மனதில் நிறுத்துங்கள்....

                 மனதில் நிறுத்துங்கள்....

நமுக்குள் சின்னச்சின்ன

முரண்கள் இருக்கும்

இயக்கத்திற்குள் எப்போதும்

போட்டிகள் இருக்கும் 

பொறாமைகள் இருக்கும்

எது எது இருப்பினும்

நம் பொது எதிரி

நாணயமில்லாதவன்

நய வஞ்சகன்

என்பதை மட்டும் 

மனதில் நிறுத்துங்கள்..

அவனது கண்ணை 

தமிழ்நாடு எப்போதும்

உறுத்துகிறது...

ஒரு நூற்றாண்டாய்

இந்தி வேண்டாம் போடா

என எதிர்க்குரல் எழுப்பி

போர்க்குணம் குறையாமல்

இருக்கும் குணம்

கண்ணை உறுத்துகிறது..

பல மதங்கள் எனினும்

தமிழ் நாட்டிற்குள்

இழையோடும் மனிதநேயம்

அவர்களுக்கு

இடைஞ்சலாக இருக்கிறது...

ஆத்திகனும் நாத்திகனும்

ஒன்றாய் இணைந்து

சமூக நீதி வேண்டும் 

என எழுப்பும் குரல்...

அதை இந்தியா முழுமைக்கும்

பரப்பும் குரலாய் விரிவது

அவர்களின் இருப்பிற்கு

மிகப்பெரும் ஆப்பு 

எனப்புரிகிறது அவர்களுக்கு..

எந்த மதமாக இருந்தால் என்ன

எந்தச்சாதியாக இருந்தால் என்ன

நாம் மனிதர்கள்

என்னும் உணர்வை ஊட்டிய

பெரியாரின் பெயரைக் கேட்டாலே

திகுதிகுவென எரிகிறது....

பெண்ணுரிமைத் தத்துவம்

மனுநீதிக் காவலாளிகளின் 

மண்டையைக்  குடைகிறது...

தொலைபேசி அலைபேசி

எதுவாயினும் 

நாம் சொல்லும் ஒவ்வொரு சொல்லும்

கண்காணிக்கப்படுகிறது...

பதிவு செய்யப்படுகிறது...

எவரையேனும் திட்டவேண்டுமா..

நேரில் செல்லுங்கள்

திட்டித் தீர்த்துவிட்டு 

திரும்பி விடுங்கள்

சில நேரம் உறவு முறியலாம்

சில நேரம் உறவு 

இன்னும் கூட நெருக்கமாகலாம்...!

நம் பரம்பரை எதிரிகள்

நாணயமில்லாதவர்கள்...

தன் கட்சிக்காரனையே

...  ...  ...

கூடுவதைப் படம் எடுத்து

பயமுறுத்துபவர்கள்....

இது கேமிராக்களின் காலம்..

ஒட்டுக்கேட்கும் கருவிகளின் காலம்!

நமக்குள் ஏதும் பிணக்கு வராதா?

பிளவுகள் ஏதும் நேராதா?

எனப் பிணம் தின்னக் 

காத்திருக்கும் கழுகுபோலக் 

காத்துக்கிடப்பவர்கள்!அதற்காகக்

காதைத் தீட்டிக் கொண்டிருப்பவர்கள்...

அவர்களின் காதுகளுக்கு தீனியாய்

எதையேனும் கொடுத்து விடாதீர்கள்..

நம் பரம்பரை எதிரிகள்

இட்டுக் கட்டி எழுப்பும்

பொய்ப்பரப்புரைகளுக்கும் 

இரையாகி விடாதீர்கள்...

உண்மை போலத்தோன்றும்

பொய்கள்தான் அவர்களின் மூலதனம்..

நம் பொது எதிரி

நாணயமில்லாதவன்

நய வஞ்சகன்

என்பதை மட்டும் 

மனதில் நிறுத்துங்கள்.

                     முனைவர்.வா.நேரு,

                       27.04.2023

.