பி.எஸ்.என்.எல்.துணைப்பொதுமேலாளர் திருமதி அருண்மொழி அவர்கள்...

 

மதுரை தொலைத்தொடர்புத் துறையில் துணைப்பொதுமேலாளராகப் பணியாற்றி ஓய்வுபெற்ற திருமதி அருண்மொழி அவர்கள் மதுரையில் இயற்கை எய்தினார்.அவரின் இறுதி நிகழ்வுகள் நேற்று(05.12.2023) காலை மதுரை சிம்மக்கல் பகுதியில் இருக்கும் கொடிக்கால் தெருவிலும் பின்னர் தத்தனேரி சுடுகாட்டிலும் நடந்தது.அவருக்கு தத்துமகன் போல பல உதவிகள் செய்த ,பி.எஸ்.என்.எல். செந்தில்குமார்ராஜூ அவர்கள் இறுதிச்சடங்குகள் செய்தார்.பெங்களூரிலிருந்து திரு.பாலகுமார் JTO, துணைப்பொதுமேலாளர்(ஓய்வு) திருமதி இன்பஜோதி இந்திரகுமாரி,தொழிற்சங்கவாதி அண்ணன் செளந்தர்,திருமதி ரமா முத்துக்குமார், அவரின் கணவர்,திரு முருகேசன் AO(Rtd),திருமதி சாரதா ரமேஷ்,கஸ்டமர் சர்வீஸ் திரு.சரவணன்,திருமதி சுப்புலெட்சுமி மேடம் SDE Rtd,அவரின் கணவர்,அவரின் மகள்,மேடம் அருண்மொழியிடம்  பணியாற்றிவிட்டு பெங்களூர் மாற்றலாகிச்சென்ற வித்யா மேடம்  என்று  பலர்,தொலைத்தொடர்பு துறையைச்சார்ந்தவர்கள் இறுதி நிகழ்வில் கலந்துகொண்டனர்.

சோதனைகள் நிகழும்போது தனது வாழ்க்கையை எப்படி அழகாக்கிக் கொள்வது,அர்த்தமாக்கிக் கொள்வது என்பதற்கு மிகப்பெரிய படிப்பினையாகத் திகழ்ந்தவர் அருண்மொழி அவர்கள். பணியில் மிக நேர்மையானவர், மிகக் கண்டிப்பான அதிகாரி அவர்.அவருடைய பணிக்காலத்தில், நான் தொழிற்சங்கவாதி என்ற நிலையில் சில நேரங்களில் அவரோடு வாக்குவாதம் எல்லாம் ஏற்பட்டதுண்டு.ஆனால் பணி செம்மையாக நடக்கவேண்டும் என்பதில் அளவற்ற ஆர்வம் உள்ளவர்.அலுவலகத்திற்கு வெளியே ஒரு சகதோழர் போல நடந்து கொள்பவர்.

 நேற்று அவரின் இறுதி நிகழ்வில் கலந்து கொண்ட தொலைத்தொடர்பு துணைக்கோட்ட அதிகாரியாக இருந்து ஓய்வுபெற்ற திருமதி சுப்புலெட்சுமி அவர்கள் அவரின் நீண்டகாலத் தோழி.1973-லிருந்து இருவரும் நண்பர்கள் என்றார்."பழகிய ஒவ்வொருவரின் வாழ்க்கையிலும் ,அவர்களின் வாழ்க்கையின் மேம்பாட்டுக்கு ஏதோ ஒருவகையில் அருண்மொழி  உதவி இருக்கிறார்"  என்றார் அவர். அருண்மொழி மேடம் அவர்கள் தொலைத்தொடர்புத் துறையில் தொலைபேசி ஆப்ரேட்டாராக இலக்காகவில் நுழைந்தவர். பின்பு ஜெ.இ.ஏ.இ. எனத் தொடர்ந்து பதவி உயர்வு பெற்று துறைக்காக உழைத்தவர்.

1995-2000 கால கட்டங்களில் ஏ.இ. கணிப்பொறியாக இருந்தார்.கணினி வந்த புதிது. நிறையப் பேருக்கு கணினி பற்றித்தெரியாது. திண்டுக்கல்,தேனி ,மதுரை மாவட்டம் சேர்ந்த பகுதி மதுரை தொலைத் தொடர்பு மாவட்டம்.அதில் ஒவ்வொரு ஊரிலும் கணினி இன்ஸ்டால்,பராமரிப்பு எனப் பலவேலைகளை ,ஒரு குழுவை அமைத்துக்கொண்டு செய்தவர் திருமதி அருண்மொழி அவர்கள்.சாப்பாடு பற்றியெல்லாம் கவலைப்படாமல் மணிக்கணக்காக வேலை செய்தவர்.கணினி பற்றிக் கற்றுக்கொண்டே இருந்தார்.மற்றவர்கள் கற்றுக்கொள்ளவும் வழிகாட்டினார். .உண்மையிலேயே மதுரைத் தொலைதொடர்பு மாவட்டத்தின் மேம்பாட்டில் அவர் பணி அளப்பரியது.

அவருடைய கல்விப்பணி பற்றி ,அண்மையில் நான் வெளியிட்ட ‘கனவு போலத்தான் நடந்தது' நூலில் உள்ள பகுதி கீழே உள்ளது.அப்படியே அதனை இணைத்துள்ளேன்.

“கல்விக்காக நாம் கொடுக்கும் நன்கொடை நம் உள்ளத்தை மகிழ்ச்செய்வது மட்டுமல்ல,எத்தனையோ பேருக்கு வாழ்வளிப்பது.இந்த நேரத்தில் மதுரை தொலைபேசி நிலையத்தில் கோட்டப்பொறியாளராக வேலைபார்த்த திருமதி அருண்மொழி அவர்கள் நினைவுக்கு வருகிறார்.இன்றும் மதுரையில் வாழும் ( நினவில் வாழும்) அவர் எனது வாழ்க்கையில் பெரும் மதிப்பிற்குரியவர்.

வாழ்க்கையில் மிகப்பெரிய இழப்பு அவருடைய நடுத்தர வயதில் ஏற்பட்டது.அவரது  ஒரே மகள் சியாமளா ஒன்பதாம் வகுப்பு படிக்கும்போது விபத்தில் மறைந்துவிட்டார்.கணவர் இல்லாத நிலையில் மகளே தன் வாழ்க்கை என்று இருந்தவரின் வாழ்க்கையில் அடித்த புயல் மிகப்பெரிய துயரம்.

.மதுரையில் காந்தி நினைவு நிதியால் நடத்தப்படும் சேவாலயம் என்னும் விடுதி மதுரை இராஜாஜி மருத்துவமனை அருகில் உள்ளது.அதில் படிக்கும் பெரும்பாலான மாணவர்கள் அண்ணா பேருந்து நிலையம் அருகில் உள்ள இளங்கோ மாநகராட்சி மேல்நிலைப்பள்ளியில் படிப்பவர்கள்.மேலூர் போன்ற கிராமங்களில் இருந்து விடுதியில் தங்கிப் படிக்கும் மாணவர்கள்.தான் வாங்கும் சம்பளப்பணத்தை எல்லம் செலவழித்து,அந்த சேவாலயம் விடுதியில் இருக்கும் மாணவர்களுக்கு தனிப்பயிற்சி(tuition)கொடுக்க ஆரம்பித்தார்.படித்த,கற்பிப்பதில் ஆர்வம் இருக்கும் இருபால் பட்டதாரிகளை அழைத்து பாடம் எடுக்கச்செய்தார்.அவரும் பாடம் எடுத்தார்.உடன் வேலை பார்க்கும் மற்றவர்களையும் வந்து இலவசமாக பாடம் எடுக்கத்தூண்டினார்.

 

அவருடைய தூண்டுதலின் பேரில் மதுரை தொலைபேசி நிலையத்தில் வேலை பார்க்கும் பலர் அங்கு போய் டியூசன் எடுத்தனர். நானும் கூட சில மாதங்கள் எடுத்தேன்.வெள்ளேந்தியான மாணவர்கள்.கல்வியினால் என்ன கிடைக்கும் என்னும் தொலை நோக்கு இல்லாத மாணவர்கள்.ஆனால் அவர்களுக்கு கண்டிப்புடன் கூடிய கல்வி கிடைப்பதற்கு தன்னுடைய பணத்தை,நேரத்தை எல்லாம் செலவழித்தார்.

 

என்னுடன் வேலை பார்த்த எழுத்தாளர் பி.எஸ்.என்.எல். அதிகாரி பாலகுமார் விஜயராகவன்,செந்தில் போன்றவர்களை எல்லாம் இணைத்து தன்னுடைய ஓய்வுக்குப் பிறகு 2014-ல் ஒரு அறக்கட்டளையை ஆரம்பித்தார்.அவருடைய மகள் சியாமளா அறக்கட்டளை என்னும் பெயரில் மதுரையில் இருக்கும் அந்த அறக்கட்டளை பொறியியல்,மருத்துவம் படிக்கும் பல மாணவ,மாணவிகளுக்கு 2014-ஆம் ஆண்டு முதல் உதவித்தொகையை வழங்கி வருகின்றது.

நான் மதுரை தல்லாகுளம் தொலைபேசி நிலையத்தில் வேலைபார்த்தபோது,2010-ல் சேவாலயம் விடுதியில் இருந்து சில மாணவர்கள் அருண்மொழி மேடத்தைப் பார்க்க வந்தார்கள். என்னோடு லிப்டில் வந்த அந்த மாணவக் குழந்தைகள் அம்மாவைப் பார்க்க வேண்டும்,அம்மா எங்கு இருப்பார்கள் என்றெல்லாம் கேட்டபோது,எனது கண்களில் நீர் வந்தது. ஒரு குழந்தையை அவர்கள் பறிகொடுத்தார்கள். ஆனால் நூற்றுக்கணக்கான குழந்தைகள் அம்மா,அம்மா என்று அன்பொழுக அழைக்கும் வாய்ப்பை,தான் ஏற்படுத்திக்கொடுத்த கல்வி வாய்ப்பால் பெற்றார்கள்.கல்வி கொடுப்பவர்கள் எவ்வளவு மதிக்கப்படுகிறார்கள்,போற்றப்படுகிறார்கள் என்பதை நாம் கண் கூடாகப் பார்த்துக்கொண்டிருக்கிறோம்.எனது தலைமை ஆசிரியர் திரு.வி.வீரி(செட்டி) சார் அவர்களிடம் லிப்டில் நான் அந்த மாணவர்களைச்சந்தித்தையும் ,எங்கள் பி.எஸ்.என்.எல்.நிறுவனத்தில் வேலைபார்த்த மேடம் அருண்மொழி அவர்களைப் பற்றியும் அவரின் கல்விப்பணிகளைப் பற்றிச்சொன்னதும் அவ்வளவு மகிழ்ச்சி அடைந்தார்”

திருமதி அருண்மொழி அவர்களின் கல்விப்பணிக்கும் ,தொலைத்தொடர்புப் பணிக்கும் நன்றியும் வணக்கமும். அவரது புகழ் ஓங்கட்டும்.

                                                   வா.நேரு,

                                                    (06.12.2023)

இந்தப் பதிவைப் பார்த்துவிட்டு,எங்களோடு மதுரை பொதுமேலாளர் அலுவலகத்தில் வேலை பார்த்த திருமதி.ரமா முத்துக்குமார் அவர்கள் ஒரு பதிவினை எனக்கு அனுப்பி இருந்தார். அந்தப் பதிவையும் இத்தோடு இணைத்துள்ளேன்.

Sir, நான் ரமா முத்துக்குமார். 

நான் BSNL BASHEER GROUP இல் நீங்கள் போட்டிருந்தது படித்தேன். 

மேடத்தை பற்றிய எல்லா விஷயங்களும் எழுதியிருந்தீர்கள். ரொம்ப சந்தோசமாக இருந்தது. ஆனால் படிக்க படிக்க கண்ணீர் நிற்காமல் வந்தது. 

நான் சென்னையிலிருந்து 1991 இல் நம் GM ஆபீஸுக்கு  operator cadre இல் இருந்து clerk ஆக  planning section இல் join பண்ணினேன். அப்போது அருண்மொழி மேடம் urban planning இல் JTO வாக இருந்தார்கள். அப்போது ஆரம்பித்த எங்கள் நட்பு இன்று வரை நிலத்து நிற்கிறது. இனிமேலும்  நினைவுகளில் அது தொடர்ந்து நிலத்து நீடிக்கும்.

Officer  , clerk என்ற பேதம்  எல்லாம் அவர்களுக்கு கிடையாது. எல்லோரிடமும் இனிமையாக பழகுவார்கள்.  முழுக்க முழுக்க computer இல் வேலை செய்ய அவர்கள் தான் கற்றுக் கொடுத்தார்கள்.  எந்த நேரத்தில் சந்தேகம் கேட்டாலும் சொல்லி கொடுப்பார்கள்.  அவர்கள் பின்பு SDE computer ஆன பின் நான் work பண்ணிய ஒவ்வொரு  section ம் computer மயமாக மேடம் தான் எல்லாம் செய்து  கொடுத்தார்கள்.

Urban planning : project estimate, tech.spec, work spec. 

TRA:  disconnection and reconection of telephone numbers. 

O& M: computer sation of MIS.

கடைசியாக பென்ஷன் section. :

Pension section ல்  pension calculation computer  ஆக ஆக்க 2010 இல் நாங்கள் அருண்மொழி மேடத்தின் உதவியை கேட்டோம். மேடம் அப்போது DE computer ஆக தல்லாகுளம் அலுவலகத்தில்  இருந்தார்கள். இரண்டு MCA students அனுப்பி 3 மாதங்கள் அவர்களை வைத்து பென்ஷன் calculation package முடித்தோம். அப்புறம் 2011 இல் பென்ஷன் revision வந்தபோது சரண்யா என்ற TTA வை அனுப்பி revision package போட்டுக் கொடுத்தார்கள். அந்த வருடம் 1500 pensioner க்கு மிகக்குறுகிய காலத்தில் revision work முடித்து GM medam and Pensioner association அவர்களிடமிருந்து appreciation letter  நாங்கள் வாங்கினோம்.. இந்த எல்லா விஷயங்களுக்கும் அருண்மொழி மேடம் தான் அடிப்படை காரணம். பென்ஷன் section il இன்று வரை work சுமுகமாக போய் கொண்டு இருக்கிறது

அப்போது GM office இல் நாங்கள் Lunch club ஒன்று form பண்ணினோம். அதில் DGM சந்திரிகா மேடம், அருண்மொழி மேடம்,  பத்மா DE medam, கோமதி, சுசிலா, ரத்தினம், கீதா வைத்தியநாதன், சாரதா ரமேஷ், வட்சலா ,  லக்ஷ்மி AO mam,  சிவகாமி, ஶ்ரீவித்யா, ஞான லக்ஷ்மி, வைகுனலக்ஷ்மி JTO, பானுமதி AO மேடம் என்று cadre difference பார்க்காமல் மதியம் லஞ்ச் சேர்ந்து சாப்பிடுவோம். Arunmozhi mam கடைசியில் AGM ஆக staff section ல் இருந்த போதும் எங்களுடன் லஞ்ச்ககு சேர்ந்து கொள்வார்கள். 

மேடத்தின் பெருமை பற்றி சொல்லி கொண்டே போகலாம்.

மேடத்தின் இறுதி யாத்திரையில் நானும் கடைவரை கலந்து கொண்டேன் Sir.

Sir, நான் எங்கள் group il potta oru கவிதை ஒன்றை உங்களுக்கும் அனுப்புகிறேன் . 

மேடத்தை பற்றிய உங்கள் posting kku மிகவும் நன்றி sir. மிகவும் அருமையாக இருந்தது.

Thank you so much Sir.

 

கணினி பெரியதா? சுயமரியாதை பெரியதா? ....முனைவர் வா.நேரு

 டிசம்பர் 2. சுயமரியாதை நாள்.தமிழர் தலைவர் அய்யா ஆசிரியர் கி.வீரமணி அவர்களின் பிறந்த நாள்.நாமெல்லாம் மகிழ்ச்சியாகக் கொண்டாடும் நாள்.தந்தை பெரியாருக்குப் பின் ,அவரின் இயக்கம் இருக்காது,அவரின் கொள்கைகள் இருக்காது என்று நினைத்தவர்களுக்கு மத்தியில் தந்தை பெரியாருக்குப் பின் அவரின் இயக்கமும் அவரின் கொள்கைகளும் இன்னும் வலிமையாக இருக்கிறது என்பதை நம் பரம்பரை எதிரிகளும் ஒத்துக்கொள்ளும் காலகட்டம் இது.தமிழ்நாட்டின் ‘திராவிட மாடல் ‘ ஆட்சிக்கு மட்டுமல்ல, இந்திய ஒன்றியம் முழுமைக்கும் இன்று தேவைப்படும் தத்துவமான ‘அனைவருக்கும் அனைத்தும் ‘ என்னும் பெரியாரியல் தத்துவத்தை போதிக்கும் பேராசானாக அய்யா ஆசிரியர் கி.வீரமணி அவர்கள் விளங்குகின்றார்.

டிசம்பர் 2-ஆம் நாள் உலகக் கணினி  நாளாகவும் கொண்டாடப்படுகிறது நமது வாழ்க்கையில் ,நமது சமூகத்தில் கணினி வந்த பிறகு ஏற்பட்ட மாற்றங்கள், ,கணினி என்பது நமது  நடைமுறை வாழ்க்கையில் எப்படி தவிர்க்க இயலாத ஒரு பகுதியாக மாறி இருக்கிறது என்பதைப் பற்றியும் நினைக்கும் நாளாக இந்த நாள் கொண்டாடப்படுகிறது.கணினி வருவதற்கு முன்னால் இருந்த நிலைமையையும் இன்றைக்கு கணினி வந்தபின்  நம் வாழ்க்கையில் ஏற்பட்ட மாற்றங்களையும் மிகத்தெளிவாகச்சொல்வதற்கு 2000-ஆண்டுகளுக்குப் பின்னால் பிறந்தவர்களைக் கேட்டால் விடை தெரியாது. 1990-க்கு முன்னால் பணத்தை அனுப்ப தபால் அலுவலங்களில் மணியார்டர் பாரத்தை வாங்கிக்கொண்டு கால்கடுக்க நின்றவர்களையும், நாம் போட்டுவைத்த பணத்தை எடுக்க வங்கிகளில் நாள் கணக்கில் நின்றவர்களையும் கேட்டால்தான் தெரியும்.அதாவது 1990-களில் 20 வயதுக்கு மேற்பட்ட வயதில் இருந்தவர்களைக் கேட்டால் இந்த கணினியுகம் பற்றியும் தெரியும் அதற்கு முன்னால் இருந்த நிலைமையும் தெரியும்.

கணினி யுகத்தைப் பற்றி நினைக்கும்போது எனக்கு ‘ஒரு விரலில் உலகை ஜெயித்தவர் ‘ என்னும் புத்தகம் நினைவுக்கு வருகிறது. ‘செரிப்ரல் பாலிசி ‘ என்ற  நோயால்  பிறந்தது முதல் பாதிக்கப்பட்டு சரியாகப் பேசவும் எழுதவும் வராத ,பிறவிக்குறைபாடு உடைய மாலினி சிப் என்பவர் எழுதிய  ‘தன் வரலாறு ‘ இந்த நூல்

அடுத்தவர்களோடு தொடர்பு கொள்ள வேண்டுமென்றால் பேசவேண்டும் அல்லது எழுத வேண்டும்.எழுதவோ பேசவோ முழுமையாக முடியாத மாலினிசிப்பிற்கு கணினி வரவும்,இணையம்,மின்னஞ்சல் வரவும் மிகப்பெரிய மாற்றத்தைத் தருகிறது.” இமெயில் வசதி என் வாழ்க்கையில் பெரும் புரட்சியையே ஏற்படுத்திவிட்டது எனலாம். அனைவருடனும் என்னால் சுயமாகவே தொடர்பு கொள்ள முடிந்தது “ என்று இமெயில் வசதியைக் கொண்டாடித் தீர்க்கின்றார் மாலினி சிப். முழுமையாகக் கையைப் பயன்படுத்த இயலாத நிலையில்,ஒற்றை விரலை மட்டுமே பயன்படுத்த முடியும் என்னும் நிலையில் “அந்த ஒற்றைச்சிறு விரல் எனது வல்லமையின் பொக்கிஷமாக இருந்தது .சிரமமின்றி இமெயிலை உபயோகித்தேன் “ எனச்சொல்வார். மிகப்பெரிய தன்னம்பிக்கையை தனக்கு அந்த இமெயில் என்னும் கணினியால் ஏற்பட்ட வசதி கொடுத்தது எனக்குறிப்பிடுவார். கணினியால் ஒட்டு மொத்த சமூகத்தில் ஏற்பட்ட மாற்றங்கள்,தனி மனிதர்களின் வாழ்க்கையில் ஏற்பட்ட மாற்றங்கள் என நாம் நீண்ட பட்டியலைக் கொடுத்து மகிழ்ச்சி அடையலாம்.அவ்வளவு மாற்றங்களுக்கு அடிப்படையானது கணினி.எனவே உலகக் கணினி நாள் டிசம்பர் 2- என்று சொல்லும்போது உற்சாகம் மேலிடுகிறது.

அதைப்போலத்தான் சுயமரியாதை நாளும்.தந்தை பெரியார் அவர்கள் 1925-ஆம் ஆண்டு சுயமரியாதை இயக்கத்தை ஆரம்பித்தபின்பு  நம் நாட்டில் நிகழ்ந்த மாற்றங்கள் எண்ணி,எண்ணி மகிழத்தக்கவை.’தருவில் ஆடு நடக்கலாம்,மாடு நடக்கலாம்,பன்றி நடக்கலாம்,ஆனால் ஆறறிவு உள்ள மனிதன் நடக்கக்கூடாதா? “ எனக்கேள்விகேட்டு அவர் ஆற்றிய உரைகள்,அவர் நிகழ்த்திய போராட்டங்கள்,அதன் விளைவாக சமூகத்தில்,தனிமனிதர்கள் வாழ்க்கையில் ஏற்பட்ட நல்ல மாற்றங்கள் என்பதைப் பற்றியெல்லாம் நினைக்கிறபோது நமக்கு உற்சாகம் ஏற்படுகிறது.

தோழர் கண்மணிராஜா அவர்கள் எழுதிய லட்சுமிக்குட்டி கவிதைத் தொகுப்பில் உள்ள ஒரு கவிதை

  “புழுக்கமாய் இருந்தாலும் /    பரவாயில்லை /                பூட்ஸ்-ஐ /               அணிந்துகொள்..! எவ்வளவு நேரமானாலும் /பரவாயில்லை /மேலத்தெரு வழியாகவே / பள்ளிக்குப் போ …! அங்குதான் /காலணி அணிந்ததற்காய் / கட்டி வைத்து அடித்தார்கள் / உன் பாட்டனை “ எனச்சொல்லும்…ஆமாம் கடந்த 70,80 ஆண்டுகளுக்கு முன்னால் ஜாதியின் பெயரால் நடந்த கொடுமைகளை நினைத்துப்பார்த்து இன்றைய மாற்றங்களை ஒப்பிட்டுப் பார்க்கும்போதுதான் திராவிட இயக்கத்தின் சாதனைகள் இன்றைய தலைமுறைக்குப்  புரியும்.கணினிக்கு முந்தைய காலத்தில் இருந்த  நிலைமையை இன்றைய நிலைமையோடு ஒப்பிட்டுப் பார்ப்பதுபோல.

சுயமரியாதை இயக்கமாக இருந்து பின்னர் திராவிடர் கழகமாக மாறிய இந்த இயக்கம் செய்யும் பணிகள் நம்மை இறுமாப்பு அடைய வைக்கிறது. 10 வயதில் மேடையில் ஏறி,சுயமரியாதைக் கருத்துகளை,சாதி ஒழிப்பை,மத ஒழிப்பை,கடவுள் மறுப்பை,புராண இதிகாசப்புரட்டுகளை,பெண்ணுரிமையின் அவசியத்தை உரையாற்ற ஆரம்பித்த நமது தலைவர்,திராவிடர் கழகத்தலைவர் அய்யா ஆசிரியர் கி.வீரமணி அவர்கள்,சுயமரியாதை நாளான டிசம்பர் 2,2023-ல் 91 வயதை எட்டுகிறார்.

தந்தை பெரியார் அவர்கள் தன்னுடைய இறுதிக்காலத்தில் கணினி பற்றிக் கேள்விப்பட்டு அதனை நேரிடையாகச்ச்சென்று பார்த்திருக்கின்றார். ஆனால் அவருக்கு கணினியைப் பயன்படுத்தும் வாய்ப்பு கிட்டவில்லை.1980-களில் பெர்சனல் கம்ப்யூட்டர் என்று சொல்லப்படும் கணினிகள் வருகின்றன.2000க்குப் பிறகுதான் மின்னஞ்சல்,இணையப்பயன்பாடு எல்லாம் வருகின்றது. இன்றைக்கு வாட்சப்,முக நூல்,டுவிட்டர் என்று பலவகையான கணினி,ஆண்டிராய்ட்டு செல்பேசிகளின்  பயன்பாடு என்பது பெரிய அளவில் இருக்கிறது. அய்யா ஆசிரியர் கி.வீரமணி அவர்கள் மின்னஞ்சல் பார்ப்பது,படிப்பது ,அனுப்பவது,கணினியைப் பயன்படுத்துவது,வாட்சப்,முக நூல் ,டுவிட்டர் போன்ற சமூக ஊடகங்களைப் பயன்படுத்துவது என்று கணினி சார்ந்த பயன்பாடுகள் அனைத்தையும் பயன்படுத்தும் தலைவராக இருக்கின்றார்.பல ஆண்டுகளுக்கு முன்னாலேயே கணினிப் பயன்பாட்டை ,சிங்கப்பூரில் இருக்கும் தன் மகள் கவிதா கற்றுக்கொடுத்தார் என்று அய்யா ஆசிரியர் அவர்கள்  சொல்வதை நான் கேட்டிருக்கின்றேன்.

கணினி தான் கற்றுக்கொண்டது மட்டுமல்ல  பல ஆயிரம் மாணவிகள் கணினியைக் கற்றுக்கொள்ள தஞ்சை வல்லத்தில் பெரியார் மணியம்மை மகளிர் பொறியியல் கல்லூரியை ஆரம்பித்தார். அதில் கணினித் தொழில் நுட்பம்  கற்ற பல ஆயிரம் பெண்கள் உள்நாட்டிலும் வெளி நாட்டிலும் இன்றைக்கு உயர் பணிகளில் இருக்கின்றனர்.இன்றைக்கு நிகர் நிலைப் பல்கலைக் கழகமாக உயர்ந்து நிற்கிறது அந்த நிறுவனம்.அதுமட்டுமல்ல, கணினி எப்படி எளிய மக்களுக்குப் பயன்படவேண்டும் என்று நினைக்கிறோமோ அப்படி ‘புரா’ திட்டத்தின் மூலமாக பெரியார்-மணியம்மை நிகர் நிலைப் பல்கலைக்கழகத்தின் மூலமாக அதனைச்சுற்றி இருக்கும் 65 கிராமங்களின் ஏழை எளிய மக்கள் பயன்படுவதைப் பார்க்கின்றோம்.

கணினியின் செயல்பாட்டைக் குறிப்பிடும்போது அதன் குணங்களை 5 ஆங்கிலச்சொற்களால் குறிப்பிடுவார்கள்.  speed, accuracy, diligence, versatility and memory. வேகம்,துல்லியம்,விடாமுயற்சி,பல்துறை,நினைவாற்றல்.இது அத்தனையும் நாம் சுயமரியாதை நாளாகக்கொண்டாடும் நாளின் தலைவர் அய்யா ஆசிரியர் அவர்களுக்குப் பொருந்தும்.அவரது வேக நடைக்கு ஈடு கொடுத்து பல இளைஞர்கள் கூட ஓடி வருவதைப் பார்த்திருக்கிறோம். நடையில் மட்டுமல்ல,ஒரு செயலைச்செய்வதில,திட்டமிடுவதில்,நடைமுறைப்படுத்துவதில் என அனைத்திலும் அய்யா ஆசிரியர் அவர்களின் வேகத்தை அறிகின்றோம்.அதனைப் போல யாரையும் துல்லியமாக கணிக்கக்கூடியவராக ,அவர்களின் உண்மைத்தன்மையைத் தெரிந்தவராக அய்யா ஆசிரியர் அவர்கள் இருக்கின்றார்.

ஒரு செயலை எடுத்துக்கொண்டால் அதனை விடாமல் முயற்சி செய்து அதனை நிறைவேற்றி முடித்துக்காட்டும் தலைமைப்பண்பை நாம் அய்யா ஆசிரியர் அவர்களிடம் காண்கின்றோம். நமது கல்வி நிறுவனங்களின் வளர்ச்சியாக இருந்தாலும் சரி,வர இருக்கும் ‘பெரியார் உலகமாக ‘இருந்தாலும் அய்யா ஆசிரியர் அவர்களின் விடா முயற்சி நமக்கு உவப்பு அளிக்கிறது.

பெரியார் பன்னாட்டு மையம் –அமெரிக்காவின் இயக்குநர்.மருத்துவர் சோம.இளங்கோவன் அவர்கள் ஒருமுறை, ‘மருத்துவரான எங்களுக்குத் தெரியாத மருத்துவச்செய்திகள் எல்லாம் அய்யா ஆசிரியருக்குத் தெரியும்’ என்று குறிப்பிட்டார்கள்.பல்துறை சார்ந்த அவரின் ஆற்றலை,பரந்த அறிவை வாழ்வியல் சிந்தனைகள் நூல்கள் மூலமாக நாம் தொடந்து வாசித்து உணர்கிறோம்.அதனைப்போல நினைவாற்றல்..மதுரைக்கு வந்தால் மதுரைத் தோழர்கள் அத்தனை பேரையும்,அவர்கள் மறைந்து 50,60  ஆண்டுகள் ஆன நிலையிலும் அய்யா ஆசிரியர் அவர்கள் குறிப்பிட்டுப் பேசுவதைக் கேட்டிருக்கிறோம்.அவர்களின் தனித்தன்மையை தனிப்பட்ட உரையாடல்களில் அய்யா சொல்வதைக் கேட்டிருக்கிறோம். கணினிக்கு உரிய அத்தனை பண்புகளையும் உள்ளடக்கியவராக அய்யா ஆசிரியர் அவர்கள் விளங்குகின்றார்.

கணினி பெரியதா ?,சுயமரியாதை பெரியதா ? என்றால் சுயமரியாதைதான் பெரியது. முன்னால் பிரதமர் ,சமூக நீதிக்காவலர் வி.பி.சிங் அவர்கள் சொன்னதைப் போல எவ்வளவு பெரிய சூப்பர் கம்ப்யூட்டராக இருந்தாலும் அதன் மீது ஒருவன் எச்சிலை துப்பினால் எதிர்வினை இருக்காது. ஆனால் சுயமரியாதை உள்ள ஒரு மனிதன் மீது துப்பினால் சும்மா இருப்பானா?ஏப்படிப்பட்ட எதிர்வினை இருக்கும் என்பதை நாம் அறிவோம். எனவே கணினி நாள்,சுயமரியாதை நாள் என இரு நாட்களும் டிசம்பர் 2 என்றாலும் சுயமரியாதை நாள் கணினி நாளை விட மிகத்  தேவையானது.சமூகத்தில் உள்ள ஒவ்வொரு மனிதருக்கும் இன்றியமையாதது.சுயமரியாதை நாளைக் கொண்டாடி மகிழ்வோம்.அனைவருக்கும் டிசம்பர் 2 கணினி நாள்,சுயமரியாதை நாள் வாழ்த்துகள்.

நன்றி: உண்மை 1-15 ,டிசம்பர் 2023

அவரைப் பற்றி எழுதியே ஆகவேண்டும் ....

திரு.வே.வீரிசெட்டிசாரின் நினைவேந்தல் நிகழ்வும், 'கனவு போலத்தான் நடந்தது ' என்னும் எனது நூல் வெளியீட்டு நிகழ்வும் 26.11.2023 காலை மதுரையில் உள்ள அல்-அமீன் மேல் நிலைப்பள்ளியில் நடைபெற்றது.அந்த நிகழ்வைப் பற்றிய செய்திகளை வெளியிட்ட விடுதலை,தினமணி,தமிழ் இந்து ,தமிழ் முரசு உள்ளிட்ட பத்திரிக்கைகளுக்கு மனமார்ந்த நன்றி.மதுரையில் உள்ள நட்பு தமிழ் வட்டத்தின் தலைவர் அய்யா நா. நா.ஆறுமுகம் அவர்கள், 10 மணி நிகழ்வுக்கு 9.30க்கே  இணையரோடு வந்திருந்து நிகழ்ச்சிக்கு தலைமை வகித்து உரையாற்றியதோடு இணைப்புரையும் கொடுத்து நிகழ்வை சிறப்புக்குரியதாக ஆக்கினார். அல்-அமீன் மேல் நிலைப்பள்ளியின் தலைமை ஆசிரியர் திரு ஷேக் நபி அவர்கள் 'கனவு போலத்தான் நடந்தது ' என்னும் நூலை வெளியிட்டதோடு ஒரு அருமையான உரையை நிகழ்த்தினார்.திரு.வே.வீரிசெட்டி சாரின் அவர்களின் உடன்பிறந்த சகோதரர்கள் திரு.வே.சிவராஜ் அவர்கள்(ஸ்டேட் பேங்க் ஆப் இந்தியா-வின் மேலாளர் -பணி நிறைவு) அவர்களும் திரு.வே.பாலசுப்பிரமணியம்(பொறியாளர்,பொதுப்பணித்துறை-பணி நிறைவு) அவர்களும் திரு.வே.வீரிசெட்டி சாரின் மகள்,பெரியகுளத்தில் முது நிலை ஆசிரியராகப் பணியாற்றும் வீ.மணிமொழி அவர்களும் ,அவரின் இணையர் திரு.த.கார்த்திகேயன் அவர்களும் கலந்து கொண்டது மன நிறைவு அளித்தது. வீரிசெட்டி சாரின் உடன் பணியாற்றிய திரு.குபேந்திரன்(கல்வி அதிகாரி-ஓய்வு)  அவர்கள்,அவரின் மாணவர் திரு.ரவீந்திரன் (ஓய்வு பெற்ற ஆசிரியர்) ஆகியோரும் உரையாற்றிய தங்கள் அனுபவங்களைப் பகிர்ந்துகொண்டனர். நிகழ்வில் முன்னிலை ஏற்று உரையாற்றிய, நூலைப் பெற்றுக்கொண்டவர்கள் என அனைவரும் நிகழ்வுக்கு சிறப்பு சேர்த்தனர்.நிகழ்வில் பகுத்தறிவு எழுத்தாளர் மன்றத்தின் மாநிலச்செயலாளர் அண்ணன் பாவலர் சுப,முருகானந்தம் அவர்கள் ஒரு நிறைவான உரையை நிகழ்த்தினார்.கலந்து கொண்ட ஒவ்வொருவருக்கும் நன்றி. வர இயலாமல்,இருக்கும் இடத்தில் இருந்து நிகழ்வை வாழ்த்தியவர்களுக்கும் நன்றி.

நூலைக் குறிப்பிட்ட காலத்தில் அச்சடித்து மதுரைக்கு அனுப்பிய கீழடி பதிப்பகத்தின் உரிமையாளர்,பகுத்தறிவு எழுத்தாளர் மன்றத்தின் 

மாநிலச்செயலாளர் அண்ணன் பாவலர் செல்வ.மீனாட்சி சுந்தரம் அவர்களுக்கு  பெரும் நன்றி.

நிகழ்வு முடிந்த மறுநாளான நேற்று(27.11.2023) எழுத்தாளர் தோழர் மு.சங்கையா அவர்கள் செல்பேசியில் பேசினார். நூலைப் படித்துவிட்டேன் என்று வெகுவாக நூலைப் பாராட்டினார். பாராட்டியதோடு,இதைப் போல எனக்குக் கற்பித்த ஒரு ஆசிரியர் மனதிற்குள்ளேயே இருக்கிறார்."  நான் பள்ளியில் படிக்கும்போது ,ஓரிரு நாள் காய்ச்சல் என்று பள்ளிக்கூடத்திற்கு போகவில்லை.அந்த ஆசிரியர் வந்து என்னை வீட்டில் வந்து பார்த்து,'ஏன் பள்ளிக்கு வரவில்லை ' என்று கேட்டு ,காய்ச்சல் என்றவுடன் என்னை சைக்கிளில் பின்னால் உட்காரவைத்து மூன்று மைல்தூரம் ஓட்டிச்சென்று,மருத்துவரிடம் காட்டி,ஊசி போட்டு ,அதற்கு அவரே பணம் கொடுத்து,மறுபடியும் என்னை வீட்டில் வந்து விட்டுப்போனார்' என்றார்.அவரைப் பற்றி இன்னும் நிறைய செய்திகள் இருக்கிறது.மூன்று வருடம் அவரிடம் நான் படித்தேன். இதுவரை ஒரு கட்டுரை கூட அவரைப் பற்றி  எழுதவில்லை.இந்த நூலைப் படித்து முடித்தவுடன் அவரைப் பற்றி எழுதியே ஆகவேண்டும் என்னும் முடிவுக்கு வந்துவிட்டேன் தோழர்,எழுதப்போகிறேன் என்றார். தோழர் ,இந்த நூலின் மிகப்பெரிய வெற்றியாக  நான் கருதுவது,உங்களின் இந்த எண்ணம்தான் எழுதுங்கள்,எழுதுங்கள்  என்றேன்.

 

திரு.வே.வீரிசெட்டி சார் அவர்களின் முதலாம் ஆண்டு நினைவு நாள்

 

இன்று எனக்கு தலைமை ஆசிரியராக இருந்து சென்ற ஆண்டு(2022) இதே நாளில்  நவம்பர் 24-ல் மறைந்த திரு.வே.வீரிசெட்டி சார் அவர்களின் முதலாம் ஆண்டு நினைவு நாள்.அவரைப் பற்றிய நினைவுகள்  நிறைய ஓடுகிறது.84 ஆண்டுகள் ,ஒரு முழுமையான வாழ்க்கையை வாழ்ந்தவர்.தன்னுடைய வாழ்நாள் முழுவதும் கற்றுக்கொடுத்துக்கொண்டே இருந்தவர்,அப்படி கற்றுக்கொடுப்பதற்கு அடிப்படை கற்றுக்கொள்வது எனத் தன்  வாழ்நாள் முழுவதும்  கற்றுக்கொண்டே இருந்தவர்.’செல்வத்துள் எல்லாம்  தலை’ ஆகிய செவிச்செல்வத்தை முழுமையாகப் பயன்படுத்தியவர்,எவர் பேசினாலும் பொறுமையாக,முழுமையாகக் கேட்கும் தன்மையை தன் வாழ்நாள் முழுவதும் வைத்திருந்தார்.

அவரைப் பற்றிய எனது நினைவுகள்,அவர் பல பள்ளிகளில் பணியாற்றிய அனுபவத்தை என்னோடு பகிர்ந்து கொண்ட அனுபவங்கள்,அவரின் உடன் பிறந்த தம்பி,அவரின் இன்னொரு மாணவர்,அவரின் இரண்டு நண்பர்களின் கூற்று என அனைத்தையும் இணைத்து ஒரு நூலாக ‘கனவுபோலத்தான் நடந்தது ‘ என்னும் புத்தகமாகக் கொண்டு வந்துள்ளேன்.அந்தப் புத்தகம் மதுரை கோ.புதூர் அல்-அமீன் பள்ளியில்  வருகின்ற 26-ந்தேதி காலை 10-1 மணி வரை நடக்கும் திரு.வே.வீரிசெட்டி அவர்களின் நினைவேந்தல் நிகழ்ச்சியில் வெளியிடப்பட இருக்கின்றது.

மதுரை,அதனைச்சுற்றி இருக்கும் தோழர்கள்,நண்பர்கள் வாய்ப்பு உள்ளோர் வாருங்கள்.மிகக் குறுகிய காலத்தில் இதனை அச்சிட்டு உதவிய கீழடி பதிப்பகம்,அதன் உரிமையாளர் அண்ணன் பாவலர் செல்வ.மீனாட்சி சுந்தரம் அவர்களுக்கு மனமார்ந்த நன்றி.திரு.வே.வீரிசெட்டி சார் அவர்கள் பண்ணைக்காடு,நத்தம்,தேவதானப்பட்டி,சிறுகுடி,தொண்டி,பாகனேரி,சாப்டூர்,கருங்காலக்குடி,சத்தரப்பட்டி,வாடிப்பட்டி ஆகிய ஊர்களில் ஆசிரிய்ராகவும் ,தலைமை ஆசிரியராகவும் பணியாற்றி உள்ளார்.அவரின் மாணவர்கள்,உடன் பணியாற்றியவர்கள் அவரைப் பற்றி ஏதேனும் சொல்லவேண்டும் என்று நினைத்தால் தொடர்பு கொள்ளுங்கள்.அல்லது எழுதி அனுப்புங்கள்.அடுத்த பதிப்பில் இணைத்துக்கொள்ளலாம்.

இன்றைக்கு அமெரிக்காவில் நன்றி தெரிவிக்கும் நாளாம்.அய்யா சிக்காகோ மருத்துவர் சோம.இளங்கோவன் அவர்கள் பதிவிட்டிருந்தார்.  நன்றி உணர்ச்சியால் விளைந்த புத்தகம் இது. நன்றி.

உண்மையின் ஒளிச்சிதறல்

                         உண்மையின் ஒளிச்சிதறல்

              (முனைவர் வா.நேரு)

திராவிட இயக்கம் மக்களுக்கு உண்மையை உணர்த்த கையில் எடுத்த கலை நாடகம். நாடகக் கலையின் மூலமாக பகுத்தறிவுக் கருத்துகளை,முற்போக்குக் கருத்துகளை,சாதி ஒழிப்பை,பெண்ணுரிமைக் கருத்துகளை மக்கள் மனங்களிலே விதைத்த இயக்கம் திராவிட இயக்கம். புரட்சிக் கவிஞர் பாரதிதாசன்,பேரறிஞர் அண்ணா, ,டாக்டர் கலைஞர் ,சி.பி.சிற்றரசு,தில்லை வில்லாளன்,,எஸ்.எஸ்.தென்னரசு,கே.ஜி.இராதாமணாளன் எனத் திராவிட இயக்க நாடகப் படைப்பாளர்களின் பட்டியல் மிகப்பெரியது. தாங்கள் விரும்பிய சமுத்துவ சமுதாயம் படைக்க,மிக வலுவான போர்க்கருவியாகத் திராவிட இயக்கத்தவர்கள் நாடகத்தைத் தங்கள் கைகளில் எடுத்தனர்.படைத்தனர். ஊர்கள் தோறும் மேடைகளில் அரங்கேற்றினர். எதிர்ப்புகள் எத்தனை வந்தபோதிலும் உண்மையைப் போதிக்கும் இந்த நாடகங்களை நடத்தினர்.

 “ இனி வரப்போகும் நாடக உலகமானது இதுவரை இருந்தது போலவே இல்லாமல்,உண்மையிலேயே மனித சமூகத்திற்குப் பயன்படக்கூடியதாகவும் அதாவது,மக்கள் யாவரும் சமம்-பகுத்தறிவே பிரதானம்-உலக இயற்கைப் போக்குகள் ,இன்ப துன்பங்கள் யாவர்க்கும் பொது; இவற்றை யாரும் சரிசமமாக அனுபவிக்கக் கடமைப்பட்டவர்கள்;அத்ற்கேற்ற கொள்கைகளே வாழ்க்கை முறையாகவும் ஆட்சி முறையாகவும் இருக்க வேண்டும்; இவற்றிற்கு விரோதமாய் இருப்பவைகள் எல்லாம் அழிந்து ஒழிந்து மறையவேண்டும் என்கின்ற கருத்துக்கும்  அனுகூலமாகவும், வழிகாட்டியாகவும் இருக்கவேண்டுமென்று விரும்பி,இன்றைக்கு கொடுமையும் பட்சபாதமும் நிறைந்த உலகத்தை அன்பும் சமுத்துவமும் கொண்ட உலகமாயச்செய்ய உதவி புரிய வேண்டுமென்று ஆசைப்படுகிறேன் “ என்றார் தந்தை பெரியார்.அந்த அறிவுரைக்கு ஏற்றபடி திராவிட இயக்கத்தவர்கள் நாடகக் கலையை 1940,1950,1960களில்  பயன்படுத்தினர்.

1970-களுக்குப் பிறகு நாடக வடிவம் மாறியது. நிஜ நாடக இயக்கம் தோன்றியது. நிஜ நாடக வடிவத்தை முதலில் கையில் எடுத்தவ்ர்கள் இடது சாரி இயக்கத்தினர். மேற்குவங்காளம்,கேரளா போன்ற மாநிலங்களில் வீதி நாடகம், நிஜ நாடக இயக்கம் பெரும் புகழ் பெற்றது.

தமிழ் நாட்டிலும் நிஜ நாடக இயக்கத்தை இடதுசாரி இயக்கத்தவர்களே முன்னெடுத்தனர்.ஆரம்ப கால கட்டங்களில் அவர்களின் நாடகங்களின் கருப்பொருளாக தந்தை பெரியார் கருத்துகள் இல்லை. வர்க்க உணர்வு அடிப்படையிலான கருத்துகளே இருந்ததே தவிர வர்ணாசிரம ஒழிப்புக் கருத்துகள் இல்லை. ஆனால் இப்போது  நிஜ நாடக இயக்கத்தினர் தந்தை பெரியாரின் கருத்துகளை அடிப்படையாகக் கொண்டு பல நாடகங்களைக் கொடுக்கின்றனர்.

.தமிழ் நாட்டின் நிஜ நாடகத்தின் தந்தை என்று போற்றப்படும் பேரா.மு.இராமசாமி அவர்கள் தொடர்ச்சியாக ‘கலகக்காரர் தோழர் பெரியார்’,’பெண் ஏன் அடிமையானாள்(கலகக்காரர் தோழர் பெரியார் -2) என்னும் நாடகங்களைக் கொடுத்து தமிழ்நாட்டின் கருத்தியல் தளத்தில் ஓர் அதிர்வைக் கொடுத்தார்.அதனைத் தொடர்ந்து அண்மையில், மதுரையில் 28.10.2023 அன்று ‘வைக்கம் போராட்டம் ஈ.வெ.ரா.நாயக்கர் கதை அல்ல, ஈ.வெ.ரா. நாயகர் ஆன கதை (கலகக்காரர் தோழர் பெரியார் -3) என்னும் நாடகத்தை அரங்கேற்றினார்.

இந்த ஆண்டு வைக்கம் போராட்டத்தின் நூற்றாண்டு. தமிழ்நாட்டின் முதல்வர்  மாண்புமிகு மு.க.ஸ்டாலின் அவர்கள்  மிகச்சிறப்பாக இந்த வைக்கம் நூற்றாண்டு விழாவைக் கல்லூரிகள் கொண்டாட வேண்டும் என்று அறிக்கை கொடுத்திருந்தார்..அதனை மதுரை காமராசர் பல்கலைக் கழக கல்லூரி மாணவ-மாணவிகள்,ஆசிரியர்கள் ஒன்றிணைந்து  மிகச்சிறப்பாக நிறைவேற்றினர்.

மதுரை இராஜா முத்தையா மன்றம் அரங்கு. முழுவதுமாக நிரம்பி வெளியே நின்றும் நாடகத்தைப் பார்த்தனர்.கல்லூரி மாணவ மாணவிகளால் அரங்கம் நிரம்பியிருந்தது. இளையவர்கள்  நடிப்பதை இருபால் இளைஞர்கள் வரவேற்று கைதட்டி மகிழ்ந்து வரவேற்றனர்.ஏறத்தாழ 3000 மாணவ மாணவிகள் இருமுறை நடத்தப்பட்ட இந்த நாடகத்தைக் கண்டு உணர்வு பெற்றனர் என இக்கல்லூரியின் துணை முதல்வர் பெரி.கபிலன் அவர்கள் குறிப்பிட்டார்.

““வைக்கம் பற்றிய நாடகம் ஒன்றை நான் வரைய, ஒரு தூண்டுதலாய் அமைந்தது, வைக்கம் போராட்ட நூற்றாண்டைத் தமிழ்நாடு அரசு ஓராண்டு நிகழ்த்தத் திட்டமிட்டிருந்ததும், ஒரு காரணம்! அதையொட்டித்தான், என்னின் வைக்கக்களப் பணிகளும், வைக்கம் தொடர்பான நூற்களின் வாசிப்புகளும்! ஆயின், அதற்குமுன், ‘பெண் ஏன் அடிமை ஆனாள்? என்கிற கலகக்காரர் தோழர் பெரியார் 2’ நாடகம் எனக்குள் உருவாக்கிக் கொண்டிருக்கையிலேயே, சாதிய வருணாச்சிரமத்தைத் தொட்டு, அது பேசும் வருண அரசியலைக் கொண்டு,நாடகம் ஒன்று பண்ண வேண்டும் என்கிற சிறு பொறியொன்று, பட்டாம்பூச்சியாய் எனக்குள் படபடத்துக்கொண்டிருந்தது. அதற்குக் காரணம், பெண்களைப் பாவ யோனியாகவே வருணாச்சிரமம் பார்க்கும் பார்வையைப் ’பெண் ஏன் அடிமை ஆனாள்?’ நாடகம் தன் உள்ளிலிருந்து பேசியிருந்தது. பார்த்தவர்கள் வெடவெடத்து அதிர்ந்து போயிருந்தனர். “ (கணையாழி,நவம்பர் 2023) என்று இந்த வைக்கம் நூற்றாண்டு நாடகம் நடத்தவேண்டும் எனும் எண்ணம்  எப்படி உருவானது என்பதனை இந்த நாடக இயக்குநர் பேரா.மு.இராமசாமி அவர்கள் குறிப்பிடுகின்றார்.

இந்த நாடகம் பல நகரங்களில் நடத்தப்பட இருக்கிறது. திராவிடர் கழகத்தலைவர் அய்யா ஆசிரியர் கி.வீரமணி அவர்கள் திருச்சியில் இந்த நாடகத்தை நடத்தவேண்டும் என்னும் தன் விருப்பத்தைத் தெரிவித்தார். .இருட்டை அகற்றுவதற்கு வெளிச்சத்தைத்தான் உருவாக்கவேண்டும்.இன்றைய இளைய சமுதாயத்திடம் பரப்பப்படும் சாதி இருட்டை அகற்றத் தந்தை பெரியார் என்னும் வெளிச்சத்தைத்தான்  அவர்களுக்கு காட்டவேண்டும்.அந்த வெளிச்சத்தைக் காட்டும் வேலையை இந்த நாடகம் மிக அற்புதமாக நிகழ்த்துகிறது. பார்க்கும் ஒவ்வொரு மாணவரும் சாதிய இழிவை உணரும் வண்ணம்,வைக்கம் போராட்டத்தின் வழியாக மனிதர்களுக்குள் இருக்கவேண்டிய சம நீதியை உணரும் வண்ணம் இந்த நாடகம் அமைந்திருப்பது சிறப்பு.

கறுப்புச்சட்டை போட்ட தந்தை பெரியாரை நாம் அறிவோம்.ஆனால் கதர்ச்சட்டை போட்ட பெரியாரை, பெரியார் என்ற பெயர் வருவதற்கு முன்னால் ஈ.வெ.இராமசாமி நாயக்கர் என்னும் பெயரோடு கதர்க்குல்லாய் அணிந்து பொதுவாழ்வில் புடம் போட்டத்தங்கமாய் மிளிர்ந்த பெரியாரை,அடுக்கடுக்காய் சிறைத்தண்டனைகள் அடைந்தபோதும் அயராமல்,அஞ்சாமல் போராடிய பெரியாரை,தன்னுடைய மனைவி நாகம்மையாரிடம் ‘நான் சிறைக்குப் போகிறேன். போராட்டம் தொய்வு அடையக்கூடாது,தொடர்ந்து நீ நடத்து போராட்டத்தை ‘ என்று சொல்லிச்சென்ற பெரியாரை,தன் தங்கை கண்ணம்மாவும்,தன் மனைவி நாகம்மையும் போராட்டத்தை நடத்துகிறார்கள் எனும் செய்தியால் மகிழ்வுற்ற பெரியாரை,சிறையில் புழுக்களோடு உணவை கவலைப்படாமல் சாப்பிட்ட பெரியாரை,அதனைப் பார்த்து இராசாசி பாராட்டிய பெரியாரை,எந்த விதக் கவலையும் இல்லாமல் சிறைத்தண்டனையை ஏற்றுக்கொண்ட பெரியாரை, காந்தியார் வந்து நேரில் சந்தித்து ,போராட்டம் பற்றி உரையாற்றிய பெரியாரை,வைக்கம் போராட்ட வெற்றிவிழாவில் கலந்து கொண்டு உரையாற்றிய பெரியார்  எனப் பார்ப்போர் கண்முன்னால் பேரா.மு.இராமசாமி அவர்கள் நடித்துக்காட்டினர்.

வைக்கம் போராட்டம் ஆரம்பித்த மார்ச்30,1924 முதல் அது முடிவு பெற்ற நவம்பர் 23,1925வரை தேதிகளைக் காட்டி அந்தத் தேதிகளில் நிகழ்ந்த போராட்டங்களை,நீதிமன்ற நடவடிக்கைகளை, பத்திரிக்கை செய்திகளை என அந்த நாள் நிகழ்வுகளைத் தேதிப்படி ,கல்லூரி மாணவ மாணவிகள் கூர்மையான விமர்சனனகளோடு நடித்துக்காட்டியபோது பார்வையாளர்கள் பகுதியில் இருந்து கைதட்டல்கள் பலமாக எழுந்தது.

கல்லூரி மாணவ மாணவியர்கள்தானா அல்லது நிரந்தர நாடகக் கலைஞர்களாக இவர்கள் என்று எண்ணத்தக்கவகையில் ஒவ்வொரு காட்சியிலும் மாணவ மாணவியர்கள் வசனங்களைப் பேசி அற்புதமாக நடித்தனர்.105  நிமிடம் நாடகம் , நேரம் போனதே தெரியாதவண்ணம் மிக விறுவிறுப்பாகவும் உணர்வுபூர்வமாகவும் நடத்தப்பட்டது வியப்பளித்தது.வைக்கம் போராட்ட வரலாறு கண்முன்னால் காட்சிகளாக விரிந்து,உண்மையை வெளிச்சமிட்டது.

தந்தை பெரியாரின் கருத்துகள் எவரையும் ஈர்க்கும் வல்லமை மிக்கவை. திறந்த மனதோடு தந்தை பெரியாரின் கருத்துகளை உள்வாங்கும்போது அது செய்யும் மன மாற்றங்கள் ஆச்சரியப்படத்தக்கவை.1933-ல் தந்தை பெரியாரின் ஒரு 3 மணி நேரப்பேச்சை முதன் முதலில் கேட்டு, மனம் மாறி தந்தை பெரியாரின் கருத்துகளை கவிதைகளாக ஆக்கினார் புரட்சிக்கவிஞர் பாரதிதாசன் என்பது வரலாறு. இது 90 ஆண்டுகளுக்கு முன் நிகழ்ந்த நிகழ்வு ஆனால் தந்தை பெரியாரின் கருத்துகளின்,போராட்டங்களின் அடிப்படையில்  நிஜ நாடகங்களை வடிவமைக்கும் அய்யா பேரா.மு.இராமசாமி அவர்கள்,தந்தை பெரியாரின் கருத்துகள் தனக்குள் ஏற்படுத்திய வேதியியல் மாற்றத்தைக் கீழ்க்கண்டவாறு குறிப்பிடுகிறார்.

இந்த நாடகம் எனக்குள் செய்திருக்கிற மாற்றம் என்னவாயிருக்கிறது என்பதாய்த் தனித்து யோசித்துப் பார்க்கையில், அது எனக்குள் செய்திருக்கிற கிரியை ஆச்சரியப்படுத்துவதாய் இருக்கிறது. உண்மையின் மேலான பற்றுறுதி கூடியிருக்கிறது. என்னை என் வளர்ச்சியில் இயல்பாகப் பக்குவப்படுத்தியிருந்த, உண்மையாயிருப்பது என்பது எத்தனை உன்னதமானது என்பதை, இலக்கியமாய் எனக்குள் இந்த நாடகம் இறக்கியிருக்கிறது என்று கம்பீரமாகச் சொல்ல முடியும். அது, நாடகத்தில் நடிக்கிற நடிகனுக்குள் நிகழ்ந்திருக்கிற வேதியல்மாற்றம்! கலவரத்தையோ, காட்டுமிராண்டித் தனத்தையோ நம்பாமல், எதையும் பகுத்தறிவுடன் யோசிக்க வைக்கிற பக்குவத்தை இது உள்வயமாய் உருவாக்கியிருப்பது அதிசயமாயிருக்கிறது.

 உண்மையின் ஒளிச்சிதறல்தான் பெரியார் என்பதையும், சமூகத்தின் மேலான பற்று/ அக்கறை என்பதே பெரியாரியம் என்பதாயும், அது மனிதத்துவத்தை மேன்மையுறச்செய்யும் மாமருந்து என்பதாயும், எனக்குள், உரத்து உள்வாங்க வைத்திருக்கிறது இந்த நாடகம்! நடிக்கையில், பெரியாராக நான் என்னை எப்படிப் பார்க்கிறேன்? உண்மை-மனிதனை மையப்படுத்தும் சமூகப் பற்று-சமூக நீதியை உள்ளத்தில் பற்றவைக்கும் நெருப்பு-யோசிக்கவே வைக்கிற பகுத்தறிவுக் குறும்பு-பொதுவாழ்வில் நேர்மை-அஞ்சாமை எனும் அச்சாணி-போராட்டமே வாழ்க்கையாகும் ரசவாதம்-இவற்றின் நேரிசைக் கலவையில் உருவாகும் குணச்சித்திரம், பெரியார் என்கிற நிறம் என்பதாய் எனக்குள் புகுந்து, என்னின் ’நான்’-ஐயே என்னை மதிக்கவைக்கிற மகத்துவத்தைச் செய்திருக்கிறதாய் உணர்கிறேன். 

இந்தப் பொறி, நாடகத்தில் உடன் நடித்தவர்களிடமும் உருவாக ஆரம்பித்திருப்பதை மெல்ல மெல்ல என்னால் உணர முடிகிறது. இனி, நாடகத்தைப் பார்ப்பவர்களிடமும் புதிய குணமாய் அது பற்றிக்கொள்ள வேண்டும் என்பதே, பெரும் ஆதாயங்களை எதிர்பார்க்காத இந்த நாடகக்காரனின் எளிய ஆசை! இது நிறைவேறும் வரையும் உழைத்தாலே, இந்த வாழ்க்கையின் அர்த்தம் கைகூடிவரும் என்பதாய் நான் நம்புகிறேன்!” (கணையாழி,நவம்பர் 2023) என்று மிகச்சிறப்பாகக் குறிப்பிடுகின்றார்.

ஆம், இந்த நாடகத்தைப் பார்க்கின்ற ஒவ்வொருவருக்கும் இந்தப் பெரியார் என்னும் உண்மையின் ஒளிச்சிதறல் மூளைக்குள் ஊடுருவும். பத்தாம் பசலித்தனமான கருத்துகளால் நிரம்பிக்கிடக்கும் மூளையின் இருட்டை இந்தப் பெரியார் என்னும் ஒளிச்சிதறல் நீக்கும்.புதிது புதிதாய் சிந்திக்க வைக்கும்.அதன்மூலம் பெரியார் விரும்பிய  உலகத்தை ‘அன்பும் சமுத்துவமும் கொண்ட உலகத்தை’ படைப்பதற்கு உந்து சக்தியை அளிக்கும். அப்படிப்பட்ட நாடகத்தை அளித்திருக்கக்கூடிய பேரா.மு.இராமசாமி அவர்களையும் அதில் மிக இயல்பாக,தேர்ந்த நாடகக் கலைஞர்களைப் போல நடித்திருக்கக்கூடிய மதுரை காமராசர் பல்கலைக் கழக கல்லூரி மாணவ,மாணவிகளையும் ,அதற்குத் துணை நின்று பணியாற்றிய அக்கல்லூரியின் முதல்வர்,துணை முதல்வர் உள்ளிட்ட பேராசிரியர்களையும் ,ஊழியர்களையும்,முன்னாள் மாணவர்களையும் பாராட்டி மகிழ்வோம்.அது மட்டுமல்ல இந்த நிகழ்வு நிகழக் காரணமாக இருந்த தமிழ்நாடு முதலமைச்சர் மாண்புமிகு மு.க.ஸ்டாலின் அவர்களையும்,நிகழ்வில் கலந்து கொண்டு  உற்சாகப்படுத்திய தமிழ்நாடு வணிக வரித்துறை அமைச்சர் மாண்புமிகு பி.மூர்த்தி அவர்களையும்,உரையாற்றிய மதுரை பாராளுமன்ற உறுப்பினர் சு.வெங்கடேசன் அவர்களையும்,மதுரை வடக்குத்தொகுதி சட்டமன்ற உறுப்பினர் கோ.தளபதி அவர்களையும்,தஞ்சாவூர் பல்கலைக் கழகத்தின் முன்னாள் துணைவேந்தர் மா.இராஜேந்திரன் அவர்களையும், மதுரை துணை மேயர் நாகராசன் அவர்களையும் மற்ற ஆளுமைகளையும் பாராட்டி மகிழ்கின்றோம். தந்தை பெரியார் நாடகங்களால் ‘கிழியட்டும் பழம் பஞ்சாங்கம்’ என்று ஆனந்த நடனம் புரிவோம்.

நன்றி : உண்மை,மாதம் இருமுறை இதழ் 16-30,11,2023

கணினித் திரையிலா ? காகிதப் பக்கங்களிலா?....முனைவர் வா.நேரு

 

மதுரையில் புத்தகத் திருவிழா அக்டோபர் 12-ஆம் தொடங்கி அக்டோபர் 22 வரை, 11 நாட்கள் நடந்து முடிந்திருக்கிறது. எதிர் எதிர்க் கருத்துகளைக் கொண்ட புத்தகங்களைக் கூட ஒரே இடத்தில் வாங்கக்கூடிய இடமாகப் புத்தகச் சந்தை திகழ்கிறது.

இதனைப் போல தமிழ்நாட்டின் பல நகரங்களில் தொடர்ச்சியாக இந்தப் புத்தகத் திருவிழாக்கள் நடைபெறுவதும், மக்கள் அலை அலையாக வருவதும், புத்தகங்களை வாங்கிச்செல்வதும் பெரும் மகிழ்ச்சியை நமக்கு அளிக்கிறது.

இலட்சக்கணக்கான புத்தகங்கள் கிண்டிலில் ஒரு கணினிக்குள் கிடைக்கின்றன. விரும்பியதை விரும்பிய நேரத்தில் எல்லாம் நான் படித்துக்கொள்கிறேன்” என்றார் அந்த நண்பர்.

“இல்லை, நாம் புத்தகங்களை வாங்கி வீட்டில் வைத்துப் படிப்பது போல இணையத்தில் அல்லது கிண்டிலில் படிப்பது வராது” என்றேன் நான். நீங்கள் இன்னும் பழைய புத்தகக் காலத்திலேயே இருக்கிறீர்கள், புத்தகமாக வாங்கிக் குவிக்கிறீர்கள், மாறுங்கள்” என்றார்.

நானும் விடவில்லை. ‘ஆன்லைனில் படிக்கவே கூடாது, அது வேண்டவே வேண்டாம் என்பதல்ல எனது வாதம்.ஆனால் ஆன்லைன் புத்தகத்தைவிட, காகிதப்புத்தகமே மேல் என்பதே என் வாதம்’ என்றேன்.

எனது வாதத்திற்கு வலு சேர்ப்பதுபோல பி.பி.சி.தமிழ் இணையதளத்தில் ஒரு செய்தி கிடைத்தது. அது காகிதத்தில் வாசிப்பதற்கும் திரையில் வாசிப்பதற்கு
மான வேறுபாட்டைப் பற்றிப் பேசுகின்றது.

‘பிபிசி அய்டியாஸ் ‘தளத்தில் ‘திரையில் வாசிப்பது நம் மூளைக்கு என்ன செய்கிறது’ என்ற தலைப்பில் வெளியிடப்பட்ட ஒரு காணொலி, டிஜிட்டல் மயமாக்கலின் தாக்கம் குறித்து ஆராய்ச்சி செய்வதற்காக, 30க்கும் மேற்பட்ட நாடுகளைச் சேர்ந்த அறிஞர்கள் மற்றும் விஞ்ஞானிகள் ஒன்றிணைந்தனர் என்று சொல்கிறது
இந்த ஆய்வில் கண்டறியப்பட்டவை குறித்து நார்வேயில் உள்ள ஸ்டாவஞ்சர் பல்கலைகழகத்தின் பேராசிரியரும் ஆராய்ச்சியாளருமான ஆன் மேங்கன், ”ஸ்மார்ட் ஃபோன்களில் நாம் படிக்கக்கூடிய பல விஷயங்கள் உள்ளன. அவற்றில் சிறிய செய்தித் துணுக்குகள் போன்ற விஷயங்கள் உள்ளன. ஆனால் இந்த ஆராய்ச்சியின் மூலம் காகிதத்தில் படிக்கும் உள்ளடக்கத்தைவிட திரையில் படிக்கப்படும் உள்ளடக்கம் எளிதில் புரிந்து கொள்ளப்படுவதில்லை என்று கண்டறியப்பட்டது” என்கிறார்

சயின்டிஃபிக் அமெரிக்கன்’ என்னும் இதழ்“காகிதத்தில் வாசிப்பதைவிட, திரையில் வாசிக்கும் போது நமது மூளை அதிகமாக வேலை செய்கிறது. ஆனாலும் திரையில் நாம் வாசித்ததை நீண்டநேரம் நினைவில் வைத்திருப்பது கடினம்” என்று குறிப்பிடுகிறது அப்படியென்றால் அதிக நேரம் மூளை வேலை செய்து, மிக எளிதாக திரையில் வாசித்ததை மறந்து விடுகிறது

“புத்தகங்களைப் படித்தாலும் கூட, அதனை மீண்டும் மீண்டும் படிக்கும்போதுதான் முழுப்பொருள் நமக்குக் கிடைக்கும்.

‘நவில்தொறும் நூல்நயம் போலும் பயில்தொறும்
பண்புடையாளர் தொடர்பு (குறள் 783)

பழுத்த கனிகளைக் கூட அப்படியே ‘லபக்கென்று விழுங்கி
விடுவதோ அல்லது அவசர அவசரமாகச் சாப்பிட்டு விடுவதோ அதன் முழுச்சுவையை அனுபவித்து, சுவைத்து மகிழும் அரிய வாய்ப்பை உண்போருக்குத் தராது.
மாறாக, மெல்ல நிதானமாக நன்றாகச் சுரந்த உமிழ்நீருடன் கலந்து அதனை உண்ணும்போதுதான் முழுச்சுவை நமக்கு நல்லதோர் அனுபவத்தை ஊட்டும் என்று சொல்வார் ஆசிரியர் கி.வீரமணி அவர்கள். (வாழ்வியல் சிந்தனைகள் தொகுப்பு 11, பக்கம் 253). நின்று நிதானமாகத் திரும்பத் திரும்பப் படிப்பதற்கு உகந்தது காகிதப் புத்தகமே தவிர கணினித் திரைப் புத்தகங்கள் அல்ல.

புரிந்து கொள்வதற்கும், திரும்பத் திரும்பப் படிப்பதற்கும் மட்டுமல்ல; உடல் நலனுக்கும் கணினித் திரைப்புத்தகங்களை விட காகிதப் புத்தகங்களே நன்று. ஸ்மார்ட் போன்கள் என்று அழைக்கப்படும் ஆண்ட்ராய்டு போன்களை சிறு வயதிலேயே படிப்பதற்கு என்று குழந்தைகளுக்குக் கொடுத்து விடுகிறோம்.

“‘சேப்பியன் லேப்ஸ்’ என்ற அமெரிக்கத் தன்னார்வ நிறுவனத்தின் சமீபத்திய அறிக்கை குழந்தைகளுக்குச் சிறுவயதிலேயே ஸ்மார்ட்ஃபோன் கொடுப்பதால் ஏற்படும் பாதகமான விளைவுகள் அவர்களின் இளமைப் பருவத்தில் தெரியும் என்கிறது” என்று அந்த பி.பி.சி.செய்தி குறிப்பிடுகிறது. மேலும்,

“அஷ்விகா பட்டாச்சார்யா 9ஆம் வகுப்பு மாணவி. எப்பொழுதும் வகுப்பில் முதலிடத்தில் இருக்கும் அஷ்விகா, புத்தகங்கள் வாசிக்கிறார்.ஆனால் டிஜிட்டல் சாதனங்கள் வழியாக வாசிக்கிறார். அவரது பெற்றோர் அவருக்கு மென்புத்தகங்கள் வாசிக்க கிண்டில் கருவியைக் கொடுத்திருந்தாலும், இப்போது அவரை முழுமையாக காகிதப் புத்தகங்கள் பக்கம் திருப்ப விரும்புகின்றனர். அஷ்விகாவின் தாய் அசிமா கூறுகையில், ‘அதிகப்படியான மின்னணு சாதனங்களைப் பயன்படுத்துவதால் கண்களில் பல பக்க விளைவுகள் ஏற்படுவதாக நாங்கள் தொடர்ந்து உணர்கிறோம் அதனால் எனது மகளை காகிதப் புத்தகங்களின் பக்கம் திருப்ப விரும்புகிறேன்’ என்கிறார் என்று ஒரு தாயின் அனுபவத்தையும் அந்தச் செய்தி பகிர்கின்றது.

கோபத்தைத் தணிக்க ஒரு நல்ல புத்தகத்தை எடுத்துக்கொண்டு ஒரு அரைமணி நேரம், ஒரு மணி நேரம் தனியாக உட்கார்ந்து படிப்பது ‘பிபிலியோதெரப்பி (Bibliotherapy)’ஆகும். புத்தகங்கள் வாசிப்பின் மூலம் மனோவியல் சிகிச்சையளிக்கும் முறை என்று அந்தச் செய்தி குறிப்பிடுகிறது. அந்த ‘பிபிலியோதெரப்பி’ என்னும் சிகிச்சை முறை பற்றிய செய்திகள் நிறைய இணையத்தில் கொட்டிக்கிடக்கின்றன. நல்ல நூல்கள் நல்ல உளவியல் சிகிச்சை மருந்துகள் என்பதை அறிவியலும் இப்போது சொல்கிறது.

ஆம், புத்தக வாசிப்பின் மூலமாக நாம் நல்ல நண்பர்களைப் பெறுகின்றோம். அவர்கள் நம்மிடம் எதையும் எதிர்பார்க்காத நண்பர்கள், இன்னும் சிலரோ இப்போது உயிர் வாழாத நண்பர்கள், ஆனால் அவர்கள் தங்கள் எழுத்துகளின் மூலமாக நம்மோடு பேசுகிறார்கள். நல்லது, கெட்டதை நமக்கு அறிவுறுத்துகிறார்கள். எதைச் செய்ய வேண்டும், எதைச் செய்யக்கூடாது என்பதைத் தொடர்ந்து சொல்லிக்கொண்டே இருக்கிறார்கள், தாங்கள் வாழ்ந்த காலத்தில் பெற்ற அனுபவத்தை எல்லாம் நமக்கு அள்ளிக் கொடுத்துச் சென்று இருக்கிறார்கள், திருவள்ளுவரைப் போல புத்தகங்களின் வாயிலாக.
‘பிடிஎப் (PDF)’ புத்தகமாக மாற்றப்பட்டு, பலரும் அது கணினித் திரையில் மட்டும் படிக்கும்போது, அதற்கான எந்தவிதமான அங்கீகாரமும் எழுத்தாளனுக்குக் கிடைப்பதில்லை.

நாம் புத்தகங்களை பி.டி.எப். என்னும் வடிவில் கணினித் திரையில் படிப்பதும் ஒருவகை உழைப்புச்
சுரண்டல்தான்,ஒரு வகையான திருட்டுத்தான்.

கிண்டில் போன்ற ஆன்லைன் புத்தக நிலையங்களில், ஒர் எழுத்தாளர் தன் புத்தகத்தைப் போட்டு விட்டால், அதனை விளம்பரம் செய்து விற்கவேண்டிய பொறுப்பும் அந்த எழுத்தாளரைச் சார்ந்ததுதான்.பதிப்பகங்கள் தாங்கள் பதிப்பித்த எழுத்தாளரின் புத்தகங்களை ஊர் ஊராகச் சென்று புத்தகத் திருவிழாக்களில் விற்பனை செய்வது போல, அமேசான் போன்ற நிறுவனங்கள் பொறுப்பு எடுத்துக்கொள்வதில்லை. விற்றால் உனக்கு ராயல்டி தருகிறோம், பதிப்பகம் கொடுப்பதை விட அதிகமாகவே தருகிறோம், ஆனால் விளம்பரம் செய்து விற்க வேண்டியது உன் பொறுப்பு என விட்டுவிடுகின்றார்கள். புதிய எழுத்தாளர்களுக்கு இந்த வழிமுறை பயனளிக்காது.

காகிதப் புத்தகங்களை வாங்கித் தங்கள் வீட்டில் ஒரு சிறு நூலகத்தை ஏற்படுத்துகிறவர்கள், அதன் வழியாகத் தாங்கள் விரும்பும் புத்தகத்தை மீண்டும் மீண்டும் எடுத்துப் படிப்பவர்கள், அதில் இருக்கும் கருத்தை மற்றவர்களுக்கு எடுத்துச் சொல்பவர்கள் ஒரு நல்ல சமூகம் அமைவதற்கான அடிப்படைக் கடமையைச் செய்கின்றார்கள். ஒரு சிறு நூலகத்தை உங்கள் வீட்டில், வாசிக்கும் நீங்களும் ஏற்படுத்துங்கள். வாசிப்பை நேசிப்போம். வாசிப்பைச் சுவாசிப்போம்.

நன்றி : ‘டிஜிட்டல் புத்தகங்கள் வாசிப்பதால் மூளையில் ஏற்படும் ஆபத்தான விளைவுகள்’ கட்டுரை.
– பி.பி.சி. தமிழ், அஞ்சலிதாஸ், 21.10.2023.

 நன்றி உண்மை மாதம் இருமுறை இதழ்  நவம்பர் 1-நவம்பர் 15