அமெரிக்காவின் முதல் தீவிரவாதி… -முனைவர் வா.நேரு

 இன்றைக்குச் சந்திரனில் சென்று வாழலாமா? செவ்வாய் கிரகத்தில் சென்று வாழலாமா? என்று மனிதர்கள் முடிவு செய்யும் அளவிற்கு அறிவியல் வளர்ந்திருக்கிறது.

இன்றைய அறிவியல், நாகரிக மேம்பாடு என்பன பற்றியெல்லாம் அறியாத மக்கள், இன்றைக்கும் மலைகளில் – காடுகளில் வேட்டையாடி, இயற்கையோடு இயைந்து வாழும் வாழ்க்கையை மேற்கொண்டிருக்கின்றனர். தங்களுக்கென ஒரு வாழ்க்கை முறையை – மொழியை – பண்பாட்டை அவர்கள் கடைப்பிடிக்கின்றனர். அப்படிப்பட்ட மக்களை உலகம் பழங்குடி இன மக்கள் என அழைக்கிறது. அவர்களில் சிலர் நாகரிக வாழ்க்கைக்குள் வந்தாலும் பலர், தங்களைத் தாங்களே உலகத்திடமிருந்து தனிமைப்படுத்திக்கொண்டு வாழ்கின்றனர். பழங்குடி மக்களின் உரிமைகளைப் பாதுகாக்கும் நாளாக ஆகஸ்ட் 9ஆம் தேதியை உலக அய்க்கிய நாடுகள் சபை அறிவித்திருக்கிறது.

வெள்ளை நிறமுடையவர்கள் பெரும்பாலும் பழங்குடி இன மக்களுக்குப் பெரும் கொடுமைகளை இழைத்திருக்கிறார்கள்.அமெரிக்காவில் கொலம்பஸ் வருவதற்கு முன் வாழ்ந்த பழங்குடி மக்கள் அவ்வளவு அருமையாக. வெகுளியாக வாழ்க்கையை அமைத்து வாழ்ந்து வந்திருக்கின்றனர்.இந்தியா என்று எண்ணி அமெரிக்காவில் இறங்கிய கொலம்பஸை அந்தப் பழங்குடி மக்கள் நட்போடும் வியப்போடும் வரவேற்று இருக்கிறார்கள். ஆனால், வெள்ளைத்தோல் உடைய கொலம்பஸ் மனதில் அவர்களை அடிமைப்படுத்தி, உடல் உழைப்பினைச் செய்ய வைக்கவேண்டும் என்று தோன்றியிருக்கிறது.கொலம்பஸ் தனது குறிப்பேட்டில் இப்படி எழுதி இருக்கிறான்…

“அவர்கள்… கிளிகளையும், பருத்திப் பந்துகளையும், வேல் கம்புகளையும், மற்றும் பல பொருட்களையும் கொண்டு வந்தனர். அவற்றை, கண்ணாடிப் பொருட்கள் மற்றும் மணிகளுக்காகப் பண்டமாற்று செய்துகொண்டனர். அவர்களிடமிருந்த அனைத்தையும் விரும்பி வியாபாரம் செய்தனர்… அவர்கள் நல்ல உடற்கட்டுகளுடன், அழகான தோற்றத்துடன் இருந்தனர்… அவர்கள் ஆயுதங்களைத் தாங்கி நிற்கவில்லை.நான் அவர்களுக்கு ஒரு வாளைக் காட்டினேன். அவர்கள் அதன் கூர்ப்பகுதியைக் கையால் பிடித்து, அறியாமையால் கையை வெட்டிக்கொண்டனர். அவர்கள் இரும்பை அறிந்திருக்கவில்லை… அவர்களுடைய வேல் கம்புகள் பிரம்புகளாலானவை.

அவர்கள் அருமையான பணியாளர்களாக மாறக்கூடிய வர்கள். ஒரு அய்ம்பது அடியாட்களைக் கொண்டு அவர்களை அடிபணியவைத்து, நாம் நினைத்த வேலைகளையெல்லாம் செய்விக்கலாம்” (ஹாவாட் ஜின் – தமிழில் க.மாதவ் – சிந்தன் புக்ஸ் வெளியீடு) என்று எழுதிய கொலம்பஸ் அதே மாதிரி அந்தச் செவ்விந்திய மக்களை அடிபணிய வைத்தான். கொடுமைப்படுத்தினான். கொன்று அழித்தான் என்பதை எல்லாம் நாம் படிக்கும்போது கண்ணீர் வடிக்கும் வரலாறு.

“கொலம்பஸ் அமெரிக்காவின் முதல் தீவிரவாதி, கொடூரமானவன், இன அழிப்பாளன், பூர்வகுடிப் பெண்களுக்கு எதிரான குற்றங்களை நடத்தியவன், நிலங்களை அபகரித்தவன் என்றே அமெரிக்கச் செவ்விந்திய மக்கள் இன்றளவும் கொலம்பஸை அடையாளப்படுத்துகிறார்கள்” என்று ஒரு பத்திரிகையாளர் குறிப்பிடுகிறார். இன்றைக்கும் மண்ணின் மக்களான பழங்குடி மக்கள் உலகமெங்கும் வேலையாட்களாகத்தான் பயன்படுத்தப்படுகிறார்கள்.

இன்றைக்கும் இந்தியாவில் பழங்குடி இன மக்களுக்குக் கிடைக்கவேண்டிய கல்வி, பணி என்பதெல்லாம் முழுமையாகக் கிடைக்காதவாறு இந்தியப் பார்ப்பனிய ஆளும் வர்க்கம் பார்த்துக்கொள்கிறது.

பழங்குடி இன மக்களில் சுமார் 200 குழுக்கள் தற்போது உலகம் முழுவதும் வாழ்கின்றனர். அவர்கள் தங்களைத் தாங்களே தனிமைப்படுத்திக்கொண்டு வாழ்கின்றனர். பொலிவியா, பிரேசில், கொலம்பியா, ஈக்வடார், இந்தியா, இந்தோனேசியா, பப்புவா நியூ கினியா, ,பெரு மற்றும் வெனிசுலா ஆகிய நாடுகளில் இயற்கை வளங்கள் நிறைந்த தொலைதூரக் காடுகளில் அவர்கள் வாழ்கின்றனர்.

அவர்களின் உயிருக்கே பெரும் அச்சுறுத்தல் இன்றைக்கு உலகத்தில் உள்ளது. ஓர் இடத்தில் வாழும் மனிதர்கள் அவர்கள். அவர்களின் வாழ்விடங்கள் பறிக்கப்படுகின்றன.இருக்கும் இடத்தில் இருந்து விரட்டி அடிக்கப்படுகிறார்கள்.அவர்கள் வெளியில் வந்தால் தண்ணீரை விட்டுத் தரைக்கு வந்த மீன்கள் போலத் தவிக்கிறார்கள். எனவே, அவர்களுக்கு உரித்தான வாழ்விடத்தை, சூழலைப் பாதுக்காக்கவேண்டும் என்ற எண்ணத்தில் தோன்றியதுதான் இந்தப் பழங்குடிகள் தினம்.

“உலகின் 90 நாடுகளில் 476 மில்லியன் பழங்குடி மக்கள் வாழ்கின்றனர்.அவர்கள் உலக மக்கள் தொகையில் 5 சதவிகிதத்

திற்கும் குறைவாக உள்ளனர். ஆனால், ஏழைகளில் 15 சதவிகிதம் பேராக அவர்கள் உள்ளனர்.அவர்கள் உலகின் மதிப்பிடப்பட்ட 7000 மொழிகளில் பெரும்பாலான மொழிகளைப் பேசுகிறார்கள்.உலகின் 5000 வெவ்வேறு கலாச்சாரங்களைப் பிரதிநிதித்துவப் படுத்துகிறார்கள்“ என்று புள்ளி விவரங்கள் குறிப்பிடுகின்றன.

பழங்குடி இன மக்கள் தினமான ஆகஸ்டு 9 பற்றிப் பல விரிவான தகவல்கள் அய்க்கிய நாடுகள் சபையின் இணையதளத்தில் கிடைக்கின்றன. (https://www.unesco.org/en/international-day-worlds – indigenous-peoples) பழங்குடி இன மக்கள் மத்தியில் பணியாற்ற விரும்பும் தன்னார்வத் தொண்டர்களை வரவேற்கிறோம் என்றும் அதில் குறிப்பிட்டு இருக்கின்றார்கள்.

இந்தியாவைப் பொறுத்தவரை இம்மண்ணின் மக்களான தமிழ் மக்களை அடக்கி ஒடுக்கி ஆதிக்கம் செலுத்தினர்.

“ஆரியர்கள் என்று இந்நாட்டில் காலடி எடுத்து வைத்தார்களோ அன்று முதல் தமிழையும்,

தமிழரின் கலைகளையும், கலாச்சாரத்தையும் ஒழிப்பதிலேயே அவர்கள் கண்ணும் கருத்துமாய் இருந்து வந்திருக்கிறார்கள்….ஆரியர்கள் தம்மை எல்லோரையும்விட உயர்ந்தவராகவும் தமக்கடுத்த உயர்வுள்ளவர்களாக அரசர்களையும் அதற்கும் அடுத்து உயர்வுள்ளவர்களாக வணிகர்களையும் மற்றவர்களைத் தம் எல்லோருக்கும் அடிமைகளாகவும்(சூத்திரர்களாகவும்) கடவுள் படைத்தாரென்று கூறி அரசர்களுக்கு மற்றையோரைக் காட்டிலும் தனி உயர்வைக் கற்பித்து விடவே, அவர்கள் ஆரியத்திற்குச் சுலபத்தில் அடிமையானார்கள்.” (மறைமலையடிகள்,இவர் தமிழர் இல்லை என்றால்

எவர் தமிழர்? ப.திருமாவேலன், பக்கம் 131)

வலிமையாய் இருந்த திராவிடர்களைப் பார்த்து ,இவர்களைப் போர்களால் வெல்ல முடியாது என்று வஞ்சகம் செய்து ,சூழ்ச்சி செய்து, திராவிட இனத்து மன்னர்களைக் கைக்குள் போட்டுக்கொண்டு திராவிட இன மக்களைச் சூத்திரர்கள் என்றும் பஞ்சமர்கள் என்றும் வர்ணாசிர அமைப்பில் சொல்லி நம்மை ஆண்டாண்டு காலமாக உடல் உழைப்புத் தொழிலாளர்களாக மட்டுமே ஆக்கி வைத்த ஆரியத்தையும் உணர்ந்து கொள்ளும் நாளாக நாம் இதனைக் கடைப்பிடிக்க வேண்டும். கொலம்பஸ் போன்ற ஆங்கிலேயர்கள் மீது அமெரிக்கச் செவ்விந்திய மக்களுக்கு இருந்த வெறுப்பைப் போல ஏன் நம் மக்களுக்கு ஆரியர்கள் மீது இல்லை என்பதையும் இணைத்துப் பார்க்கும் நாளாக இந்தச் சர்வதேச மண்ணின் மைந்தர்கள் நாளை, பழங்குடியினர் நாளை நாம் கடைப்பிடிக்க வேண்டும்.

இன்னும் தமிழ்நாட்டின் மலைகளில் அல்லது அதன் அருகில் இருக்கும் பள்ளத்தாக்குகளில் வசிக்கும் பழங்குடி இனமக்களைப் பற்றி அறிந்து கொள்ளும் நாளாகவும்,அவர்களுக்கு உரிய உரிமைகள் அவர்களுக்குக் கிடைக்கிறதா என்பதை உறுதி செய்து கொள்ளும் நாளாகவும்,அவர்களின் இடஒதுக்கீட்டைப் போலியான சான்றிதழ்கள் மூலம் வேறு பிரிவினர் அபகரித்துக்கொள்வதைத் தடுக்க உறுதி எடுத்துக்கொள்ளும் நாளாகவும் நம்மைப் போன்றோர் இந்த நாளைக் கடைப்பிடிக்கலாம்.பார்ப்பனரல்லாத மக்கள் அனைவரும் ஒன்றே என்னும் திராவிட இயக்கத்தின் அடிப்படைக் கோட்பாட்டின்படி நமது உடன்பிறப்புகளான பழங்குடி மக்கள் மீது இன்னும் கூடுதல் கவனம் செலுத்தும் நாளாகச் சர்வதேசப் பழங்குடிகள் நாளான ஆகஸ்ட் 9 அமையட்டும்.

நன்றி : உண்மை இதழ் ஆகஸ்ட் 1-15,2024

பாடத்திட்டத்திற்குள் வந்தால்தான்...

 

பாடத்திட்டத்திற்குள் வந்தால்தான்….

---------------------------------------------------------------

பாரதியை அறிந்த பலர்

பாரதிதாசனை அறிந்தாரில்லை..

பாரதிதாசனைப் பலகாலம்

அறிந்த நான் ஏனோ

அவரின் முதல் மாணாக்கன்

வாணிதாசனை அதிகம்

அறிந்தவனில்லை..

 

'எழிலோவியம்' வடித்திட்ட

இந்த இயற்கைக் குயிலின்

வசந்த கீதங்களை

எப்படி வாசிக்காமல் போனேன் நான்?

இயற்கையை அணுஅணுவாய்

உள்வாங்கி இரசித்து

உன்னதக் கவிதைகளை

எழுதியிருக்கும் இந்தத்

தமிழ் ‘வேர்ட்ஸ்வர்த்தை’

எப்படிப் படிக்காமல் போனேன் நான்?

தமிழின் ‘தாகூர்’ எனப்

போற்றப்பட்ட இந்தப்

பொன்நிகர் கவிஞரின்

வரிகளை எப்படி நான்

மனப்பாடம் செய்யாமல் போனேன்?

 

நினைத்துப்பார்க்கிறேன்..

அன்றைக்கு நான்

படித்த பள்ளிப்பாடங்களில்…

கல்லூரிப் பாடங்களில்

வாணிதாசனைக் கடந்து

நான் வந்ததில்லை..

ஏனோ எந்தப் பாடத்திலும்

அவர் பாடலைப் படித்த

நினைவுகள் இல்லை…

 

அவரின் ஒரு பாடல்

பாடத்தில் இருந்திருந்தாலும்

அவரைக் குறித்த

குறிப்புகளை நான்

தேடியிருக்கக்கூடும்…

தேடிப்படித்து

தெவிட்டாத அவரது

தேன் கவிதைகளுக்குள்

மூழ்கியிருக்கக்கூடும்

 

எத்தகைய கவிஞர் என்றாலும்

பாடத்திட்டத்திற்குள்

வந்தால்தான் மக்கள்

கண்ணில் அகப்படுகிறார்கள்..

மாபெரும் கவிஞர்கள்கூட..

 

                        வா.நேரு

                        28.07.2024

 

 

 

‘அம்பலப்படுத்தும் மந்திரம்’

 

            ‘அம்பலப்படுத்தும் மந்திரம்’

அறிவியல் வெளிச்சம்

பொதுமக்களை அண்டாமல்

பார்த்துக்கொள்கின்றன

நம் நாட்டு ஊடகங்கள்..

 

நாட்டை ஆள்பவர் முதல்

நடமாடும் சாமியார்கள்வரை

அனைவரும் ‘தங்களைத் தாங்களே

கடவுள் ‘ என அறிவித்துக்கொள்கின்றனர்..

இவர்கள் கடவுள்கள்தான்

என்பதை எந்தச்சோதனையின்

மூலம் நாம் அறிந்துகொள்வது?

எந்தப் பரிசோதனைக் கூட்த்தில்

முக்கி எடுத்து

இவர்களை நாம் கடவுள்

எனப் புரிந்து கொள்வது?

 

செத்துப்போன பெண்ணை

உயிர்ப்பித்துக்கொண்டு

வருவேன் எனச்சொல்கிறான்

ஒரு சாமியார்..

நூற்றுக்கணக்கில் மக்கள்

சாகக் காரணமான

அந்தச்சாமியார்

‘பிறப்பவர் எல்லாம் ஒரு நாள்

சாகத்தானே வேண்டும்’

என வேதாந்தம் பேசுகிறான்..

அவனைக் கைது செய்யாமல்

உத்தரப்பிரதேச அரசு

வேடிக்கை பார்த்துக்கொண்டிருக்கிறது..

 

அறிவியலுக்குப் புறம்பான

அத்தனையும்

பக்தி என்னும் பெயரால்

பரப்பப்படும் தேசமாய் நம் தேசம்..

 

உலகில் எவ்வளோவோ மாற்றங்கள்

செயற்கை நுண்ணறிவு

இயந்திரங்கள்...

எத்தனையோ

அற்புதங்கள்...

இந்தியாவில் அதனைப்

பக்திக்கு பயன்படுத்துவது எப்படி

என்றுதான் சிந்தித்துக்

கொண்டிருக்கிறார்கள்..

 

அய்யா பெரியாரின்

கருத்தை அழுத்தமாய்ச்

சொல்ல வேண்டியிருக்கிறது..

" உன் கடவுள்;

அவன் கடவுள்;

இவன் கடவுள்;

எவன் கடவுளும்

இல்லை; இல்லை;

இல்லவே இல்லை ."

 

‘நடமாடும் கடவுள்களாய்’

தங்களைத் தாங்களே

சொல்லிக்கொள்ளும்

அபத்தர்களை

அம்பலப்படுத்தும்

மந்திரமாய் எனக்கு

இதுதான் தோன்றுகிறது…

"கடவுள் இல்லை; கடவுள் இல்லை;

கடவுள் இல்லவே இல்லை ."

 

                        வா.நேரு

                        23.07.2024

உலக மக்கள் புரிந்து கொள்ளும் குறியீடுகள்.... முனைவர் வா.நேரு

நன்றி : உண்மை இதழ் ஜூலை 16-31,2024

வரவேற்கப்பட வேண்டியவர்களே…… முனைவர் வா.நேரு …

 

இந்தக் கட்டுரையை நீங்கள் வாசிக்கும் இந்த நாளில் உலகின் மக்கள் தொகை 811 கோடி, இந்தியத் துணைக் கண்டத்தின் மக்கள் தொகை 144 கோடி. 1987ஆம் ஆண்டு ஜூலை 11ஆம் நாள் உலக மக்கள் தொகை 500 கோடியைத் தொட்டது. அய்யோ! உலக மக்கள் தொகை 500 கோடி வந்து விட்டது. நாடுகளே! அவரவர் நாடுகளில் மக்கள் தொகையைக் கட்டுப்படுத்த நடவடிக்கை எடுங்கள். இது உங்கள் நாட்டின் பிரச்சனை மட்டுமல்ல, உலகப் பிரச்சனை. உலகத்தில் ஒரு மனிதராகப் பிறக்கும் ஒவ்வொருவரின் சுயமரியாதைப் பிரச்சனை.எனவே, மக்கள் தொகையைக் கட்டுப்படுத்த நடவடிக்கை எடுங்கள் என்று அய்க்கிய நாடுகள் சபை 1989இல் அன்புக் கட்டளை இட்டு ஜூலை 11ஆம் தேதியை உலக மக்கள்தொகை நாளாக அறிவித்தது. 1990 முதல் உலகின் பல நாடுகள் இந்த ஜூலை 11ஆம் நாளை, மக்கள் தொகையைக் கட்டுப்படுத்தும் ஒரு விழிப்புணர்வு நாளாகக் கடைப்பிடிக்கின்றன.

உலகின் மக்கள் தொகை 1800ஆம் ஆண்டில் 100 கோடி. 1900ஆம் ஆண்டில் 160 கோடி. 1987ஆம் ஆண்டில் 500 கோடி. .இப்போது 2024இல் 811 கோடி. 2050ஆம் ஆண்டுக்குள் மக்கள்தொகை 1000 கோடியை எட்டும் என்று கணிப்புகள் கூறுகின்றன. 250 ஆண்டுகளில் 10 மடங்கு பெருக்கம் என்றால் எப்படி உலகம் தாங்கும்?.. இயற்கை வளங்கள் அதேதான், ஆனால் மக்கள் தொகை மட்டும் 10 மடங்கு அதிகரிப்பு என்றால் உலகம் தாங்காது என்று நிபுணர்கள் எச்சரிக்கின்றனர்.

கடந்த பல நூற்றாண்டுகளாக நகரத்தைவிட கிராமத்தில்தான் மக்கள் அதிகமாக வாழ்ந்து வந்தனர். ஆனால், நகரில் கிடைக்கும் வாய்ப்பு,வசதிகளைக் கருதி மக்கள் நகரங்களை நோக்கி நகர ஆரம்பித்தனர். தந்தை பெரியார் அவர்கள், கிராமத்தில் இருக்கும் ஒடுக்கப்பட்ட மக்களை நோக்கி ‘‘நகரத்தை நோக்கி நகருங்கள், இடம் பெயருங்கள், அப்போதுதான் ஜாதியக் கொடுமைகளிலிருந்து தப்பிக்க முடியும்” என்றார். அப்படித் தமிழ்நாட்டில் கிராமத்தைவிட்டு நகரத்தை நோக்கி நகர்ந்து கல்வியால் பலர் உயர்வு பெற்றனர். ஆனால், உலகம் முழுவதும் நகரத்தை நோக்கி நகரும் போக்கு அதிகரித்திருக்கிறது. 2007இல் முதன்முதலாக உலகில், கிராமத்தில் வாழும் மக்கள்தொகையை விட நகரத்தில் வாழும் மக்கள்தொகை சதவிகிதம் கூடுதலாக இருந்தது. நகரத்தில் வாழும் மக்களின் சதவிகிதம் அதிகரித்துக்கொண்டே வருகிறது. 2050ஆம் ஆண்டில் உலகில், நகரத்தில் வாழும் மக்கள்தொகை 66 சதவிகிதத்தை எட்டும் எனக் குறிப்பிடுகின்றனர். நகரத்தில் மக்கள் தொகை அதிகரிக்கும்போது அவர்களுக்கான குடிநீர் தேவை, மற்ற பயன்பாட்டிற்கான நீரின் தேவை,குடியிருப்புகளின் தேவை இன்னும் பற்பல தேவைகள் அதிகரிக்கின்றன. அவற்றைக் கொடுக்க முடியாமல்  அரசுகள்திணறுகின்றன.  இந்தத்திணறல் இன்னும்  அதிகரிக்கும் .இதைத்தவிர்க்க பெருநகரங்களிலிருந்தும்,கிராமங்களிலிருந்தும் விடுபட்டு மக்கள் சிறிய நகரங்களில் வாழும் போக்கு அதிகரிக்கவேண்டும்.அவர்களுக்கு பெருநகரங்களில் கிடைக்கும் வசதிகள் கிடைக்க அரசுகள் வழிவகை செய்யவேண்டும். மக்களின் மனப்போக்கும் மாறவேண்டும்.

உலகின் மக்கள்தொகையில் பெண்கள் 49.7 சதவிகிதம் உள்ளனர். ஆனால் தனக்குக் குழந்தை வேண்டுமா? வேண்டாமா? என்பதை முடிவு செய்யும் நிலையில் பெரும்பாலான பெண்கள் இல்லை. அவர்களின் கணவரோ, குடும்பமோதான் குழந்தை வேண்டுமா? வேண்டாமா? என்பதை முடிவு செய்கிறார்கள். ஆண்குழந்தை வேண்டும் என்று 3,4 பெண் குழந்தைகள் பிறந்த பின்பும் கூட ஓர்
ஆண்பிள்ளையைப் பெற்றுத்தர வற்புறுத்துகின்றனர். சமூகம் ஒரு பெண்ணைக் குழந்தை பெற்றுத்தரும் கருவியாக இருக்கத்தான் வலியுறுத்துகிறது.கர்ப்பம், பிரசவம் காரணமாக ஒவ்வொரு இரண்டு நிமிடத்திலும் ஒரு பெண் இறக்கிறாள் என்னும் புள்ளி விவரத்தை அய்.நா. மன்றம் தருகிறது.

பெண் இல்லை என்றால் இன்றுவரை குழந்தைப் பிறப்பு இல்லை. நாளை மாறலாம்.ஆனால், பிள்ளைகளைப் பெற்றுத்தரும் பெண்களுக்கு இந்த உலகத்தில் என்ன உரிமை இருக்கிறது.?

“தொத்து நோய்,ஏழ்மை,பணக்காரர் தொல்லை
தொடர்ந்தடிக்கும் சூறையிலே பிள்ளையோ பிள்ளை!
காதலுக்கு வழிவைத்துக் கருப்பாதை சாத்தக்
கதவொன்று கண்டறிவோம். இதிலென்ன குற்றம்?
சாதலுக்கோ பிள்ளை? தவிப்பதற்கோ பிள்ளை?”

என்றார் புரட்சிக் கவிஞர் பாரதிதாசன்.

“பெண்களே, பெண்ணடிமைத்தனம் அகல்வதற்குக் கருப்பையைக் கழட்டி எறியுங்கள்” என்றார் தந்தை பெரியார். அன்றைக்கு உலகம் திடுக்கிட்டது – கருப்பாதையைச் சாத்திக் காதலா? கருப்பையைக் கழட்டி எறிந்த பின்பு காதலா? என்று. ஆனால், அறிவியல் புதிய புதிய வழிகளைக் காட்டிக் கொண்டே இருக்கிறது.கருப்பையைப் பற்றிக் கவலைப்படாமல் காதல் செய்வதற்கான வழியைச் செயற்கை நுண்ணறிவு காட்டியிருக்கிறது

சீனாவின் மக்கள் தொகை கடந்த 9 ஆண்டுகளாகத் தொடர்ந்து குறைந்து வருகிறது. ஒரு குழந்தைக்கு மேல் பெற்றுக்கொள்பவர்களுக்கு பல்வேறு விதமான தண்டனைகளைக் கொடுத்து, மக்கள் தொகையைக் குறைத்த சீன அரசாங்கம், இப்போது அந்த விதியைத் தளர்த்தி,மக்களைத் திருமணம் செய்து குழந்தைகளைப் பெற்றுக்கொள்ளுமாறு கேட்டுக்கொண்டிருக்கிறது. ஆனாலும் சீனாவில் இருக்கும் பெரும்பாலான பெண்கள் திருமணம் செய்துகொள்வதிலோ,குழந்தை பெற்றுக் கொள்வதிலோ ஆர்வம் காட்டவில்லை.

“விர்ச்சுவல்“ என்றாலே மெய்நிகர் என்பதை நாம் அறிவோம். அதாவது உண்மை போல இருக்கும்; ஆனால் உண்மையானது அல்ல. ‘விர்ச்சுவல்” பார்ட்னரை உருவாக்கிக் கொள்ளும் போக்கு தற்போது சீனப் பெண்களிடையே பிரபலமடைந்து வருகிறது என்று பி.பி.சி. தமிழ் செய்தி வெளியிட்டிருக்கிறது. “ஆண்கள் வேண்டாம்!’ செயற்கை நுண்ணறிவு’ காதலனுடன் சீன பெண்கள் டேட்டிங் – என்ன காரணம்” என்று ஜூன் 2,2024இல் ஒரு விரிவான கட்டுரையைப் பி.பி.சி. தமிழ் இணையதளம் வெளியிட்டுள்ளது. இதுவும் கூட ஒருவகையில் மக்கள் தொகையைக் குறைக்கும் வழிமுறைதான்.

“`செயற்கை நுண்ணறிவுக் காதலர்’ என்னும் போக்கு கடந்த சில ஆண்டுகளில் மிகவும் பிரபலமாகிவிட்டது, இதில் சீனாவின் குளோ (Glow) மற்றும் அமெரிக்காவின் பிரதி (Replika) போன்ற பயன்பாடுகளும் அடங்கும்.

பெண்களை மய்யமாகக் கொண்ட ஓட்டோமி போன்ற காதல் விளையாட்டுகளும் இங்கு மிகவும் பிரபலமாகிவிட்டன. அத்தகைய விளையாட்டுகளில், பெண் பயனர்கள் ஆண் கதாபாத்திரங்களை உருவாக்கி காதல் உறவுகள் கொள்ளலாம். ஒவ்வொரு ஆண்டும் லட்சக்கணக்கான சீனப் பெண்கள் இத்தகைய மெய்நிகர் உறவுகளை நோக்கி ஈர்க்கப்படுகிறார்கள். சீனாவில் டிஜிட்டல் காதல் பற்றி ஆராய்ச்சி செய்து வரும் சிட்னி தொழில்நுட்பப் பல்கலைக்கழகப் பேராசிரியர் லியு டிங்டிங், செயற்கை நுண்ணறிவு ஆண் நண்பர்களின் மீதான சீனப் பெண்களின் ஆர்வம் பாலின சமத்துவமின்மையால் அவர்களின் நிஜ வாழ்க்கையில் நிலவும் விரக்தியைப் பிரதிபலிக்கிறது என்கிறார். மேலும் அவர் “நிஜ வாழ்க்கையில் ஆதிக்கம் செலுத்தி, மோசமான ஆபாச நகைச்சுவைகளைச் சொல்லும் பல ஆதிக்க மற்றும் மிரட்டும் ஆண்களைப் பெண்கள் சந்திக்கின்றனர். ஆனால், செயற்கை நுண்ணறிவு உங்கள் உணர்வுகளை மதிக்கிறது.” என்கிறார்.” என்று பி.பி.சி.தமிழ் செய்தி கூறுகிறது.

இது சரியா?தவறா? என்பதைப் பற்றி உலக அளவில் ஒரு பட்டிமன்றம் நடந்து கொண்டுள்ளது. ஆனால், நம்மைப் பொறுத்த அளவில் சக மனுசியை மனுசியாகப் பார்க்காமல் வெறும் பிள்ளை பெற்றுத்தரும் இயந்திரமாகவும்,அடிமை வேலை செய்யும் ஒரு வேலைக்காரியாகவும் மட்டுமே பார்க்கும் இன்றைய உலகில், பெண்ணுரிமை நோக்கிலும்,மக்கள் தொகையைக் கட்டுப்படுத்தவேண்டும் என்னும் நோக்கிலும் இது மாதிரியான செயற்கை நுண்ணறிவுக் காதலர்கள் வரவேற்கப்படவேண்டியவர்களே.

“சமூகம் ஒரு பெண்ணைக் குழந்தை பெற்றுத்தரும் கருவியாக இருக்கத்தான் வலியுறுத்துகிறது.கர்ப்பம், பிரசவம் காரணமாக ஒவ்வொரு இரண்டு நிமிடத்திலும் ஒரு பெண் இறக்கிறாள் என்னும் புள்ளி விவரத்தை அய்.நா. மன்றம் தருகிறது”.

பெண்களுக்கு செயற்கை நுண்ணறிவுக் காதலர்கள் மட்டுமல்ல, ஆண்களுக்கும் செயற்கை நுண்ணறிவுக் காதலிகளும் உலக அளவில் அறிவியல் மூலம் உருவாக்கப்படுகின்றன. அமெரிக்கா போன்ற நாடுகளில் இதனைப் பெரும்பாலானோர் பயன்படுத்துகின்றனர் .இன்னும் சில ஆண்களுக்கு பெண்களிடம் எப்படிக் காதல் மொழி பேசுவது, அவர்களிடம் எப்படி நடந்து கொள்வது போன்று காதல் பாடங்களைக் கற்றுக்கொடுக்கும் ஆசிரியர்களாகவும் செயல்படும் வகையில் செயற்கை நுண்ணறிவு சாட்பாட்களும், பாலுறவுப் பொம்மைகளும் உருவாக்கப்படுகின்றன. பயன்படுத்தப்படுகின்றன. ஆண், பெண் உறவில் இது ஒரு மிகப்பெரிய மாற்றமாகப் பார்க்கப்படுகின்றது.

நன்றி : உண்மை ஜூலை 1-15,2024

வளரும் எழுத்தாளர்களுக்கான ஒரு நாள் பயிற்சிப்பட்டறை...

நன்றி: விடுதலை 02.07.2024..

"இந்த நிகழ்ச்சி மிக அருமையாக நடந்து முடிந்தது.. ஒவ்வொன்றையும் தனித்தனியாக பேசலாம். மிக ஆழமான அவசியமான கருத்துக்களை அனைத்து பயிற்சியாளர்களும் நம்மோடு பகிர்ந்து கொண்டார்கள்.  நமது குழுவின் பங்களிப்பு அபரிமிதமாக இருந்தது. அன்பு நன்றிகள்  பேரன்பும் அனைவருக்கும்

 தோழர் அர்ஷா  "வாருங்கள் படிப்போம்" வாட்சப் குழுவில்

" இன்று நடந்த நிகழ்வில் மிக ஆச்சரியகரமான நிகழ்ச்சிகள் நடந்தது...

 ஒன்று என் வாழ்க்கையில் நான் இதுவரையிலும்  20 நிமிடங்களுக்கு மேல் மேடைகளில் பேசுவது அரிது.. சில வேலைகளில் அது அரை மணி நேரத்தை தாண்டி இருக்கும் அவ்வளவுதான்...

 ஒன்றரை மணி நேரம் கடந்த பிறகு எனக்கு ஒரு சீட்டு வருகிறது ஆனால் நான் நினைத்தது நான் ஒரு 30 நிமிடத்தை கூட கடக்கவில்லை அதற்குள் ஏன் சீட்டு தருகிறார்கள் என்று முதல் விடயம் என் வாழ்வில் முதல் முறையாக நேரம் ஆகிவிட்டது என்று சீட்டு வந்தது இதுதான் முதல் முறை...

 நான் உடனே நிகழ்ச்சி ஏற்பாட்டாளரை பார்த்து அரை மணி நேரம் முடிவதற்குள் ஏன் இப்படி 

 என்று கேட்க அவர்கள் சொன்னார்கள் ஒன்றரை மணி நேரமாக  1.1/2பேசிக் கொண்டிருக்கிறீர்கள் எதிர்பாராத விதமாக ஆசிரியர் வந்து விட்டார்.

 

அதாவது தோழர் கி. வீரமணி அவர்கள் வந்து விட்டதால் என்று காரணம் சொன்னார்கள்...

 நாவல் குறித்து பேசும் போது ஏனோ எனக்கு அவ்வளவு தீவிரமான ஆவேசம் வருகிறது ஏனெனில் நான் 20 வருடங்களாக அதில் வாழ்ந்து கொண்டிருக்கிறேன் என்பதால் இருக்கலாம் 

 

குறைந்தது ஒரு 80 இளங்கலை மாணவர்கள்,

முனைவர் பட்டம் பெற்றவர்கள்,

 முதுகலை முடித்தவர்கள் 

 வெற்றிகரமாக படித்து முடித்து தொழிலில் இருப்பவர்கள்

 என விதவிதமான  இளைஞர் பட்டாளம் நடுவயதினர் என பாகுபாடு அற்று இலக்கியம் படைப்பது குறித்து தீவிரம் காட்டுகிறார்கள் என்பது மிக மகிழ்ச்சியான ஒன்றாக இருக்கிறது

 ஆனாலும் நான் மேடையில் ஏறி பேச ஆரம்பித்தபோது எனக்கு ஒரு பெரும் துயரம் என்னை வாட்டிக் கொண்டிருந்தது..

 என் அன்புக்குரிய தோழர் 

 மனுஷ புத்திரன் அவர்கள் கவிதை குறித்தான தனது அற்புதமான உரையை நிகழ்த்தி விட்டு கிளம்பி சென்றுவிட் டார்... அதை நான் எதிர்பார்க்கவில்லை 

 

அவர் மேடையில் இல்லை என்பது எனக்கு மிகப்பெரிய துயரமாக இருந்தது.. ஆனால் எப்போதையும் எப்போதையும் விட இன்று மிக நல்லதொரு 

 உரையாடலை நிகழ்த்தி இருக்கிறேன்.. என்பது மட்டும் நிச்சயம்.. 

 நாவல் ஆசிரியர் கரன்கார்க்கி

மற்றும் பல பின்னோட்டங்கள் comments பகுதியில்...

 

ஜாதி, மதப் போதை ஒழிப்பு நாள்…- முனைவர் வா.நேரு

 ஜூன் 26 என்பது “உலகப் போதை ஒழிப்பு தினம்” மற்றும் “சட்டவிரோதக் கடத்தல் தடுப்புத் தினம்” ஆகும். போதைக்குள் மாட்டிக்கொண்ட மனிதர்களால், அவர்களின் குடும்பம் படும்பாடு சொல்லி மாளாது. இந்தக் கடத்தலைச் செய்பவர்களும் மனிதர்கள் என்று அழைக்கப்படுபவர்கள்தாம். உழைக்கும் கூட்டம் ஒரு பக்கம் இருப்பதைப் போலவே உழைக்காமல் உண்ண வேண்டும் என்று எண்ணுகிற ஒரு கூட்டமும் இந்த உலகத்தில் இருந்து கொண்டே தான் இருக்கிறது.அந்த மனச்சாட்சி அற்ற கூட்டம்தான் பெண்களையும் குழந்தைகளையும் கடத்துகிறது.

போதைப்பொருளை உட்கொள்ளும்போது உட்கொள்ளும் மனிதர்களின் அறிவைப் போதை தடுக்கிறது. சிந்தனையின்றி விலங்குகள் போல வேட்டி அவிழத் தெருக்களில் போதைகளில் படுத்துக் கிடக்கும் மனிதர்களைத் தாண்டித்தான் நாம் சென்று கொண்டிருக்கிறோம். எனவே, போதைப் பொருட்களின் கெடுதலை மக்கள் மத்தியில் பரப்புரை செய்யவேண்டியது மிகவும் தேவையே.

ஆனால், குடிப்பழக்கத்திற்கோ அல்லது கஞ்சா,அபின் போன்ற போதைப் பொருள் பழக்கத்திற்கோ அடிமையாகிற ஒருவனுக்கு அவனுக்குள் ஒரு குற்ற உணர்ச்சி இருக்கிறது. நாம் ஒரு தவறு செய்கிறோம், இதனால் அசிங்கப்படுகிறோம்.பொருளாதார வீழ்ச்சி ஏற்படுகிறது என்பது அவனுக்குப் புரிகிறது. பழகிவிட்ட இந்தத் தவறினை விட முடியவில்லையே என்னும் ஏக்கம் இந்தப் பழக்கத்திற்கு ஆளாகிவிட்ட பலருக்கு இருக்கிறது. அதிலிருந்து விடுபட வேண்டும் என்று நினைத்தால் கூட வழுக்கு மரத்தில் ஏறுவது போலச் சறுக்கிச் சறுக்கி வாழ்க்கையில் அவர்கள் விழுந்து தோற்பதைப் பார்க்கின்றோம். இது வெளிப்படையாகத் தெரிகிறது. ஆனால் இது மிக நல்லது, இது மனித வாழ்விற்குத் தேவையானது என்று பெரும்பாலான மக்களால் கருதப்படுகிற இன்னொரு கொடுமையான போதை என்பது உலகத்தை அச்சுறுத்திக் கொண்டிருக்கிறது. அது மதப்போதை.

அந்த மதப் போதைக்கு ஆட்பட்ட பெற்றோர்கள் தங்களுடைய குழந்தைகளை இளம் வயதிலேயே சட்டவிரோத ஆள் கடத்தல் போலத் தங்களுடைய மதத்திற்குக் கடத்துகின்ற வேலையை அவர்கள் செய்கின்றார்கள். அப்படிச் செய்வதுதான் தங்களுடைய தலையாய பணி என நினைத்து அதற்காக நிறைய நேரம் செலவழிக்கிறார்கள். அப்படித் தங்கள் மதத்திற்காகத் தங்கள் குழந்தைகளை உருவாக்கும்போது மற்ற மதங்கள் மேல் வெறுப்பு உள்ளவர்களாகவும் அவர்களை மாற்றுகிறார்கள். பெரும்பாலான பெற்றோர்கள் இதை மிகக் கவனமாகச் செய்கிறார்கள். இது தங்கள் கடமை என்று உளமார நினைக்கிறார்கள்.

தோழர்களே, ஜூன் 26 போதை ஒழிப்பு நாள் என்று வருகின்ற பொழுது, இந்த மதப் போதையையும் இணைத்துத்தான் நாம் பார்க்க வேண்டும். குடி போதை போதைப் பொருள் போதை போன்ற போதைகளிலிருந்து குறிப்பிட்ட பயிற்சிகளின் மூலம் விடுபட இயலும். அப்படி விடுபட்டவர்கள் உலகம் முழுவதும் நிறையப் பேர் இருக்கிறார்கள். ஆனால், மதபோதையில் இருந்து விடுபடுவது அவ்வளவு எளிதான காரியம் இல்லை. மதபோதையில் இருக்கும் ஒருவனுக்குத் தன் பக்கத்தில் இருப்பவனைப் பார்த்தால் மனிதன் என்று தோன்றுவதில்லை அடுத்த மதத்தைச் சார்ந்தவன், வேறு கடவுளைக் கும்பிடுகிறவன், தான் கடவுளாக மதிக்கும் விலங்கைச் சாப்பிடுபவன் என்ற அளவில் தான் அவன் மனதுக்குள்ளே ஒரு வெறி உண்டாகிறது. எப்படிப் போதை உட்கொண்டால் மனதிற்குள்ளே ஒரு வெறி ஏற்படுகிறதோ அதைப்போல இந்த மதபோதையும் ஒரு வெறியைத்தான் ஊட்டுகிறது.

எனவேதான் தந்தை பெரியார் அவர்கள், ‘கடவுளை மற; மனிதனை நினை’ என்றார். மனிதனை நினைக்க வேண்டும் என்று சொன்னால் கடவுளை மறக்க வேண்டும். ஆனால், மதங்கள் தொடர்ச்சியாக எப்படிக் குடிகாரனுக்கு அந்தக் குடிக் (மதுக்)கடையைப் பார்த்தால் உடனே அங்கு போய்க் குடிக்க வேண்டும் என்று தோன்றுகிறதோ, கஞ்சா குடிப்பவருக்கு கஞ்சா விற்கும் இடத்தைத் தேடிக் கண்டுபிடித்து, அங்கே போய் வாங்க வேண்டும் என்று தோன்றுகிறதோ, அதைப் போலவே தெருத்தெருவாக, ஊர் ஊராக, நாடு நாடாக, வழிபாட்டுத் தலங்களை ஏற்படுத்தி, அந்தப் போதையில் இருந்து மக்கள் விடுபடாத வண்ணம் தொடர்ச்சியான பரப்புரையைத் தொடர்ச்சியான – ஏதேனும் ஒரு வகையிலான செயல்பாட்டை அவர்களுக்குக் கொடுத்துக் கொண்டே இருக்கிறார்கள். அந்தப் போதையில் இருந்து விடுபட மக்களை அவர்கள் அனுமதிப்பதில்லை. எனவேதான் இந்த நாளை மதப் போதை ஒழிப்பு நாளாகவும் விழிப்புணர்வு ஏற்படுத்தக்கூடிய ஒரு நாளாகவும் நாம் இதை ஆக்க வேண்டும்.

போதை என்று வருகின்ற பொழுது அது வெறுமனே உடலுக்குத் தீங்கிழைக்கின்ற போதை மட்டுமல்ல; மனிதத்திற்குத் தீங்கு விளைவிக்கின்ற, சுற்றுச்சூழலுக்குத் தீங்கு விளைவிக்கின்ற, மனிதர்களுடைய மனதுக்குத் தீங்கு விளைவிக்கின்ற மதப் போதையைப் பற்றியும் நாம் பேச வேண்டும். மதபோதை என்பது வெறுமனே கடவுள் போதையாக மட்டும் அமைவதில்லை, அது ஹிந்து மதத்தைப் பொறுத்த அளவில் ஜாதிப் போதையாகவும் அமைகிறது. பெற்ற மகனையும், மகளையும் கூட ஆணவக் கொலை செய்யத் தூண்டும் அளவுக்கு அந்த ஜாதி வெறி என்பது அவர்களை ஆட்படுத்துகிறது.. அப்படிப்பட்ட நிலையில் ஜாதிப் போதை ஒழிப்பு நாளாகவும், மதப் போதை ஒழிப்பு நாளாகவும் ஜூன் 26 என்பதைக் கடைப்பிடிக்க வேண்டும்.

“மதம் என்கிறது, மேல் நாட்டுக்காரன் சொன்னான் அபினி என்று.அறிவைக் கெடுக்கும்படியான ஒரு போதை வஸ்து என்று.அதற்கேற்றாற்போல் நம் நாட்டிலே மதம் மனிதனுடைய அறிவைத் தடை பண்ணுகிறது; வளர்ச்சியைத் தடை பண்ணுகிறது; சிந்தனையைத் தடை பண்ணுகிறது. அதன்படிக்கு நடந்தால்தான் நன்மை, நடக்காவிட்டால் தீமை என்று ஒரு அநாவசியமான பயத்தை முன்னேற்றத்தைத் தடை பண்ணுகிறான்.” என்றார் தந்தை பெரியார்.

ஆம், உண்மைதான்! மதம் என்பது கண்ணுக்குத் தெரியாத, பலரின் மூளைக்கு எட்டாத போதை. அந்தப் போதையால் அல்லல்படும் இந்த உலகம் இருக்குமா? அல்லது மூன்றாவது உலகப்போர் வந்து உலகமே அழிந்து விடுமா? என்னும் கேள்வி தொக்கி நிற்கிறது. இன்றைய இஸ்ரேல்-பாலஸ்தீனப்போருக்கான அடிப்படைக் காரணம் மதமே. உலகம் முழுவதும் எனது மதம்தான் சிறந்தது என்னும் மனப்பான்மை கொண்ட வலதுசாரி மனிதர்கள் உலக அமைதிக்கு மிகப்பெரிய அச்சுறுத்தலாக மாறி இருக்கிறார்கள். தங்கள் மூளைக்குள் ஏற்றிக்கொண்ட மதபோதை மூலம் மற்ற மனிதர்களை அச்சுறுத்துகிறார்கள்.

ஜூன் 26 அன்று இந்த மதபோதை, ஜாதிப் போதையைப் பற்றி நாம் ஊடகங்களில் விழிப்புணர்வுப் பதிவுகளை இடுவோம். டுவிட்டர் போன்ற தளங்களில் மதபோதை ஒழிப்போம், ஜாதி போதை ஒழிப்போம் என்னும் # டேக்குகளை இடுவோம். இன்றைய அறிவியல் உலகம் புதிய புதிய கண்டுபிடிப்புகளால் கடவுளைக் காணாமல் ஆக்கிக் கொண்டிருக்கிறது. ஆனால், அந்தக் கடவுள் பெயரைச் சொல்லிப் பயன் அனுபவிப்பவர்கள். மதத்தால் பலன் அனுபவிப்பவர்கள், ஜாதியால் பலன் அனுபவிப்பவர்கள், எப்படிப் போதைப்பொருள் விற்பவர்கள் இது மனிதர்களுக்குக் கேடு விளைவிக்கிறது எனத் தெரிந்தாலும் தங்கள் சுயநலத்திற்காக விற்பனை செய்கிறார்களோ அப்படிக்கடவுளை மதத்தை,ஜாதியை விற்பனை செய்கிறார்கள். நாம் அவர்களை அம்பலப்படுத்தவேண்டும். மதத்திலிருந்து விடுபட்டவர்கள் பலர் தங்கள் கருத்தை இணையதளங்களில் பதிவிடுகிறார்கள்.எக்ஸ் முஸ்லிம்,(ex-muslims), முன்பு கிறித்துவர்கள் (former-christian-reveal-turning-points), மேனாள் ஹிந்து இந்நாள் நாத்திகர்கள் (exhinduatheists.org) போன்ற இணையதளங்கள், எப்படித் தாங்கள் மதபோதையிலிருந்து வெளியில் வந்தோம் என்ற முந்தைய மதவாதிகளின் வாக்குமூலங்களை அளிக்கின்றன. அதனைப் படிப்போம், பரப்புவோம். ஜாதி,மதபோதைக்கு எதிரான விழிப்புணர்வை ஏற்படுத்துவோம். அதற்கான நாளாகவும் ஜூன்-26ஆம்

தேதியை நாம் கடைப்பிடிப்போம்; பயன் விளைவிப்போம்.

நன்றி : உண்மை மாதம் இருமுறை இதழ் ஜூன் 16-30,2024

ஆண்கள் போட்ட அடித்தளமோ?...

 

     ஆண்கள் போட்ட அடித்தளமோ?

 

கணவர்களின்

சுடுசொற்கள்தான்

பெரும்பாலும்

மனைவிகளை

தீக்குள் உடலைவிட்டு

உயிரை விடச்செய்கிறது…

 

இராமாயணத்தில்கூட

இராமனின் சுடுசொற்கள்

வாசிக்கும்போதே

நம்மைச்சுடுகிறது…

அபலை சீதையின்மேல்

அனுதாபம் வரச்செய்கிறது…

 

தீக்குள் உடலைவிட்டு’

திரும்பி பத்திரமாய்

சீதை வந்ததாய்

இதிகாசக் கதை சொல்லும்!

எதார்த்தத்தில் எவர்

வருவார் திரும்பி?

 

கடவுளைக் கடவுள்

திட்டுகிறது…

இறங்கச்சொல்கிறது…

இதைப் பற்றி

உனக்கு என்ன கவலை?

உங்கள் கேள்வி புரிகிறது…

 

ஆனால்

ஆண்கடவுள்

அப்படித்திட்டியதை…

தீக்குள் இறங்கச்சொன்னதை…

மறுக்காமல் பெண்கடவுள்

செய்த செய்கை

ஏனோ எனக்கு

எதார்த்தமாகத் தெரியவில்லை…

 

பெண் கடவுளே !

மறுப்பு ஏதும் சொல்லவில்லை…

எதிர்த்துக் கேள்வி

ஏதும் கேட்கவில்லை…

சாதாரண மனுசி நீ..

அடங்கிப் போ என்னும்

ஆதிக்கத் திமிருக்காக

ஆண்கள் போட்ட

அடித்தளமோ என

எண்ணத்தோன்றுகிறது எனக்கு…

உங்களுக்கு ?....

 

                      வா.நேரு

                      12-06-2024

 

 

எஸ்.ராமகிருஷ்ணன் அவர்கள் எழுதிய 'எழுத்தே வாழ்க்கை ' என்னும் நூலைப் பற்றிய மதிப்புரை..

 எழுத்தாளர் எஸ்.ராமகிருஷ்ணன் அவர்கள் எழுதிய 'எழுத்தே வாழ்க்கை ' என்னும் நூலைப் பற்றிய மதிப்புரையை 'வாருங்கள் படிப்போம் 'குழுவில் வழங்குவதற்கான வாய்ப்புக் கிடைத்தது.எனக்கும் நிறைவான உரையாக அமைந்த உரை இந்த உரை.கேட்டு விட்டுத் தங்கள் கருத்துகளை பின்னோட்டமாகப் பதிவிட்ட  தோழமைகளின் கருத்துகள் கீழே. நிகழ்வின் யூ டியூட் இணைப்பைக் கொடுத்துள்ளேன்.வாய்ப்பு இருப்பவர்கள் கேட்டுப்பாருங்கள். நன்றி.

https://www.youtube.com/live/p7egdyU4ecc?si=YgSts25fCX7nmlpE

தோழர் மனம் நிறைந்த வாழ்த்துகள். பல நிகழ்வுகள் புதிதாய் கேட்க பயன்படும். ஒருசில மட்டுமே கேட்டு கற்க பயன்படும். அவற்றில் உங்கள் திறனாய்வு முதன்மையானது. சதாப்தி ரயில் மாதிரி தடையில்லாமல் பயணித்தீர்கள். பல நிகழ்வுகள் என்னோடு ஒன்றியிருந்தது. பழைய புத்தகக்கடை அவற்றில் ஒன்று. நான் திருவல்லிக்கேணியில் எட்டு வருடங்கள் தங்கியிருந்தேன். புத்தகப் புழுவாக இருந்தவனை சிந்திக்க வைத்ததில் இந்த பழைய புத்தகக்கடைக்கு உண்டு. அவ்வளவு பழைய புத்தகக்கடைகளை நீங்கள் எங்கும் பார்க்க முடியாது. அக்காலத்தில் கையில் ஒரு ஐம்பது ரூபாய் இருந்தால் விலை மதிக்க முடியாத புத்தகங்களை சுலபமாக வாங்கலாம். உலக அறிவே அங்கு தெருவில் கொட்டிக் கிடக்கும். தொலைபேசி துறை பற்றி பேசினீர்கள். ஒரு டிரக் கால் போட்டு, அதை இரு தெரு தாண்டி பேசி.... இரவு பகல் பாராமல் எவ்வளவு தொழிலாளர்கள்.... எவ்வளவு உழைப்பு. வசதியை ஏற்படுத்த அரசுத்துறை. வசதி வந்த பிறகு லாபம் ஈட்ட தனியார் துறை.திரு விட்டல்ராவின் வாழ்வின் உன்னதம் மீண்டும் தொலைதொடர்பு துறை வந்தது போலிருந்தது. நயாகரா நீர் வீழ்ச்சியை அமெரிக்கா மற்றும் கனடாவில் இருந்த ரசித்த விதம் அருமை. புத்தகங்கள் படிப்பதின் பயனை, வீட்டிற்கு ஒரு நூலகம் என்ற முனைப்பும், அதனை 80 வயது மூதாட்டி அம்மையாரின் துணையுடன் சொன்ன விதம் அருமை. பழைய புத்தக வியாபாரின் நேர்மை மனதை தொட்டது. மீண்டும் காத்திருக்கிறோம் உங்கள் திறனாய்வில் கற்க.

எழுத்தாளர் கோபி.சேகர்..

--------------------------------------------------------------------------------------------------------------------------

இப்போதுதான் யூடியூபில் பார்த்தேன். 

எழுதுபவர்களுக்கும், புதிதாக எழுத வருபவர்களுக்கும் நிறைய தகவல்களை கொடுத்துக்கொண்டே போகிறார் அண்ணன் நேரு அவர்கள்.

இரவு பதீனோரு மணிக்கு எழுதுவது, அதிகாலை 4-6 எழுதுவது, அதை தினந்தோரும் கடைபிடிப்பது என்பன பயனுள்ள தகவல்கள்.

எழுதும் முறை பற்றி பேசும்போது ஒளிவண்ணன் அவர்களின் பேச்சுப் பதிவு முறையை குறிப்பிட்டது புதிதாகவும் ஆர்வமூட்டுவதாகவும் இருந்தது.

இன்னும் பலர் காகிதத்தில் எழுதி வருவதை குறிப்பிட்டார்.

நான் பல காலமாக லேப்டாபில்தான் எழுதி வருகிறேன் என்பதை நான் நினைத்துப் பார்த்துக்கொண்டேன்.

நல்ல, சரளமான, அலுப்பூட்டாத திறனாய்வு. 

அண்ணன் நேரு அவர்களுக்கு வாழ்த்துக்கள்!

ம.தோல்காப்பியன்.

---------------------------------------------------------------------------------------------------------------------------

மிகக் குறுகிய ஒருநாள் இடைவெளியில் சிறப்பான திறனாய்வு..எஸ் ராவின் இலக்கிய வாழ்க்கை குறிப்பாக ஒரு நாளைக்கு 6 மணி நேரம் எழுதுவது,வரும் அத்தனை கேள்விகளுக்கும்,அவர் பதில் அளிப்பது என அவரைப் பற்றிப் பல தகவல்களை அறிந்து கொள்ள முடிந்தது.வீட்டுக்கொரு நூலகம் முன்னெடுப்பைப் பற்றி அவைநாயகன் அவர்களும் ஒளி வண்ணன் அவர்களும் பேசியது அவசியம் தேவையான ஒன்று...மொத்தத்தில் சிறப்பான நிகழ்வை அளித்த நேரு அண்ணாவிற்கும்,பங்கேற்ற தோழமைகளுக்கும் நன்றி!!

பேரா.உமா மகேஸ்வரி

---------------------------------------------------------------------------------------------------------------------------

மிகவும் அருமையான ,

தகவல்கள் பொதிந்த 

திறனாய்வு. 

எப்போதும் ஆசைபட்டதுண்டு: 

அடுத்த பிறவி என ஒன்றிருந்தால் 

எஸ்.ரா வின் ஜோல்னா பையாக பிறக்க வேண்டும் என. 

சிறப்பான திறனாய்வு எனவும் சொல்லலாம் . 

இளைய சமுதாயத்திற்குத் தேவையான 

பாட உரை எனவும் சொல்லலாம். 

வாழ்த்துகளும் 

வணக்கங்களும் .

-கலா கோபி.

----------------------------------------------------------------------------------------------------------------------------

நேற்றைய நிகழ்வு.. ஒரு திறனாய்வு போல் இல்லாமல்... வாசிப்பு..

புத்தக வாசிப்பை பிள்ளைகளிடம் எப்படி கடத்துவது,

எழுதுவதற்கான நேரம் ஒதுக்குதல்.. 

இப்படி சுய பரீட்சை செய்து பார்த்த நிகழ்வாக இருந்தது..

அதிலும்.. குறைந்த நேரத்தில் தயார் செய்வதில் அழுத்தம் 

அதிகமாக இருக்கும்..

எத்தனை அழுத்தம் இருந்தாலும்..

தன் வாசிப்பை, தன் திறனாய்வின் வழியே அழுத்தமாய் சொன்ன 

நேரு சார் க்கு.. மனதினிய வாழ்த்துகள்...

எழுத்தாளர் வினோத் பரமானந்தன்

----------------------------------------------------------------------------------------------------------------------------

அருமை நேரு சார். வாசிப்பையும் எழுத்தையும் நேசிக்கும் ஒருவரைப் பற்றி சுவையாக எடுத்துரைத்தீர்கள்.  வகுப்பரையில் அமர்ந்து பேராசிரியரின் உரை கேட்பது போல் இருந்தது.

ரெஜினா சந்திரா...

----------------------------------------------------------------------------------------------------------------------------

என்னால் முழுமையாக ஜூம் இணைப்பில் கேட்க முடியவில்லை. யூடியூபில் தான் பார்த்தேன். ஒரு புத்தகம் வெளியிட அதன் பின்னால் எத்தனை பேரின் உழைப்பு திறன் இருக்கிறது. ஆனால் அது எத்தனை பேரால் வாசிக்கப் படுகிறது என்பதை நினைத்தால் வருத்தம் தான் வருகிறது.‌எஸ் ரா அவர்களின் சிறந்த நூல் என்றே சொல்லலாம்.

பாராட்டுக்கள் நேரு அண்ணா.

நூலகர் சுசிலா

-----------------------------------------------------------------------------------------------------------------------------

முழுமையாக உரையை கேட்டு மகிழ்ந்தேன். ஒரு நிமிடம் கூட சேதம் செய்யவில்லை. எழுத வேண்டும் என நினைப்பவர்களுக்கு அருமையான திறனாய்வு. நேரு ஐயா அவர்களின் பேச்சு மிகவும் தெளிவாகவும், எளியவர்கள் புரியும் வண்ணம் இருந்தது. எனக்கு இந்த திறனாய்வில் என்னை மாற்றி கொள்ள நினைப்பது பேப்பர் மற்றும் பேனாவில் எழுதுவதை தவிர்த்து கணினியை நேரடியாக பயன்படுத்தினால் சிறப்பாக இருக்கும் எனக்கு தோன்றியது. வாசிக்கும் பழக்கம் நிச்சயமாக வேண்டும் என்பதும் அதே போல் தொடர்ந்து எழுத வேண்டும் என்பது. நிகழ்ச்சி அருமை. நன்றி குழுவினருக்கு.

Dr.V.Mohanraj.,Ph.D.

----------------------------------------------------------------------------------------------------------------------------

நிகழ்வில் கலந்து கொண்டு நிகழ்விலேயே கருத்து தெரிவித்த அண்ணன் கோ​.ஒளிவண்ணன்​, அண்ணன் ​லோ. குமரன்​,அய்யா புலவர்  நா​நா ஆறுமுகம்​ உள்ளிட்ட அனைத்து தோழமைகளுக்கும் நன்றி. மறுநாள் காலை ​தொலைபேசியில் அழைத்துப்பாராட்டிய அய்யா  நட்புத்தமிழ் வட்டம் மகாலிங்கம் அவர்களுக்கும் நன்றி.

இறப்பிற்குப் பின்பும் உரையாட…- முனைவர் வா.நேரு

 

டாக்டர் கலைஞர் அவர்களின் நூற்றாண்டு, 2024, ஜூன் 3ஆம் தேதி நிறைவடைகிறது. மதுரையில் இருக்கும் கலைஞர் நூற்றாண்டு நூலகத்தின் கலைஞர் அரங்கத்தில், டாக்டர் கலைஞர் அவர்கள் உயிரோடு அமர்ந்து இருப்பது போல் ‘விர்ச்சுவல் ரியாலிட்டி’ அமைப்பு இருக்கிறது. நாம் அவருக்கு எதிரே அமர்ந்து கையை ஆட்டிச் சொன்னால், அவரும் நாமும் உரையாடுவது போல இருக்கிறது. புதிய தொழில் நுட்பம் இதற்கு வழி வகுத்திருக்கிறது. இது நமக்கு மகிழ்ச்சியை அளிக்கிறது. கலைஞர் நூற்றாண்டு நூலகத்திற்குள் வரும் பலரும் இப்படி டாக்டர் கலைஞர் அவர்களுக்கு எதிரே அமர்ந்து அவரோடு உரையாடுவது போன்ற மகிழ்ச்சியைப் பெறுகிறார்கள். நிழற்படங்களை எடுத்துக்கொள்கிறார்கள்.

இங்கு டாக்டர் கலைஞர் அவர்களும், பேரறிஞர் அண்ணாவும், தந்தை பெரியாரும்,ஆசிரியர் கி.வீரமணி அவர்களும் மற்றும் திராவிடர் இயக்கத்துத் தலைவர்களும் எழுதிய நூல்கள் எல்லாம் அடுக்கி வைக்கப்பட்டிருக்கின்றன. நூலகத்திற்கு வரும் ஒருவர் டாக்டர் கலைஞர் அவர்களின் ‘நெஞ்சுக்கு நீதி’ தொகுப்புகளைப் படித்து அவரின் வாழ்க்கையை, அவரின் போராட்டத்தை – இலக்கிய ஈடுபாட்டை அறிந்து கொள்ளமுடியும்.

இதற்கு மாற்றாக 7ஆம் வகுப்பு படிக்கும் ஒரு மாணவன் கலைஞர் நூற்றாண்டு நூலகத்திற்கு வருகின்றான். டாக்டர் கலைஞர் அவர்களுக்கு எதிராக அமர்கின்றான். ‘தாத்தா, நீங்கள் எந்த வயதில் இந்தி எதிர்ப்புப் போராட்டத்திற்கு வந்தீர்கள்? எந்த வயதில் ‘கையெழுத்துப் பிரதி’ பத்திரிகையை ஆரம்பித்தீர்கள்?’ என்று கேள்வி கேட்கின்றான். உடனே கலைஞர் அவருக்கே உரித்தான அவரது கரகரத்த குரலில் ‘உன் வயதில்தானடா தம்பி நான், ‘கையெழுத்துப்பிரதி’யை ஆரம்பித்தேன்.அதற்கு அடுத்த ஆண்டு இந்தி எதிர்ப்புப் போராட்டத்திலே கலந்து கொண்டேன்’ என்று தனது மாணவர் பருவத்து நினைவுகளை – போராட்டவுணர்வை எதிரே உட்கார்ந்து இருக்கும் மாணவனுக்கு விளக்கினால் எப்படி இருக்கும்? இது சாத்தியமா என்றால் இந்தச் செயற்கை நுண்ணறிவு உலகத்தில் சாத்தியம்தான்.

நான் எனது மகனை அழைக்கிறேன்.தம்பி எனது வாழ்க்கையை நான் செயற்கை நுண்ணறிவில் பதிந்து கொள்ள விரும்புகிறேன் என்றால் அதற்கான தளம் ஒன்று இருக்கிறது.அதில் பணம் கட்டிப் பதிந்து கொள்ளவேண்டும்.எனது நினைவுகளை எல்லாம் அதில் பதியலாம்.படங்களாக,வீடியோக்களாக என அனைத்து வடிவங்களிலும் பதிந்து கொள்ளலாம். ஒரு 50 ஆண்டுகளுக்குப் பின் நான்இல்லாத காலத்திலும், இருப் பதைப் போல கேட்பவர்கள் எல்லோருக்கும் நான் பதில் சொல்லலாம்.சிரிக்கலாம். அழுகலாம். சிந்திக்க வைக்கலாம்.கேட்பவரை எதிர்க் கேள்வி கேட்கலாம்.அதாவது இறந்தபின்னும் உயிரோடு இருப்பது போலவே சொற்களால், உரையாடல்களால் அளவளாவலாம்.

இதற்குச் செயற்கை நுண்ணறிவின் மூலம் இயங்கும் சாட்போட்கள் உதவுகின்றன. முதன் முதலில் இப்படிப்பட்ட செயற்கை நுண்ணறிவு சாட்போட்டை அமைத்தவர் அமெரிக்காவின் கலிபோர்னியா- ஆக்லாந்தைச் சேர்ந்த ஜேம்ஸ் விலாஹோஸின் என்பவர். அவர் உருவாக்கிய செயற்கை நுண்ணறிவு சாட்போட்டிற்குப் பெயர் hereafter.ai. இந்த hereafter.ai என்னும் இணையதளத்திற்குள் சென்று பார்த்தால் ,உங்கள் கதைகளும் குரலும் என்றைக்கும் (Your stories and voice for ever) என்னும் முகப்பு வாசகம் வரவேற்கிறது.

இந்தச் சாட்போட் நம்மிடம் நூற்றுக்கணக்கான கேள்விகளைக் கேட்கிறது. இளமைக்காலம், மறக்க முடியாத நினைவுகள், வாழ்வில் மறக்க இயலாத மனிதர்கள்,நமது சொந்த விசயங்கள் என்று பலவற்றைக் கேள்வி கேட்கிறது. நாம் சொல்லும் பதில்களைப் பதிந்து வைத்துக்கொள்கிறது. நமது நிழற்படங்களை வாங்கி வைத்துக்கொள்கிறது. பின்பு இவற்றை எல்லாம் இணைத்து மற்றவர்கள் கேள்வி கேட்டால் நாம், நமது குரலிலேயே பதில் சொல்வது போல வடிவமைத்துக் கொடுக்கிறது.

“செயற்கையாக மக்களை மீண்டும் உயிர்ப்பிக்கக் கூடிய செயற்கை நுண்ணறிவின் தற்போதைய சாதனைகள் அனைத்துமே நீண்டகாலமாக அறிவியல் புனைகதைகளில் மட்டுமேபேசப்பட்டு வந்தன. ஆனால் ஏஅய் தொழில்
நுட்பத்தின் வளர்ச்சி இப்போது நடைமுறை வாழ்க்கையிலேயே அதைச் சாத்தியமாக்கியுள்ளது.”

2017இல் ஜேம்ஸ் விலாஹோஸினின் தந்தைக்குப் புற்று நோய் ஏற்படுகிறது.விரைவில் அவர் இறந்துவிடுவார் என்று மருத்துவர்கள் கூறிய நிலையில், தனது தந்தையின் குரலை,நினைவுகளை இந்த உலகத்தில் நிரந்தரமாக்க வேண்டும் என்று ஜேம்ஸ் விலாஹோஸின் விரும்புகிறார். அதற்குச் செயற்கை நுண்ணறிவைப் பயன்படுத்துகிறார்.அதில் வெற்றியும் பெறுகிறார்.

“பின்பு 2019ஆம் ஆண்டில் ஜேம்ஸ் விலாஹோஸின் தனது சாட்போட்டை hereafter.ai என்ற செயலியாகவும் அதையே ஒரு தொழிலாகவும் மாற்றினார். இது, மக்கள் தங்கள் அன்புக்குரியவர்கள் இறந்த பின்னும்கூட அவர்களைச் செயற்கை வழியில் பூமியில் தக்கவைக்க உதவுகிறது. .

hereafterai செயலியின் பயனர்கள் தங்கள் அன்புக்குரியவரின் ஒளிப்படங்களைப் பதிவேற்றுவதன் மூலம் அவர்கள் செயலியைப்பயன்படுத்தும்போது அவர்களின் ஸ்மார்ட்போன்அல்லது கணினியின் திரையில் அன்புக்குரிய
வர்களின் முகம் தோன்றும் “ என்று விரிவாகப் பி.பி.சி.தமிழ் இணையதளம் செய்தி வெளியிட்டுள்ளது..

“இதேபோல் மற்றொரு நிறுவனம் மக்களைச் செயற்கை நுண்ணறிவு சாட்போட்களாக மாற்றுகிறது. தென் கொரியாவின் DeepBrain AI ஆனது, ஒரு நபரின் முகம், குரல் மற்றும் பழக்க வழக்கங்களைப் பல மணிநேர வீடியோ மற்றும் ஆடியோவாகப் பதிவு செய்வதன் மூலம் வீடியோ அடிப்படையிலான அவரைப் போன்ற அவதாரை உருவாக்குகிறது” என்றும்” உண்மையான நபரின் உருவத்தோடு 96.5% ஒத்துப்போகும் அளவிற்கான உருவத்தைக் குளோனிங் செய்கிறோம்” என்று அந்த DeepBrain நிறுவனத்தின் தலைமை நிதி அதிகாரி மைக்கேல் ஜங் சொல்வதாகவும் அந்தச் செய்தி குறிப்பிடுகிறது.

இந்தச் சாட்போட்களைப் பயன்படுத்த இப்போது நாம் நிறையப் பணம் செலுத்தவேண்டும். ஆனால், வரும் காலத்தில் இது வெகுவாகக் குறைந்து நிறையப்பேர் பயன்படுத்தும் நிலை வரலாம்.செயற்கை நுண்ணறிவினால் சில புதிய கடவுள்கள் உருவாக்கப்படலாம்; அல்லது ஏற்கனவே சொல்லப்பட்ட புராணங்களை _ கடவுள் கதைகளை உண்மையைப் போல் வடிவமைத்துக் காட்டலாம். ஆனால், அப்படி வடிவமைக்கப்படும்போது, எல்லாக் கடவுள் கதைகளும் தந்தை பெரியார் கற்றுத்தந்த கேள்விகளுக்கு முன்னால் காணாமல் போகும்.புராணக் கதைகள் உயிர்பெற்று வரும்போது நாம் தந்தை பெரியாரும், திராவிடர் இயக்கத் தலைவர்களும், உலகில் உள்ள அத்தனை பகுத்தறிவாளர்களும் கொடுத்த கேள்விகளோடு எதிர்கொள்ளப் பழகலாம். மாணவ- மாணவிகளுக்கு,
இருபால் இளைஞர்களுக்கு அந்தக் கேள்விகளைக் கேட்கும் தன்மையை உருவாக்கலாம்.

புதிய கண்டுபிடிப்பு எப்போதும் இருபுறமும் கூர்மை உள்ள கத்தி. நன்மையைப் போலவே சில தீமைகளும் புதிய கண்டுபிடிப்புகளால் அமைவதுண்டு. அதைப்போல இந்த செயற்கை நுண்ணறிவு. இதற்குப்பின்னால்(hereafter.ai) சாட்போட்களால் ஏற்படப் போகும் தீமைகள் பற்றியும் நிறையப் பேசப்படுகின்றன..மனிதகுலம் அந்தத் தீமைகளை எல்லாம் கடந்து வரும் என்னும் நம்பிக்கை நமக்கு உண்டு.

நன்றி : உண்மை மாதம் இருமுறை இதழ் ஜூன் 1-15,2024

அடுத்தவர் எப்படி எழுதிட இயலும்?..

 

அடுத்தவர் எப்படி எழுதிட இயலும்?..

 

இந்த அறுபது ஆண்டுகளில்

கற்றுக்கொண்டதை…

அனுபவமாய்ப் பெற்றுக்கொண்டதை…

ஏதோ ஒரு இலக்கிய வடிவில்

பதிவிடும் ஆவல் இருக்கிறது..

எனது ஏழு புத்தகங்களில்

இயன்றதைப் பதிந்திருக்கிறேன்

என்றாலும் இன்னும் பதிவிட

வேண்டியவை ஏராளம் இருக்கிறது..

 

பத்தாண்டுகளுக்கு முன்னால்

அய்யா அறிவுக்கரசு சொன்னார்…

‘இன்னும் கொஞ்சம் எழுத

வேண்டியிருக்கிறது…

முடித்துவிட்டால்

வரும் சாவை ஏற்றுக்கொள்ளலாம்’ என்றார்..

சாவைப் பற்றி அவர் அப்போது பேசியது

எனக்குக் கொஞ்சம் அதிர்ச்சியாக இருந்தது..

அவரிடம் ஏன் இப்படி எனக் கேட்டேன்?..

“யார் இருக்கப்போகிறார் இங்கே நிரந்தரமாய்…

போவதற்குள் என்ன செய்யவேண்டும்

என்பதைச்செய்திடல் வேண்டும்” என்றார் அவர்..

எப்போதும் வெட்டு ஒன்று துண்டு இரண்டு

எனும்வகை உரையாடல்தான் அவரிடம்..

முப்பேத்தேழு புத்தகங்களை எழுதிப்

பதிப்பித்து நம்மிடம் கொடுத்துவிட்டு

இந்த வருடம் திடீரென நம்மிடமிருந்து

விடைபெற்றுக்கொண்டார்…

 

உன் எழுத்தை எவர் எழுதிட இயலும்..

எழுது,எழுது என்பார் புதுக்கோட்டை பாலா..

அவரவர் சூழல்..

அவரவர் அனுபவம்…

அவரவர் எண்ணம்…

அவரவர் குடும்பம்…

அவரவர் அறிவு …

அடுத்தவர் எப்படி எழுதிட இயலும்?..

இல்லாதபோது எவர் எழுதுவார்

நம் அனுபவத்தை.…

 

எழுதிடல் வேண்டும் இன்னும் எழுதி

நூல்களைப் பதிப்பித்தல் வேண்டும்..

இன்னும் எளிமையாய் வாழ்ந்திடல் வேண்டும்

முடிந்தளவு மற்றவர்க்கு உதவிட வேண்டும்..

..

91 வயதிலும் அயராது பரப்புரை செய்யும்

அய்யா ஆசிரியர் அடிச்சுவட்டைத்

தொடர்ந்திடல் வேண்டும்…

சாகும்போதும் பெரியார் கொள்கையைப்

பறை சாற்றிச் சாகவேண்டும்…

 

 

                                          வா.நேரு,

                                          31.05.2024