிற்குச் சக்கரவர்த்தியோ அந்த நாட்டிற்கு நான் சிற்றரசு என்று
பதில் சொன்னார்.என்.வி.என்.சோமு சட்டக் கல்லூரியில் என்னோடு உடன்படித்தார். அவர் என்.வி. நடராஜனுடைய மகன். அப்போது தந்தை பெரியாரைப் பற்றி நிறையச் செய்திகளை அவர் சொல்லுவார். தந்தை பெரியார் அவர்கள் மிகப்பெரிய சிக்கனக்காரர்
நாம் அறிவோம் ஆனால் எதற்குச் செலவழிக்க வேண்டுமோ அதற்கு மிகப் பெரிய அளவில்
செலவழித்தவர் தந்தை பெரியார். அப்படி அவர் சார்ந்த சொத்துக்களை எல்லாம் அவர் என்ன சொந்தக்காரருக்கு எழுதி வைத்தாரா?, இல்லை.இந்த நாட்டில் மட்டுமல்ல
உலகம் முழுவதும் பரவச் சுயமரியாதை அறக்கட்டளையை உருவாக்கி
அதற்கு நம்முடைய ஆசிரியர் வீரமணி அவர்களையே தலைவர்
ஆக்கினார். இன்றைக்குத் தந்தை பெரியாரின் கொள்கைகள்
இந்தியத் துணைக்கண்டம் மட்டுமல்ல, உலகம் முழுவதும் பரவுவதற்கு அவரது சிக்கனமும் ஒரு காரணம் என்பதை நாம் புரிந்து
கொள்ள வேண்டும் .
பெரியாருடைய
கொள்கை என்பது உலகம் முழுவதும் தேவைப்படுகின்ற ஒரு கொள்கை. பெரியார் கொள்கை இல்லையென்றால்
நானே இல்லை நான் ஒரு வக்கீல் ஆகி இருக்க முடியுமா?. நாங்கள் குத்தகைக்கு நிலம் பெற்றிருந்த அய்யர் வீட்டிற்கு எங்கள் அம்மா கூட்டிப் போச்சு.அய்யர் அப்பா அப்பயே டாக்டரா இருந்தாரு. அவங்க கிட்ட போய்
எங்க அம்மா கேட்டுச்சு. “தம்பி படிக்கணும்னு சொல்றான்,சேர்க்கலாமான்னு .உடனே அய்யர் ‘வேண்டாம்,வேண்டாம்.இதோடு படிப்பை நிப்பாட்டிவிட்டு விவசாய வேலையைப் பார்க்கச்சொல்லு’ என்று சொன்னார்.அது எனக்கு ஒரு மிகப்பெரிய பாதிப்பைக் கொடுத்தது. என்னடா படிக்க வேண்டும் என்று கேட்கிறோம் அவர்கள் டாக்டராக,வக்கீலாக இருக்கிறார்கள். நம்மளை
மட்டும் விவசாயம் பார்,ஆடு,மாடு மேய் என்று சொல்கிறார்களே என்று. படித்தோம். வாழ்க்கையில் அதை ஒரு
சவாலாக எடுத்துக் கொண்டு படித்தோம்.
படித்த
பின்பு படிப்பு எங்களுக்கு மட்டும்தான் என்ற
பார்ப்பனர்கள் மனப்பான்மை எங்களுக்கு இல்லை .அப்போது இந்தச் சமுதாயம் எப்படி இருந்தது? எல்லோரும் ஏழை . பஞ்சம். பஞ்சத்தை முன்னிட்டு கஞ்சி காய்ச்சி ஊத்துனாங்க. ஏழை மக்கள் பட்ட கஷ்டங்களை இப்போது உங்களுக்குச் சொன்னால் கூட விளங்காது. அவ்வளவு கஷ்டப்பட்டார்கள் .அவ்வளவு சங்கடங்கள், படிக்க முடியாத சாப்பாட்டுக்கே வழியில்லாத சூழல்.எது எடுத்தாலும் பேய் பிசாசு மூட நம்பிக்கை. எனவே அந்தச் சூழ்நிலையில் இருந்து, நாமெல்லாம் படிச்சு இவ்வளவு தூரம் வந்திருக்கிறோம்
என்று சொன்னால் அது ஒட்டுமொத்தமாகத் தந்தை பெரியாரின் உழைப்பையே சாரும். நெஞ்சை உயர்த்தி நாம் சொல்லலாம்,இது எங்களுக்குத் தந்தை பெரியாரால் கிடைத்த வாழ்க்கை என்று.
அதனால்தான்
அண்ணா அவர்கள் ‘நான் கண்டதும் கொண்டதும் ஒரே தலைவர், அவர் தந்தை பெரியார்’ என்று சொன்னார். எனவே பெரியார் என்பது ஒரு திருப்புமுனை, பெரியார் என்பது ஒரு சகாப்தம், பெரியார் என்பது நமக்கெல்லாம் என்றைக்கும்
வழிகாட்டக்கூடிய திசை காட்டக்கூடிய ஒரு கலங்கரை விளக்கம். அப்படித்தான் தந்தை
பெரியாரை நம்முடைய தமிழ் சமுதாயம் எடுத்துக் கொள்கிறது. பெரியார் தன்னுடைய கொள்கை அடிப்படையில்
ஒரு நிறுவனத்தை உருவாக்கி, அய்யா வீரமணி அவர்களிடம் இந்த இயக்கத்தையும் இந்தக்
கொள்கையையும் ,தன்னலம் கருதாது இந்தக் கொள்கைகளை
உலகம் எங்கும் எடுத்துச் செல்லும் ஆற்றலும் திறமையும் உள்ளவர் யார் என்பதைத்
தேடிக் கண்டுபிடித்து, கணக்குப் போட்டு
பார்த்து அய்யா ஆசிரியர் வீரமணி அவர்களைத் தேர்ந்தெடுத்தார். அவர் தேர்ந்தெடுத்தது இன்றைக்கு வரை சரியாக இருக்கிறதா இல்லையா? இந்த 92 வயதிலும் ஆஸ்திரேலியா போகிறார் .அங்கே போய் அய்யாவினுடைய
கொள்கைகளை எடுத்துச் சொல்கிறார். பொருளாளர் சொன்னார் ,மாறுபட்ட தட்பவெப்ப நிலை இருந்தாலும் கூட எல்லா
இடங்களுக்கும் சென்று அய்யா ஆசிரியர் நம்முடைய கொள்கையை எடுத்துச் சொல்லி இருக்கிறார் என்று.
தந்தை
பெரியாரின் கொள்கை இன்றைக்கு உலகம் முழுவதும் பரவிக்
கொண்டிருக்கிறது. அய்யாவுடைய கொள்கை, உலகத்தில் எங்கெல்லாம் ஏற்றத்தாழ்வுகள் இருக்கிறதோ அது ஜாதியின்
பேரால் இருக்கக் கூடிய ஏற்றத்தாழ்வாக இருக்கலாம், அல்லது நிறத்தின் பெயரால் ஏற்படக்கூடிய ஏற்றத்தாழ்வுகளாக இருக்கலாம். எங்கே ஏற்றத்தாழ்வுகள் ஏற்பட்டாலும் அங்கே
நிச்சயமாக அய்யா தந்தை பெரியாருடைய கொள்கைகள் தேவைப்படும். ஆகவே அய்யாவினுடைய கொள்கைகளை யாராலும் மறைக்க முடியாது அது
மனித குலம் இருக்கும் மட்டும் இருக்கும், மனிதர்கள் வேறுபாடு கற்பிக்கும் மட்டும் இருக்கும். என்றைக்கும் சாகாத, அழிவில்லாத அந்த மகத்தான கொள்கைகளை உருவாக்கித்
தந்த தந்தை பெரியாருடைய இயக்கத்தின் சார்பாக இன்றைக்கு எனக்குப் பாராட்டு விழா, வாழ்த்தரங்கம்.
எனக்குக் கொஞ்சம்
கூச்சமாகத்தான் இருக்கிறது. நாங்கள் எல்லாம் களப்பணியாளர்கள் .களத்திலே போய் வேலையைச் செய்ய சொன்னால் வேலையைச் செய்வோம். அந்த மாதிரி தான் எங்களுக்குப் பழக்கமே தவிர, இப்படி வாழ்த்தரங்கம் எல்லாம் பழக்கம் இல்லை.துரை எழில்விழியன் இங்குப் பேசினார். அவர்
எல்லா இடத்திற்கும் என்னோடு பயணம் செய்தவர். முதல்ல அவர் சைவம்தான் சாப்பிடுவார். அவரை நான்தான் அசைவமாக்கி விட்டேன் .அசைவமான பிறகு ரொம்ப
கொடூரமான அசைவமாகிவிட்டார்.என் கூடவே வந்தவர். அப்பழுக்கில்லாமல் தன்னுடைய பணியைச் செய்வார்
இயக்கத்தை உணர்வுபூர்வமாகக் கொள்கை அடிப்படையில் கொண்டு போவார். இந்திரா காந்திக்குக் கருப்பு கொடி காட்டியது
பற்றி எல்லாம் சொன்னார். அதற்கு முன்னால் பழ.நெடுமாறன் அவர்கள் அன்னை இந்திராவுக்கு கருப்புக் கொடி காட்டினால் தமிழ்நாட்டில் ரத்த ஆறு ஓடும் என்றார். எமர்ஜென்சினாலே ஏகப்பட்ட
திமுக கழகத் தொண்டர்கள் பாதிக்கப்பட்டு 500 பேருக்கு மேல மிகப்பெரிய பாதிப்புக்கு உள்ளாகி
வெளிவந்த சூழல்.
கலைஞர்
அவர்கள் ஒரே ஒரு அறிக்கைதான் கொடுத்தார். பல்லாயிரக்கணக்கான
தொண்டர்கள் அப்போது கொடியோடு வந்தார்கள்.உங்களுக்கு அந்த நிகழ்வு தெரியும். கலைஞரையும் சேர்த்துக் கேஸ் போட்டிருந்தார்கள். கீழ் கோர்ட்டில் அவர்களை எல்லாம் விடுதலை செய்துவிட்டு எங்களுக்கு எல்லாம் இரண்டு வருஷம் சிறைத்தண்டனை போட்டு விட்டார்கள்.பின்பு
மேல்கோர்ட்டுக்குப் போய் விடுதலை பெற்றோம். கலைஞர் அவர்கள் எங்களை, போராட்ட குணத்திலே கொஞ்சம் கூட மழுங்கி விடக்கூடாது என்பதில் மிகக் கவனமாக
இருப்பார் மாத்தி மாத்தி போராட்டங்களை அறிவித்துக் கொண்டே இருப்பார்.நாங்கள் போராட்டம் நடத்தி சிறைக்குப் போய்க்கொண்டே இருப்போம். அப்பதெல்லாம் மிக அருகில் அமர்ந்து மிக இயல்பாக அவரோடு பேசுவோம். அப்போ ஒருமுறை சொன்னேன், “அண்ணே இந்தப் பொங்கல்,பண்டிகைகளுக்கு எல்லாம்
நாங்கள் வெளியில் இருக்க வேண்டாமா? எப்பப் பாத்தாலும்
உள்ளேயே இருக்கிறோம்” என்று சொன்னேன். அதை மிகவும் ரசித்தார்.
எல்லாரும் விரும்பக்கூடிய ஆளுமை டாக்டர் கலைஞர் அவர்கள்.மதுரை ரயில் நிலையத்திற்கு வருவதுதான் அவருக்கு மிகவும் பிடித்தது. நாங்களெல்லாம் ஒரு செட்டாகப் போய் வரவேற்க நிற்போம்.இறங்கியவுடன் எல்லோரையும் .ஒரு பார்வை பார்ப்பார்.எல்லோரும்
வந்திருக்கிறார்களா என்று பார்த்துக்கொள்வார். அதற்கு
முன்னாடியே ரயில்வே ஸ்டேஷன் அதிரம்படி கலைஞர் வாழ்க என்னும் முழக்கம் கேட்கும். வெளியே நையாண்டி மேளம் ,உருமி மேளம்,பொய்க்கால் குதிரை ஆட்டம்
என்று எல்லா வகையான வரவேற்பும் இருக்கும். அது மாதிரியான ஒரு சூழ்நிலை. அது மாதிரியான ஏற்பாடுகள் எல்லாம் அப்படிச்
செய்ததால்தான் அடித்தட்டு மக்களிடம் இயக்கத்தைக் கொண்டு போக முடிந்தது. எப்போதும் அடித்தட்டு மக்கள்தான் அரண். அடித்தட்டு மக்களுடைய உள்ளத்திலே திமுக இடம்
பிடிக்க வேண்டும் என்பதுதான் எங்களுடைய நோக்கம்.
கலைஞர்
ஒரு கடிதம் எழுதினார். அந்தக் கடிதத்தில் மார்க்ஸ் ஒரு புத்தகம். லெனின் ஒரு நூலகம். ஸ்டாலின் ஒரு செயலகம் என்று எழுதினார். கம்யூனிஸ்ட்காரர்களே நாங்கள் கூட இப்படி எழுத
முடியல, இவர் என்ன இப்படி எழுதி வைத்திருக்கிறார். இதைப் படித்துவிட்டு எங்கள் ஆட்கள் பேசிக் கொண்டிருக்கிறார்கள் என்று
கம்யூனிஸ்ட் ஆட்களே என்னிடம் சொல்லி இருக்கிறார்கள். அண்ணாவுக்குக்
கம்யூனிசத்தில் ஈடுபாடு உண்டு. பச்சையப்பன் கல்லூரியில் மாணவர்களுக்கு யூனியன் சேர்மன் ஆக
இருந்திருக்கிறார். அப்போது ஆங்கிலத்தில் ஒரு கட்டுரைப்போட்டி.’லெனினிசம் இஸ் ஏ அப்பிளைடு மார்ச்சிசம்’ என்று ஆங்கிலத்தில் கட்டுரை எழுதி முதல் பரிசு
வாங்குகிறார்.அந்த இளம் வயதில் எவ்வளவு புரிதல் இருந்தால்
அப்படி எழுதி முதல் பரிசு வாங்கியிருக்க முடியும்.
அப்படி
இல்லையென்றால் திராவிட முன்னேற்றக் கழகம் கட்சி ஆரம்பித்து 18 ஆண்டுகளில் எப்படி ஆட்சிக் கட்டிலில்
அமர்ந்திருக்கமுடியும்?. அறியாமையை அகற்றிய அண்ணா அவர்கள் ஆட்சிக் கட்டிலுக்கு வந்தவுடன் அவருடைய சிந்தனை அய்யவிடம்தான் சென்றது. நான் கண்டதும் கொண்டதும் ஒரே தலைவர் தந்தை
பெரியார் என்றார். பரிவாரங்களுடன் திருச்சிப்போய் அய்யாவிடமிருந்து
வாழ்த்து வாங்கிக் கொண்டு போய்த்தான் ஆட்சிக் கட்டிலில் ஏறினார். தமிழ்நாடு என்று பெயர் வைத்தார்..இருமொழிக் கொள்கையைச் சட்டம் ஆக்கினார். சுயமரியாதை திருமணத்தைச் செல்லும்
என்று அறிவித்துச் சட்டமாக்கினார்.
அது மாதிரி கலைஞர் அவர்கள் சமத்துவபுரம் அதுவும்
பெரியார் சமத்துவபுரம் உருவாக்கினார். அது
வெறும் குடியிருப்பு இல்லை. எதிர்காலத்தில் இந்தச்சமூகம் எப்படி அமைய வேண்டும் என்று தந்தை பெரியார் நினைத்தாரோ,அந்தச் சித்தாந்தத்திற்கு கொடுத்த
ஒரு உருவகம்தான் சமத்துவபுரம். தந்தை
பெரியாருடைய கொள்கைகள் பல்வேறு
வடிவங்களில் தமிழ்நாட்டில் நிறைவேற்றப்பட்ட காரணத்தினால்தான் இன்றைக்கு மதவாத சக்திகள் இங்குக் காலடி டுத்து வைக்க முடியவில்லை. வரலாற்றை நீங்கள் எடுத்துப் பாருங்கள் 100 வருஷம்
சண்டை 500 வருஷம் சண்டை .நான் இந்த மாதம், அவன் அந்த மதம் அதனால் சண்டை. மனச்சாட்சி உள்ளவனுக்கு மதம் தேவையில்லை. மதம் எதற்கு? நான் ஒரு தப்பு செய்தால் அதை எனது மனச்சாட்சி சொல்வது இல்லையா? அதை மீறித்தான் தப்பு செய்கிறோம். எனவே மனச்சாட்சி உள்ளவனுக்கு மதம் தேவையில்லை.மனச்சாட்சி என்ன சொல்கிறதோ அதன்படி நடந்து விட்டால் மதமும்
தேவையில்லை, கடவுளும் தேவையில்லை .மனிதன் காட்டுமிராண்டிகளாக ஒரு காலத்தில் வாழ்ந்த காலத்தில்
வேண்டுமானால் மதம் ஒரு வகையில் அவனுக்குப் பயன்பட்டிருக்கலாம். ஆனால் இன்றைக்கு மதம் தேவையே இல்லை. சமூகத்தில் மதம் என்பது இர்ரவலன்ட். எந்த வகையிலும் தொடர்பில்லாத ஒன்றுதான் மதம்.
இப்படிப்பட்ட சிந்தனைகளுக்கு எல்லாம் காரணமாக இருப்பது தந்தை பெரியாருடைய
சிந்தனைகள்தான் . பொருளாளர் சொன்னார்.அப்போது காலேஜ் ஹவுஸ்லே நெடுமாறன் நிறையக் கூட்டங்கள் நடத்துவார். வேறு வேறு கருத்தோட்டம்
உள்ள ஆட்களைக் கூப்பிட்டு
தலைப்புக் கொடுத்து பேசச்சொல்வார்கள்.அப்படித்தான் நான் வால்கா முதல் கங்கை வரை
நூலைப் பேசினேன்.அதில் தோழர் கே.டி.கே தங்கமணி வந்து பேசுவார்.கேடிகே தங்கமணி மிக
எளிமையாக இருப்பார்.அப்போது டவுன் ஹால் ரோட்டில் போனால்,மாலையில் தொழிலாளர்களோடு அமர்ந்து
அவருக்குப் பாடம் நடத்திக்கொண்டு இருப்பார்.கே.டி.கே.தங்கமணி வெளி நாட்டில் போய்ப்
படித்துப் பாரிஸ்டர் பட்டம் பெற்றவர்.ஆனால் எளிய உழைக்கும் மக்களிடம் அமர்ந்து
அவர்களில் ஒருவராக உட்கார்ந்து பேசிக்கொண்டு இருப்பார்.இந்த மனப்பான்மை
எல்லோருக்கும் வர வேண்டும்.
பொருளாதார உயர்வு இல்லாததால் ஒருவன் தாழ்ந்தவனாகி விடுவானா? வாய்ப்புக் கிடைத்திருந்தால் அவனும் பெரிய
நிலைக்கு வந்திருப்பான். அண்ணா அதனால்தான் சொன்னார் நீ பொது வாழ்க்கைக்கு வரவேண்டும் என்று சொன்னால் பொது
வாழ்க்கையில் இருக்க வேண்டும் என்று சொன்னால் சாதாரண
மக்கள் வாழக்கூடிய இடத்துக்குப் போ. அவன் மொழியைக்
கற்றுக்கொள். அவன் பேசுற லாங்குவேஜ்ல பேசணும். அவனோடு வாழக் கற்றுக்கொள். அவனுக்கு வழிகாட்டு. இதுதான் அண்ணா சொன்னது. அப்படி இருந்தால்தான் இயக்கங்கள் வளரும். இயக்கத்தில் ஏதோ நான் வளர்ந்து
விட்டோம் என்று சொல்லி நம்மை நாமே அப்புறப்படுத்திக் கொள்ளக்கூடாது. சமுதாயத்தில் இருந்து நாம் நம்மை அப்புறப்படுத்திக்கொண்டோமானால் நாம் தனியாகத்தான்
இருப்போம்.
இந்த
உணர்வை எல்லாம் எங்களுக்கு ஊட்டியது, அன்றைக்கு மூன்றாம் வகுப்பு ரயில் பெட்டியில் அமர்ந்து எங்களோடு பேசிக்கொண்டு போன அய்யா பெரியார் அவர்கள்தான். அவருடைய
இன்ஸ்பிரேஷன்தான் இதற்கெல்லாம் காரணம். அதுதான் எங்களுடைய இன்ஸ்பிரேஷன். இன்றைக்குவரை நாங்கள் மனிதர்களை வேறுபடுத்துவது
இல்லை. அண்ணா எப்படிப்பட்ட அண்ணா? ஒரு நாலுமுழ வேட்டி. அதுவும்
கைத்தறிவேட்டி சரியாகப் பட்டன் மாட்டாத ஒரு சட்டை. ஆனால் ஆங்கிலத்தில் அவர் பேசினால்
அவருக்குத் தமிழே தெரியாது போலத் தோணும். தமிழில் பேசினால் அவருக்கு ஆங்கிலமே தெரியாது போலிருக்கிறது என்று
தோன்றுமளவிற்கு மொழிகளில் பாண்டித்தியம். நாடாளுமன்றத்தில் அண்ணாவின் உரையைக்
கேட்டு அத்தனை பேரும் அப்படியே அமர்ந்து கேட்டார்கள்.அவ்வளவு புலமை.அவ்வளவு
கருத்துவளம்.
இயக்கம்
என்பது தந்தை பெரியாரின் கொள்கை, அறிஞர் அண்ணாவின் கொள்கை, டாக்டர் கலைஞரின் கொள்கை. இவை எல்லாவற்றையும் இணைத்து ஒட்டுமொத்தமாக இருக்கக்கூடிய இன்றைய திராவிட மாடல் ஆட்சி. இன்றைக்கு அரசியல் சட்டத்தையே நிலைநிறுத்தக் கூடிய அளவிற்கு ஒரு
வழக்கை உச்ச நீதிமன்றத்தில் தொடுத்து இன்றைக்குத் தீர்ப்பினை நமது முதல்வர்
மு.க.ஸ்டாலின் அவர்கள் வாங்கியிருக்கிறார்.அந்தத் தீர்ப்பு என்பது தமிழ்நாட்டிற்கு மட்டும் அல்ல, இந்தியாவுக்கே, இந்தியாவில் உள்ள அனைத்து மாநிலங்களுக்கும்
வழிகாட்டக்கூடிய ஒரு தீர்ப்பு. 142 ஆவது
அரசியல் சட்டப் பிரிவு என்பது உச்ச நீதிமன்ற நீதிபதிகளுக்கு இருக்கக்கூடிய சிறப்பு அதிகாரம். இந்தச் சிறப்பு அதிகாரம் இல்லாமல் இருந்தால் எண்ணிக்கை பலத்தை மட்டும்
வைத்துக் கொண்டு, நாடாளுமன்றத்தில் பிரதமரை தேர்ந்தெடுப்பதற்கு எண்ணிக்கை பலம், சட்டமன்றத்தில் முதலமைச்சரைத் தேர்ந்தெடுப்பதற்கு எண்ணிக்கை பலம், எண்ணிக்கை பலத்தின் மூலமாக ஜனநாயகத்தில் ஒரு சர்வாதிகாரத்தைக் கொண்டுவர முடியும். இதைத் தடுப்பதற்கான ஒரு பிரிவுதான் அரசியல் சட்டப் பிரிவு 142.
சிறப்பு
அதிகாரம் என்னவென்று சொன்னால் செக்சன் பேலன்ஸ் என்று சொல்வார்கள் .சட்டமன்றம், நாடாளுமன்றம் எது எல்லை தாண்டினாலும் அதைத் தடுத்து முறைப்படுத்தக்கூடிய அதிகாரம்தான் உச்சநீதிமன்றத்திற்குக் கொடுக்கப்பட்ட 142 வது
சிறப்பு அதிகாரம். இதை விளங்காதவர் குடியரசுத் துணைத் தலைவராக இருக்கிறார். இன்றைக்குக் கூட முரசொலியில் அதைப் பற்றி ஒரு கட்டுரை எழுதுயிருக்கிறேன். ஆகவே எல்லாத் துறைகளிலும் நமது திராவிட இயக்கம் என்பது முழு
அதிகாரத்தோடு,முழுத்தகுதியோடு இருக்கிறது. எல்லாம் தெரிந்தவர்களைக் கொண்டதாக நமது இயக்கம் இருக்கிறது அதற்கு அண்ணா பயிற்சி கொடுத்தார். ‘எதையும் தாங்கும் இதயம் வேண்டும்’ மாற்றான் தோட்டத்து மல்லிகைக்கும் மணமுண்டு’. இதெல்லாம்
ஏன் என்று கேட்டால் ஜனநாயகத்தில் முரட்டுத்தனமாக எதையும் செய்ய முடியாது.
ஜனநாயகம் என்பது ஒரு பண்பட்ட அரசியல் கோட்பாடு. பண்பட்ட அரசியல் கோட்பாட்டை அமுல்படுத்துவதற்குப்
பண்பட்ட இளைஞர்கள் வேண்டும். பண்பட்ட இளைஞர்கள் இருந்தால் தான் ஜனநாயகத்தினை நேர்மையான வழியில் கொண்டு போக முடியும் இல்லையென்றால் எங்களுக்குப்
பெரும்பான்மை இருக்கிறது நாங்கள் எது வேண்டுமானாலும் செய்வோம் என்றால்
ஜனநாயகத்தில் ஒரு சர்வாதிகாரம் வந்துவிடும் இதை எல்லாம் எண்ணிப் பார்த்துத்தான் டாக்டர் அம்பேத்கர் அவர்கள் அரசியல் சட்டத்தில் 142 வது
பிரிவை ஏற்படுத்தி இருக்கிறார்கள். இவற்றையெல்லாம் தெரிந்தவர்களாகத் திராவிட
இயக்கத்தினர் இருப்பதால்தான் பாஜகவால் இதுவரை தமிழ்நாட்டில் அடி
எடுத்து வைக்க முடியவில்லை.
எல்லா விசயத்திலும் அய்யா
ஆசிரியர் அவர்கள் என்ன எழுதியிருக்கிறார் என்று நான் பார்ப்பேன்.விடுதலையை விடாது படிப்பேன்.அய்யா ஆசிரியர் அவர்கள் சொல்லி,தாய்க்கழகத்தின் சார்பாக ,நடைபெற்ற இந்தப் பிறந்த நாள் விழா எனக்குப் பெரும் மகிழ்ச்சி அளிக்கிறது.இன்னும்
பணியாற்ற உற்சாகம் தருகிறது.இதற்கு ஏற்பாடு செய்த அனைத்துப்
பொறுப்பாளர்களுக்கும்,உரையாற்றிய,கலந்து
கொண்ட அனைவர்க்கும் நன்றியைச்சொல்லி நான் விடைபெற்றுக்கொள்கிறேன் “ என்று ஏற்புரை நிகழ்த்தினார்.