பறக்கும் காரும் தாவும் பொம்மையும்...வா.நேரு

 

நன்றி : உண்மை மாதம் இருமுறை இதழ் நவம்பர் 1-15,2026.

இனிவரும் உலகத்தைப் பற்றிச் சிந்தித்த பெரியார் ‘போக்குவரவு –எங்கும் ஆகாய விமானமும் ,அதிவேக சாதனமுமாகவே இருக்கும்’ என்றார் 80 ஆண்டுகளுக்கு முன். அதிவேக சாதனங்களால் நிறைந்திருக்கும் உலகமாக இன்றைய உலகம் மாறி இருக்கிறது.எலான் மாஸ்க் தனது ‘டெஸ்லா’ நிறுவனத்தின் சார்பாகத் தயாரிக்கப்பட இருக்கும் பறக்கும் கார் 2028-ல் நடைமுறைக்கு வரும் என்று அறிவித்திருக்கிறார். பறக்கும் கார் எப்படி பறக்கும் என்பதற்கான செயல் விளக்கத்தை 16.10.2026 அன்று  நிகழ்த்திக் காட்டியிருக்கிறார்.

விமானம் ஓடுதளத்தில் ஓடுவதுபோல,வளைந்த பெரிய பாலத்தின் மீது செங்குத்தாக ஏறி கொஞ்ச தூரம் ஓடி பின்பு பறக்கும் கார்  தலை கீழாக வந்தது..பாலத்திலிருந்து காற்று வெளியில் வந்த  ,கார்  அப்படியே அந்தரத்தில் சுழன்று மீண்டும் தரைக்கு வந்து மிக வேகமாக ஓடியது. நேரலையாக இந்த நிகழ்வை ஒளிபரப்பினார்கள்..பார்க்க வியப்பாக இருந்தது. இன்னும் 20 ,30 வருடங்களில் பறக்கும் கார்கள் இயல்பாக ஆகலாம்.பறக்கும் கார்கள் எப்படி இயங்கும்,அதற்கான எரிபொருளாகக் காற்று எப்படி இருக்கும் என்றெல்லாம் செய்திகள் விரிவாகக் கொடுக்கப்பட்டுள்ளன. இணையதளங்களில் பறக்கும் கார்கள் பற்றிய செய்திகள் நிறைய உள்ளன.

விமானப் போக்குவரத்து மிக அதிக அளவில் அதிகரித்திருக்கிறது.தந்தை பெரியார் அவர்கள் சொன்னதைப்போலப் போக்குவரத்து ஆகாய விமானப் போக்குவரத்தாக மாறியிருக்கிறது. தற்போதெல்லாம் இயல்பாக மத்திய தர வர்க்கத்தைச் சார்ந்த பலர் விமானப் பயணத்தைத் தேர்ந்தெடுக்கின்றனர்.சென்னையிலிருந்து டில்லிக்கு ஒரு முழு நாளையும் தாண்டி ,28 மணி நேரம் இரயிலில் பயணம் செய்வதைவிட,விமானத்தில் மூன்று  மணி நேரத்தில் சென்று இறங்குவது வசதியாகத்தான் இருக்கிறது.அறிவியல் அந்த வசதியைச் செய்து கொடுத்திருக்கிறது. ஆனால் அப்படிப் பயணம் செய்வதற்கு ஒருவரின் பண வசதிதான் அடிப்படைத் தகுதியாக இருக்கிறது.

அண்மையில் இண்டிகோ விமான நிறுவனம் தனது பயணிகளின் டிக்கெட் விலையை அதிகரித்திருக்கிறது.அதற்கு அவர்கள் சொன்ன முக்கியமான காரணம் விமான எரிபொருள்களின் விலை ஏற்றம் என்று குறிப்பிட்டிருக்கிறார்கள்.விமான எரிபொருட்கள் தனித்துவமானவை.எல்லா இடத்திலும் கிடைக்கக் கூடிய பொருளல்ல. சிறப்பு வகைப் பெட்ரோலியப் பொருளான ஜெட் ஏ, ஜெட் ஏ1,ஜெட் பி எனக்குறிப்பிடப்படும் இந்தப் பெட்ரோலியப்பொருட்களே விமானத்தில் பயன்படுத்தப்படுகின்றன.பல நாடுகளில் இந்த விமான எரிபொருளுக்குத் தட்டுப்பாடு ஏற்பட்டிருக்கிறது. 15-10-2026 ஆம் தேதி,வியாழக்கிழமை சுவிட்சர்லாந்து நாடு , தனது சூரிச் விமான நிலையத்தில் விமான எரிபொருள் தட்டுப்பாடு நிலவுவதாக அறிவிப்பை வெளியிட்டுள்ளது.அதைச் சமாளிக்க எடுக்கப்படும் நடவடிக்கைகள் பற்றியும் அறிவிப்பினை,சுவிட்சர்லாந்து அரசு அறிவித்துள்ளது.

 பிபிசி நிறுவனம், விமானத்தில் பயன்படுத்தக்கூடிய சிறப்பு வகைப் பெட்ரோலியப் பொருட்கள் பற்றியும் ,அதற்கு எதிர்காலத்தில் தட்டுப்பாடு ஏற்படக்கூடிய நிலைமைகள் பற்றியும் ,ஈரான் அமெரிக்கா நாடுகளுக்கு இடையில் ஏற்பட்டுள்ள போர், எப்படி விமான எரிபொருட்கள் விலை உயர்வுக்குக் காரணம் என்பதைப் பற்றியும் விரிவான செய்தியினைக் கொடுத்துள்ளது.

இறந்து போன சடலங்கள், மக்கிய தாவரங்கள் பல ஆயிரம் ஆண்டுகளுக்குப் பிறகு இயற்கையான பெட்ரோலியப் பொருட்களாக மாறுவதையும்,அதனை சுத்திகரித்து எடுப்பதில் இருக்கும் பிரச்சனைகளையும் அந்தச் செய்தி அலசுகிறது. நைஜீரியா நாடு,விமான எரிபொருளுக்கான கச்சாப் பொருட்களைப் பெருமளவில் அந்த நாட்டில் பெற்றிருந்தாலும், அதனைச் சுத்தபடுத்தி விமான எரிபொருளாக மாற்றுவதற்கான தொழில்நுட்பமும்,கருவியும் இல்லாத காரணத்தால் மற்ற நாடுகளையே விமான எரிபொருளுக்கு அந்த நாடு நம்பி இருக்கிறது என்னும் உண்மையை வெளியிட்டு இருக்கிறது.கையில் வெண்ணெய் வைத்திருந்தாலும் அதனை நெய்யாக மாற்றுவது எப்படி என்பது தெரியாமல் நைஜீரியா திணறுகிறது. ஆனால் எது எப்படி இருந்தாலும் விமானப் போக்குவரத்து என்பது எல்லா நாடுகளிலும் அதிகரித்திருக்கிறது. பயணத்தை எளிதாக மாற்றியிருக்கிறது.

ஏறத்தாழ 123 ஆண்டுகளுக்கு முன்பு முதன்முதலில் விமான வடிவத்தில் மனிதர்கள் பறக்கலாம் என்று கண்டுபிடித்த ரைட் சகோதர்கள் வில்பர் ரைட்& ஆலிவர் ரைட் ,உலகம் இப்படி எல்லாம் ஆகாய விமானத்தால் மாறும் என்று நினைத்திருக்க மாட்டார்கள்.

ரைட் சகோதர்களுக்கு முன்பே பலர் விமானத்தை வடிவமைக்க முயன்று இருக்கிறார்கள்.ஜெர்மனியைச் சார்ந்த லிலியந்தால் விமானத்தை வடிவமைக்க முயன்று,அதன் சோதனை ஓட்டத்தில் இறந்தவர். தாங்கள் விமானத்தை வடிவமைத்து வெற்றியடைந்த பிறகு “ லிலியந்தால் சந்தேகத்திற்கு இடமின்றி முன்னோடிகளில் மிகப்பெரியவர்.மேலும் உலகம் அவருக்கு ஒரு பெரிய கடன்பட்டுள்ளது “ என்று வில்வர் ரைட் கூறியிருக்கிறார். ரைட் சகோதரர்களுக்கு முந்தைய ஆராய்ச்சியாளர்கள் எல்லோருமே கீழே மோட்டார் கார் ஓடுவதைப் போலவே உயரத்தில் ஓடவேண்டும் என்ற வகையிலே தங்கள் ஆராய்ச்சியைச் செய்திருக்கிறார்கள்.அந்த முயற்சியில் பலர் தோல்வியடைந்திருக்கிறார்கள். தங்கள் உயிரை இழந்திருக்கிறார்கள்.

ஆனால் ரைட் சகோதரர்கள் பறவை ஓர் இடத்தில் பறக்கும்போது  திரும்புவதற்குச் சிறகை விரித்து ஒருபக்கமாக வலது அல்லது இடது பக்கமாகச் சாய்ந்து திரும்புவதைக் கவனித்திருக்கிறார்கள்.இப்படி ஓர் இயந்திரமும் சாய்ந்து  பறந்தால்,அதற்கும் இறக்கை இருந்தால் பறக்க இயலுமா,திரும்ப இயலுமா என்று  சிந்தித்திருக்கிறார்கள்.வடிவமைத்து பறக்க விட்டார்கள்.விமானத்தை வடிவமைத்த புகழைப் பெற்றார்கள்.

ஆல்விர் ரைட் & வில்வர் ரைட் பட்டம் பெற்றவர்கள் அல்ல. நிறையப் படித்தவர்கள் அல்ல. ஆனால் இளமை முதலே அவர்களுக்கு ஆராயும் மனப்பான்மை இருந்திருக்கிறது.இயந்திரங்களின் மேல் ஆர்வம் இருந்திருக்கிறது.அவர்கள் வைத்திருந்த மிதிவண்டிக் கடை,உருளும்  இயந்திரங்களைப் பற்றிய பட்டறிவைக் கொடுத்திருக்கிறது. அவரது தந்தை ஒரு பாதிரியாராக இருந்தபோதும் கூட, குழந்தைகளுக்குக் கடவுள் பொம்மைகளை வாங்கித் தராமல் ஒரு தவ்வும் பொம்மையை வாங்கித் தந்திருக்கிறார்.அந்த பொம்மை தவ்வுவதைப் பார்த்த ரைட் சகோதர்கள் அதனை முழுவதுமாகப் பிரித்து மறுபடியும் சேர்த்து தவ்வவிட்டுப் பார்த்திருந்திருக்கிறார்கள்.அந்தப் பொம்மைதான் தாங்கள் விமானம் கண்டுபிடிக்க அடிப்படை என்று தங்கள் பேட்டிகளில் குறிப்பிட்டிருக்கிறார்கள்.

1903 ஆம் ஆண்டு , டிசம்பர் 17ஆம் நாள் முதன் முதலில் ரைட் சகோதரர்கள் பறந்து காட்டியபோது,அதனைப் பலரும் ஏற்றுக்கொள்ளவில்லை. நாங்கள் ஓர் இயந்திரத்தின் மூலமாகப் பறந்துவிட்டோம் என்று பத்திரிக்கைகளுக்குச் செய்திகளைக் கொடுத்தபோது,அதனை வெளியிட அந்தக்காலத்து பத்திரிக்கைகள் மறுத்துவிட்டன.இன்னும் சில பத்திரிக்கைகள் செய்தியினைத் திரித்து வெளியிட்டுள்ளன.சில ஆண்டுகளுக்குப் பின்தான் அவர்களின் கண்டுபிடிப்பு ஏற்றுக்கொள்ளப்பட்டுள்ளது.தங்கள் வாழ்க்கையில் திருமணம் முடிக்காத ரைட் சகோதரர்கள், பலர் தங்கள் திருமணத்திற்கு விமானத்தில் பறந்து செல்வதற்கு வாய்ப்பினை ஏற்படுத்திக் கொடுத்திருக்கிறார்கள்.

எலான் மாஸ்க் தனது ‘டெஸ்லா’ நிறுவனத்தின் பறக்கும் காரின் சோதனை ஓட்டத்தை நிகழ்த்திக்காட்டிய இந்த நேரத்தில் பலரும் அது குறித்த சந்தேகத்தை எழுப்புகிறார்கள்.தனியாக அதற்குப் பாதை வேண்டுமே?, எப்படி அது சாலையில் பறக்கமுடியும் என்ற கேள்விகளை எழுப்புகிறார்கள். ஆனால் இது ஒரு மகத்தான கண்டுபிடிப்பு.எதிர்காலத்தில் பலருக்கும் பயன்படப்போகும் கண்டுபிடிப்பு என்பது மட்டும் நமக்குத் தெளிவாகத் தெரிகிறது.

விமானம் பறப்பதற்குத் தேவைப்படும் சிறப்பு வகைப் பெட்ரோலியப் பொருட்கள் ,இந்தப் பறக்கும் கார்களுக்குத் தேவையில்லை, காற்றிலேயே பறக்கும், சூரிய ஒளி மின்சக்தியைப் பயன்படுத்திப் பறக்கும் காராக இது இருக்கும் என்று அறிவித்திருக்கிறார்கள்.வானில் பறந்தால் என்ன, தனித்தன்மையான ரோட்டில் பறந்தால் என்ன ,அதிவேக சாதனமாக நமது பயணத்திற்கு உதவினால் சரியே.எளிய மக்களுக்கும் பயன்படுத்தும் வகையில் அமைந்தால் பெரும் மகிழ்ச்சியே.

மதுரையில் பேரா கி.ஆழ்வார் அவர்கள் மொழி பெயர்த்த ‘Nectar of Music ‘ என்னும் நூலின் அறிமுக விழா...

 

திருச்செந்தூர் ஆதித்தனார் கல்லூரியின் மேனாள் ஆங்கிலத்துறைத் தலைவர் பேரா கி.ஆழ்வார் அவர்கள் ,புரட்சிக்கவிஞர் பாரதிதாசன் அவர்களின் ‘இசையமுது ‘ என்னும் கவிதைத் தொகுப்பினை ஆங்கிலத்தில் ‘Nectar Of Music ‘ என்னும் தலைப்பில் மொழிபெயர்த்திருக்கிறார்.அந்த மொழிபெயர்ப்பு நூல் அறிமுக விழா மதுரை காந்தி அருங்காட்சியகத்தில் உள்ள IGSR’ அரங்கத்தில் 31.10.2026 சனிக்கிழமை காலை 10.30 மணி முதல் மதியம் 2 மணி வரை நடைபெற்றது.

நிகழ்வின் தொடக்கத்தில் மாணவிகள் சு.திவ்யதரிசினி  மற்றும் சு.மகாமதி இருவரும் தமிழ்த்தாய் வாழ்த்துப் பாடினர்.

வரவேற்புரை வழங்கிய பேரா கி.ஆழ்வார் அவர்களின் மூத்த மகன் திரு ஆ.பரணீதரன் அவர்கள்...அருகில் நான்(வா.நேரு)

நிகழ்விற்கு ஆதித்தனார் கல்லூரியின் மேனாள் மாணவர் முனைவர் வா.நேரு தலைமை தாங்கினார்.வந்திருந்த அனைவரையும் ஆ.பரணீதரன் வரவேற்றார்.நிகழ்வில் 90 வயதுடைய பேரா கி.ஆழ்வார் அவர்களும் அவரது இணையர் அம்மா சரோஜா அவர்களும் பங்கேற்றனர்.

பேரா கி.ஆழ்வார் அவர்கள்,அவரது இணையர் அம்மா சரோஜா அவர்கள், வாழ்த்துரை வழங்கிய தூத்துக்குடி சுப்பையா வித்தியாலாயா மேல் நிலைப்பள்ளியின் மேனாள் ஆசிரியர் திருமதி உஷா பாலகிருஷ்ணன் அவர்கள்.

தூத்துக்குடி சுப்பையா வித்தியாலாயா மேல் நிலைப்பள்ளியின் மேனாள் ஆசிரியர் திருமதி உஷா பாலகிருஷ்ணன் அவர்களுக்கு நினைவுப் பரிசினை பேரா கி.ஆழ்வார் அவர்கள் வழங்கினார்.

தூத்துக்குடி சுப்பையா வித்தியாலாயா மேல் நிலைப்பள்ளியின் மேனாள் ஆசிரியர் திருமதி உஷா பாலகிருஷ்ணன் அவர்களுக்குப் பொன்னாடை போர்த்தினார்.. திருமதி விமலா அவர்கள் (டாக்டர் இரா.கனகசபாபதி அவர்களின் மருமகள்)

நிகழ்வில் தூத்துக்குடி சுப்பையா வித்தியாலாயா மேல்நிலைப்பள்ளியின் மேனாள் ஆசிரியர் உஷா பாலகிருஷ்ணன் அவர்கள் பேரா ஆழ்வார் அவர்கள் மொழி பெயர்ப்பு  நூல் பற்றிக் குறிப்பிட்டு வாழ்த்துரை வழங்கினார்.ஆதித்தனார் கல்லூரியின் மேனாள் மாணவர் ,மதுரை காந்திய சிந்தனைக் கல்லூரியின் மதிப்புறு இயக்குநர் முனைவர் சு.ஆண்டியப்பன் அவர்கள் மொழி பெயர்ப்பு நூலில் உள்ள கவிதைகளைக் குறிப்பிட்டும்,பேரா ஆழ்வார் அவர்களின் மாணவர்களுக்கான பணிகள் பற்றியும் குறிப்பிட்டு வாழ்த்தினார்.,மதுரை காந்தி அருட்காட்சியகத்தின் செயலாளர் திரு கே.ஆர். நந்தாராவ்,மேனாள் முதல்வர் டாக்டர் இரா.கனகசபாபதி அவர்களுக்கும் காந்தி அருங்காட்சியகத்திற்கும் உள்ள தொடர்புகளை நினைவுபடுத்தி,முதல்வர் அவர்களோடு மிக நெருக்கமாக இருந்த பேரா ஆழ்வார் எனக் குறிப்பிட்டு   ,மொழி பெயர்ப்பு நூலினைப் பாராட்டி வாழ்த்துரை வழங்கினர்.

முனைவர் சு.ஆண்டியப்பன் அவர்கள்..

முனைவர் சு.ஆண்டியப்பன் அவர்களுக்குப் பொன்னாடை போர்த்திய ஆதித்தனார் கல்லூரியின் பழைய மாணவர்  தூத்துக்குடி திரு.பாலகிருஷ்ணன்.

முனைவர் சு.ஆண்டியப்பன் அவர்களுக்கு நினைவுப் பரிசினை பேரா கி.ஆழ்வார் அவர்கள் வழங்கினார்.

நிகழ்வில் வாழ்த்துரை வழங்கிய மதுரை காந்தி அருங்காட்சியகத்தின் செயலாளர் திரு கே.ஆர். நந்தாராவ் அவர்கள்.

திரு கே.ஆர். நந்தாராவ் அவர்களுக்குப் பொன்னாடை போர்த்திய ஆதித்தனார் கல்லூரியின் பழைய மாணவர் மதுரை  திரு.வேலாயுதம் 

மதுரை காந்தி அருங்காட்சியகத்தின் செயலாளர் திரு கே.ஆர். நந்தாராவ் அவர்களுக்கு நினைவுப் பரிசினை பேரா கி.ஆழ்வார் அவர்கள் வழங்கினார்.

தொடர்ந்து ஆண்டிபட்டி & தேனி தி லிட்டில் ஃப்ளவர் பள்ளிகளின் தாளாளர் , திரு எ.ஹென்றி அருளானந்தம் அவர்கள் சிறப்புரை வழங்கினார்.அதில் தான் எழுதிய பேரா கி.ஆழ்வார் பற்றிய ஆங்கிலக் கவிதையை அரங்கில் வாசித்தார்.1972-75-களில் தன்னோடு ஆதித்தனார் கல்லூரியில் படித்த சென்னையில் இருக்கும் திரு எம்.பி.கணபதி அவர்கள் தன்னிடம் பேசி இந்த நிகழ்ச்சி பற்றிக் குறிப்பிட்டார் என்று அவருக்கு நன்றி தெரிவித்தார்.  இன்றைக்கு இருக்கும் எழுத்தாளர்களும் பேச்சாளர்களும் திராவிட இயக்கத்திற்கு நன்றி சொல்லவேண்டும்.அந்த இயக்கத்தால்தான் நாம் பதவி பெற்றோம், பணிகள் பெற்றோம் என்று சொல்லி,மொழி பெயர்ப்பு நூலின் சிறப்புகளையும் தனது வகுப்பறையில் நடந்த  ஆழ்வார் சார் பற்றிய  பல செய்திகளையும்  அரங்கில் பகிர்ந்து கொண்டார்.

திரு எ.ஹென்றி அருளானந்தம் அவர்கள் சிறப்புரை

 திரு எ.ஹென்றி அருளானந்தம் அவர்களுக்குப் பொன்னாடை போர்த்திய ஆதித்தனார் கல்லூரியின் பழைய மாணவர் சங்கரன்கோவில்  திரு.அய்யாத்துரை  

 திரு எ.ஹென்றி அருளானந்தம் அவர்களுக்கு நினைவுப் பரிசினை பேரா கி.ஆழ்வார் அவர்கள் வழங்கினார்.

திரு எ.ஹென்றி அருளானந்தம் அவர்கள்  நினைவுப் பரிசினை பேரா கி.ஆழ்வார் அவர்களுக்கு  வழங்கினார்.

தொடர்ந்து மதுரை CEOA கல்விக் குழுமத்தின் நிறுவனத் தலைவர் டாக்டர் எம்.இராசா கிளைமேக்சு அவர்கள் தான் திருச்செந்தூர் ஆதித்தனார் கல்லூரியில் 1971-74 காலகட்டத்தில் படித்ததை  நினைவு கூர்ந்தார். ,ஆழ்வார் சார் அவர்கள் கற்பித்த ஆங்கிலம் இன்றைக்குவரை தனக்கு உதவுவதாகக் குறிப்பிட்டார்.தனது நினைவுகளைப் பகிர்ந்து கொண்டு ஆழ்வார் சார் அவர்கள் மொழிபெயர்த்த நூலின் சிறப்புகளைக் குறிப்பிட்டு,இனிமேல் மொழி பெயர்ப்பு செய்பவர்களுக்கு ஒரு மாதிரி நூலாக(Reference book) இந்த 'Nectar of Music ' நூல் இருக்கிறது  என்று பாராட்டினார். தமிழ் மற்றும் கவிஞர் பாரதிதாசன் அவர்களின் சிறப்புகளையும் குறிப்பிட்டுச் சிறப்புரையாற்றினார்.

மதுரை CEOA கல்விக் குழுமத்தின் நிறுவனத் தலைவர் டாக்டர் எம்.இராசா கிளைமேக்சு அவர்கள்

 டாக்டர் எம்.இராசா கிளைமேக்சு அவர்களுக்குப் பொன்னாடை போர்த்திய ஆதித்தனார் கல்லூரியின் பழைய மாணவர் மதுரை நீலகண்டன் 

டாக்டர் எம்.இராசா கிளைமேக்சு அவர்களுக்கு நினைவுப் பரிசினை பேரா கி.ஆழ்வார் அவர்கள் வழங்கினார்

தொடர்ந்து சிறப்புரையாற்றிய திருநெல்வேலி மனோன்மணியம் சுந்தரனார் பல்கலைக்கழகத்தின் துணைவேந்தர்(பொறுப்பு ) டாக்டர் ச.பிரபாகரன் அவர்கள் ,மொழி பெயர்ப்பு நூலான Nectar Of Music என்னும் நூலின் சிறப்புகளைப் பட்டியலிட்டு உரையாற்றினார்.தான் மொழி பெயர்த்து இருந்தால் எப்படி இந்த நூலை மொழி பெயர்த்திருப்பேன் என்று சில வரிகளை மொழி பெயர்த்துப்பார்த்தேன்.அவர் ஒரு வரியில் மொழி பெயர்த்திருப்பதை நான் மொழி பெயர்த்திருந்தால் பல வரிகள் செலவழித்திருப்பேன்.அப்படி ஒரு அருமையான மொழி பெயர்ப்பாக,இந்த 'Nectar Of Music ' நூல்  இருக்கிறது.மிகவும் கண்டிப்பான ஆசிரியராக வகுப்பில் இருப்பார். தான் ஆதித்தனார் கல்லூரியில் பயின்ற காலத்தில் ,தனக்கும் பேரா ஆழ்வார் அவர்களுக்கும் இருந்த உறவு பற்றியும்,பேரா ஆழ்வார் அவர்கள் ஒரு பெரியாரிஸ்ட் என்பதையும் தான் கல்லூரி மாணவராகக் கவிதைப் போட்டியில் வெற்றி பெற்றபோது தன்னைக் கட்டியணைத்து பேரா ஆழ்வார் பாராட்டியது இன்னும் என் நினைவுகளில் இருக்கிறது என்றும் குறிப்பிட்டார். ஆங்கிலக் கவிஞர்கள் ஷெல்லி,மில்டன் ஆகியோரோடு கவிஞர் பாரதிதாசன் அவர்களை ஒப்பிட்டுப் பேசினார். இந்த மொழி பெயர்ப்பினை எவ்வளவு ஈடுபாட்டோடும், நடுநிலையோடும்  பேரா ஆழ்வார் அவர்கள் மொழி பெயர்த்திருக்கிறார் என்பதையும் குறிப்பிட்டு மிக ஆழமான இலக்கிய உரையாக  நிறைவுரையாற்றினார்.

திருநெல்வேலி மனோன்மணியம் சுந்தரனார் பல்கலைக்கழகத்தின் துணைவேந்தர்(பொறுப்பு ) டாக்டர் ச.பிரபாகரன் அவர்கள்

 டாக்டர் ச.பிரபாகரன்  அவர்களுக்குப் பொன்னாடை போர்த்திய ஆதித்தனார் கல்லூரியின் பழைய மாணவர் SBI  மேனாள் முதன்மைப் பொதுமேலாளர் திரு ஆறுமுகப்பாண்டியன். 

டாக்டர் ச.பிரபாகரன்   அவர்களுக்கு நினைவுப் பரிசினை பேரா கி.ஆழ்வார் அவர்கள் வழங்கினார்

நிகழ்வில் பேரா கி.ஆழ்வார் அவர்கள் ஏற்புரையாற்றினார்.தனது மாணவர்கள் இன்றைக்குப் பல்வேறு பெரிய பொறுப்புகளில் இருப்பது மகிழ்ச்சி அளிக்கிறது என்றார். பாரதிதாசன் கவிதைகள் தனது இளமைக்காலம் முதல் மீண்டும் மீண்டும் படித்த, மனதில் பதிந்த கவிதைகள் என்றார்.எனவே அதனை மொழிபெயர்த்தேன். தான் 1983-ல் பெரியார் பட்டயச்சான்றிதழ் பெற்றதையும், பாரதியார் ,பாரதிதாசன் பற்றியும் குறிப்பிட்டார். தனது இணையர் அம்மா சரோஜா அவர்களின் ஒத்துழைப்பால் தானும்,பிள்ளைகளும் உயர்ந்தோம் என்றும்  ,தனது பிள்ளைகள் இந்த நூலினைப் பணம் பெறாமல் கொடுப்பது பெரும் மகிழ்ச்சி அளிக்கிறது என்றும் கூறி உரையாற்றினார்.

பேரா கி.ஆழ்வார் அவர்கள் ஏற்புரை..

பேரா கி.ஆழ்வார் அவர்களுக்கும் அம்மா சரோஜா ஆழ்வார் அவர்களுக்கும்  பழைய மாணவர்கள் பொன்னாடை போர்த்தி, நினைவுப் பரிசு வழங்கினர்.

மதுரை யாதவர் கல்லூரியின் மேனாள் ஆங்கிலத்துறைத் தலைவர் டாக்டர் சண்முகையா வாழ்த்துரை வழங்கினார்.அவருக்க்குத் துணைவேந்தர் அவர்கள் பொன்னாடை அணிவித்தார்., ,ஆதித்தனார் கல்லூரியின்

மேனாள் மாணவர் அய்யாத்துரை ,தனது வாழ்வின் திருப்பம் ,உயர்வு எல்லாவற்றிற்கும் பேரா.கி.ஆழ்வாரே காரணம் என நெகிழ்ந்து  நன்றி கூறினார்.

நிறைவாக சே.கணபதிராஜா அவர்கள் நன்றியுரையாற்றினார்.அவர் தனது நன்றியுரையில், " பேரா ஆழ்வார் சார் அவர்கள் என்னிடம் பேசிய 30 நிமிடங்கள்தான் என் வாழ்க்கையின் போக்கையே மாற்றியது. நான் போட்டித் தேர்வு எழுதியதற்கும், பணியில் சேர்ந்ததற்கும் கல்லூரியில் 3-ஆம் ஆண்டில் அவர் என்னிடம்  தனிப்பட்ட முறையில் அரை மணி நேரம் பேசி,அறிவுரை சொன்னதே காரணம் ' என்று குறிப்பிட்டு ஆழ்வார் சார் அவர்க்ளுக்கு நெகிழ்வாக நன்றி கூறி பின் அனைவருக்கும் நன்றி கூறினார்.

திரு சே.கணபதிராசா   அவர்களுக்குப் பொன்னாடை போர்த்திய ஆதித்தனார் கல்லூரியின் பழைய மாணவர் திரு செல்வகணேசு.. 

திரு சே.கணபதிராசா   அவர்களுக்கு நினைவுப் பரிசினை பேரா கி.ஆழ்வார் அவர்கள் வழங்கினார்

எனது பேரா கி.ஆழ்வார் அவர்களால் பொன்னாடை எனக்குப் போர்த்தப்பட்ட பெருமையான தருணம்.

நிகழ்வினை ஜெம் டிவி நிறுவனத்தினர் முழுமையாகப் பதிவு செய்தனர்.அதனை அவர்களின் இணையதளத்திலும் வெளியிட்டனர். விழாக்குழுவினர் சார்பாக மனமார்ந்த நன்றி அவர்களுக்கு.மதுரையைச் சார்ந்த போட்டோகிராபர் இராதா அருமையாக புகைப்படங்களை எடுத்துக்கொடுத்துள்ளார்.அவருக்கு அன்பார்ந்த நன்றி.இந்த  நிகழ்வினை இன்றைய நிகழ்வில் வெளியிட்ட பத்திரிக்கைகளுக்கும் , வந்திருந்த பத்திரிக்கை நிருபர்களுக்கும் மனமார்ந்த நன்றி.சென்னையில் இருந்தாலும் சூரத்தில் இருந்தாலும் இந்த நிகழ்வு நன்றாக நடைபெற தனது வழிகாட்டலைக் கொடுத்துக்கொண்டே இருந்த , நமது கல்லூரியின் பழைய மாணவர் திரு எம்.பி.கணபதி அவர்களுக்கு மனமார்ந்த நன்றி.

.திருச்செந்தூர் கல்லூரியின் முன்னாள் மாணவர்கள் திரு இரா.ஆறுமுகப்பாண்டி,திரு நீலகண்டன், திரு பாலகிருஷ்ணன்,திரு செல்வகணேஷ்,திரு அய்யாத்துரை திரு வேலாயுதம்,, கல்லூரி முன்னாள் முதல்வர் டாக்டர் இரா.கனகசபாபதி அவர்களின் மருமகள் விமலா ஆகியோர் சிறப்பு விருந்தினர்களுக்குப் பொன்னாடை அணிவித்தனர்.  திரு கி.ஆழ்வார் அவர்களின் மகன் ஆ.பரணீதரன்-அவரது இணையர் ப.தனலச்சுமி,மகன் ஆ.சிரீதரன் வில்வ குமார், மகள் ஆ.கிருஷ்ணவேணி ,அவரின் இணையர் க.செந்தில் அதிபன் மற்றும் சம்பந்தி பால்கிருஷ்ணன் ஆகியோரும் . ஆண்டிபட்டி&தேனி லிட்டில் ஃபளவர்  பள்ளி,மதுரை சிஇஓஏ பள்ளி நிர்வாகிகள்  , பலரும்  கலந்து கொண்டனர். 'Nectar Of Music' நூலின் அறிமுக விழா காலை 10.30 மணிக்குத் தொடங்கி மதியம் 2 மணிவரை   நடைபெற்றது. நிறைவாக பேரா கி.ஆழ்வார் அவர்களின் குடும்பத்தினர் ஏற்பாடு செய்திட்ட இனிய உணவோடு நிகழ்வு நிறைவு பெற்றது.