முதன்மைப் படுத்தலும் ...முன்னேற்றமும் !

 

முதன்மைப்படுத்துதலும்….முன்னேற்றமும் !

                      (முனைவர் வா.நேரு )

 

ஒரு சமூகம் முன்னேறுவதற்கான அடிப்படைக் கூறுகளில் ஒன்று அந்தச் சமூகம் யாருக்கு மரியாதை அளிக்கிறது, அங்கீகாரம் அளிக்கிறது என்பதுதான். அண்மையில் சீன நாட்டில் யாருக்கு பெரிய விளம்பரப் பலகைகள் வைக்கப்படுகிறது என்பதைப் பற்றிய செய்தியினைப் பார்த்தேன்.

வணிகரீதியான விளம்பரங்கள் அதாவது மாபெரும் நகர விளம்பரப்பலகைகள் மற்றும் வணிக வளாகங்கள் மற்றும் பொது இடங்களிலுள்ள டிஜிட்டல் திரைகளில் வைக்கப்படும் விளம்பரங்களுக்குப் பதிலாக, நாட்டின் புகழ்பெற்ற அறிவியல் அறிஞர்களின் உருவப்படங்கள் வைக்கப்பட்டு வருகின்றன. இராக்கெட் விஞ்ஞானி கியான் சூசென்(Qian Xuesen),நோபால் பரிசு வென்ற து யூயு (Tu Youyou) மற்றும் விவசாய விஞ்ஞானி யுவான் லாங்பிங்(Yuan Longping) போன்ற பெயர்களும் ,அவரவர்கள் அவர்கள் துறைகளில் சாதித்த சாதனைகளும் பெரிய, பெரிய திரைகளில் இடம்பெற்றுள்ளன” ( Manisha Montal, The Print, Sep3 ,2026)

சீன அரசாங்கமே இதனை ஒரு பொது இயக்கமாகச் செயல்படுத்தி வருகிறது என்று மேற்கண்ட கட்டுரையாளர் குறிப்பிடுகிறார். முதலில் ஷான்டாங் மாகாணத்தில் தொடங்கி இன்றைக்குச் சீனா முழுவதும் இது பரவியுள்ளது. பிரமாண்டமாக இருக்கும் இந்த அறிவியல் அறிஞர்களின் புகைப்படங்களுக்கு முன்னால் மக்கள்  நின்று புகைப்படங்கள் எடுத்துக்கொள்கிறார்கள் என்றும் குறிப்பிடுகிறார்.

இப்படி மிகப் பிரமாண்டமான விளம்பரங்கள் வைப்பதன் வழியாக இளம் குழந்தைகள் மனதில் தாங்களும் அறிவியல் பற்றி அறிய வேண்டும் ,அறிவியல் அறிஞர்களாக வேண்டும் என்னும் மனப்பான்மையை அவர்கள் மனதில் விதைக்கிறார்கள்.

இந்திய ஒன்றியத்தில் இதற்கு நேர் எதிரான மனப்பான்மை கடைப்பிடிக்கப்படுகிறது..அறிவியல் அறிஞர்கள்,அறிவியல் மனப்பான்மை வேண்டும் என்று சொல்பவர்கள் ஒதுக்கப்படுகிறார்கள், ஆட்சியாளர்களால் வெறுக்கப்படுகிறார்கள்.அறிவியல் மனப்பான்மையைப் பரப்புவது மிகப்பெரும் குற்றமாக இங்கு பார்க்கப்படுகிறது.கேள்வி கேட்டால் சாமி கண்ணைக் குத்திப்போடும் என்பதுதான் பெரியோர்கள்,சின்னக்குழந்தைகளுக்குச் சொல்லிக் கொடுக்கும் பாடமாக இருக்கிறது.

“ மக்கள் ஒவ்வொன்றையும் யோசனை செய்து புதிது புதிதாக ஒவ்வொன்றையும் கண்டுபிடிப்பதற்குத்தான் ஆராய்ச்சி எனப்பெயர்.ஆனால், நாமோ நமது முன்னோர்கள் என்ன செய்து கொண்டிருந்தார்கள் என்பதை ஆராய்ச்சி செய்வதிலும் ,அதை நிலைநிறுத்த என்ன செய்ய வேண்டுமென்பதை ஆராய்வதிலுந்தான் ஆராய்ச்சித்துறையில் இருந்துவருகின்றோமேயல்லாது ,அதாவது பின்னால்தான் திரும்பிப் பார்த்துக்கொண்டிருக்கிறோமே தவிர, முன்னோக்கிப் பார்ப்பது இல்லை.மேல் நாட்டுக்காரன் ஏதாகிலும் ஒன்றைக் கண்டுபிடித்தால் மென்மேலும் ஆராய்ச்சி செய்து,1930-ல் இப்படி இருந்தால்,1940-இல் இது எப்படி இருக்கும்; 1950-ல் இப்படி இருந்தால் ,1960-ல் எப்படி இருக்கும் என்பதையே அறிந்து கொள்ள முயற்சிக்கிறான்.இதுதான் அவர்களுக்கும் நமக்கும் உள்ள வித்தியாசம்.

உதாரணமாக ,ஒரு ‘போர்டு மோட்டார்’ வண்டியை  எடுத்துக்கொண்டால் 20 வருடங்களூக்கு முன்பிருந்த உருவம் இப்போது இல்லை.அப்போது மணி ஒன்றுக்கு 18 மைல் சென்றால் இப்போது 90 மைல் வீதம் செல்கிறது.மோட்டாரில் காணப்படும் கோளாறுகளைக் குறைத்துக்கொண்டே முன்னேறிக்கொண்டு வருகிறான்.அவனுக்கு மனிதத்தன்மை, உணர்ச்சி ,ஊக்கம்,முயற்சி,கவலை ஆகியவைகள் இருக்கின்றன. நமக்கோ அவை இல்லை.எதை எடுத்தாலும் நமது நாட்டில் பழமை வந்து குறுக்கிடுகின்றது.” என்றார் தந்தை பெரியார் (‘குடி அரசு’ 28-6-1931)

மேலே தந்தை பெரியார் அவர்கள் குறிப்பிட்டதைப் போல அண்மையில்(19.09.2026) பெரியார் பன்னாட்டு அமைப்பு ,அமெரிக்கா நடத்திய தந்தை பெரியார் பிறந்த நாள் இணைய வழி நிகழ்வில் ,எப்படி எல்லாம் மாற்றங்கள் இன்னும் 30,40 ஆண்டுகளில் செயற்கை நுண்ணறிவால் நிகழும் என்று அமெரிக்காவில் பள்ளியில் படிக்கும் மாணவ,மாணவிகள் ஒளிபரப்பிக் காட்டினார்கள்.மிகச் சிறப்பாக இருந்தது. உலகம் இன்னும் எப்படி எல்லாம் மாறும் என்பது நம் கற்பனைகளை எல்லாம் தாண்டி மாறிக்கொண்டிருக்கிறது.. .அறிவியல் கண்டுபிடிப்புகள். அந்தக் கண்டுபிடிப்புகளின் பலன்கள் எளிய மனிதர்களின் வாழ்க்கையில் ஏற்படுத்திய மாற்றங்கள்,ஏற்றங்கள் எத்தனை ,எத்தனை.இன்னும் செயற்கை நுண்ணறிவு போன்றவைகளால் என்னென்ன மாற்றங்கள் ஏற்படப்போகின்றன என்பதை நினைத்தாலே வியப்பாக இருக்கிறது.

ஆனால் நமது நாட்டில் பழம்பெருமை பேசுவதிலேயே காலம் ஓடிக்கொண்டிருக்கிறது.வெறும் பழம் பெருமை பேசும்  மக்களாகத்தான் நமது மக்கள் இருக்கிறார்கள். மிகப்பெரும் விளம்பரப்பலகைகள் சாமியார்களுக்கும், திருவிழாக்களுக்கும், சினிமா நடிகர்களுக்கும் வைக்கப்படுகிறது. சாமியார்கள்தான் இங்கு பிரச்சனைகளைத் தீர்ப்பதற்குத் தீர்வுகளைச் சொல்பவர்களாக ஊடகங்களால், அரசுகளால் காட்டப்படுகிறார்கள்.கடவுள் என்னும் கல்லைக் கும்பிட்டால் பிரச்சனைகள் எல்லாம் தீர்ந்துவிடும் என்று காட்டுகிறார்கள். சினிமாவும் கடவுள் என்னும் பொய்மையும்தான் தொலைக்காட்சி பெட்டிகள் வழியாக நமது மக்களுக்கு மீண்டும் மீண்டும் காட்டப்படுகிறது. மக்கள் அவற்றையே மிகப்பெரியது என்று எண்ணுகிறார்கள்.

“நமது அரசமைப்புச்சட்டத்தின் 51 ஏ(எச்) பிரிவில் அறிவியல் மனப்பான்மையைப் பரப்புவதும் ,மூடத்தனத்திற்கு எதிராகவும் ,கேள்வி கேட்கும் உணர்வை வளர்த்து மனித நேயத்தைப் பரப்பவேண்டும் என்பதும் இங்கே வெறும் ஏட்டுச்சுரைக்காயாகவே உள்ளது “ என்று திராவிடர் கழகத்தலைவர் ஆசிரியர் கி.வீரமணி அவர்கள் மார்ச்,2021-இல் விடுத்த அறிக்கை என்பது  இன்றைக்கும் கேள்வியாகவே தொக்கி நிற்கிறது. கொடுமைகள் தொடர்கிறது.

அறிவியல் என்பது உண்மை. அறிவியல் என்பது வளர்ச்சி.அறிவியல் என்பது எதிர்காலம். அறிவியல் என்பது இருட்டை அகற்றும்  ஒளி போன்றது.ஆனால் அந்த அறிவியல் என்னும் ஒளியை இந்த நாட்டில் புகவிடாமல் தடுக்கும் கருவியாக மூட நம்பிக்கை இருக்கிறது.பெருபான்மையான சினிமாவும் ஒரு வகையில், ,மதம் போல மூட  நம்பிக்கையை, முட்டாள்தனத்தைப் பரப்பும் ஒரு சாதனமே.எனவே அறிவியலுக்கு முக்கியத்துவம் கொடுக்கும் மனப்பான்மை வளரவேண்டும்.அதற்குத் தடையாக இருப்பவற்றை நாம் வெளிச்சமிட்டுக் காட்டவேண்டும்..

அறிவியலைப் பற்றி எழுதுகிறவர்கள்,அறிவியலைப் பற்றிப் பேசுகிறவர்களைச் சமூகம் மதிக்கவேண்டும்.அவர்களை ஊக்கப்படுத்தவேண்டும்அறிவியலைப் பற்றிய புத்தகங்கள், பாடப்புத்தகங்களைத் தாண்டி மாணவர்கள் மத்தியில் போய்ச் சேரவேண்டும்.எப்படி ,அறிவியல் கருவிகள் கண்டுபிடிக்கப்பட்டன, எப்படி அறிவியல் கோட்பாடுகள் உருவாக்கப்பட்டன, அதற்கு அறிவியல் அறிஞர்கள் எப்படியெல்லாம் துன்ப்ப்பட்டார்கள்,தங்கள் வாழ்க்கையை அர்ப்பணித்தார்கள் என்னும் வரலாறு மக்கள் மத்தியில் போய்ச்சேரவேண்டும்.வெறும் வரலாறாக மட்டும் அல்லாமல் அறிவியல் கண்டுபிடிப்பாளர்கள் எப்படி எல்லாம் மதவாதிகளால் துன்புறுத்தப்பட்டார்கள், துயரப்பட்டார்கள் என்பதும் பெரிய விளம்பரப் பலகைகளாக வைக்கும் காலம் வரவேண்டும்.

இன்ஸ்டா,டுவிட்டர், முக நூல் போன்ற நவீன ஊடகங்களில் வரும் அறிவியல் செய்திகளுக்கு முக்கியத்துவம் கொடுத்து,அவற்றைப் பரப்பவேண்டும்.சமூக ஊடகங்கள் வழியாகப் பரப்பப்படும் அறிவியலற்ற மூட நம்பிக்கைச் செய்திகளைப் பரப்புவர்களுக்குத் தண்டனை கொடுக்கப்படவேண்டும். ஏட்டுச்சுரைக்காயாகவே இருக்கும் அறிவியல் மனப்பான்மையைப் பரப்பவேண்டும் என்னும் இந்திய அரசியல் சட்டத்தின் 51 ஏ(எச்) பிரிவு முழுக்கவனத்துடன் நாட்டின் எல்லாப்பகுதிகளிலும் அமுல்படுத்தப்படவேண்டும். அதற்கு 51 ஏ(எச்) பற்றிய செய்திகளைப் பெரிய விளம்பரப் பலகைகளாக வைக்கவேண்டும்.அப்போதுதான் சீனாவைப் போன்ற அறிவியல் மனப்பான்மையை மக்கள் மத்தியில்,மாணவர்கள் மத்தியில் பரப்பமுடியும்.அவர்களைச் சிந்திக்க வைக்கமுடியும். மனித நேயமுள்ள ,சிந்தனை உடைய சமூகத்தை உருவாக்க முடியும்.

                 -------------------------------------------------------------

நன்றி : உண்மை சமுதாய மாற்றத்திற்கான வாழ்வியல் மாதமிருமுறை இதழ் அக்டோபர் 01-15,2026

பிடிவாத மூட நம்பிக்கையும் பெரியார் எனும் அருமருந்தும்

 

நன்றி உண்மை மாதமிருமுறை இதழ் செப்டம்பர் 16-30,2026.

தியான் காங் !...

நன்றி : உண்மை மாதம் இருமுறை இதழ் செப்-1-15

                                    தியான்காங்

                              (முனைவர் வா.நேரு)

இனி வரும் பிரபஞ்சத்தில் பூமி இருக்குமா? பூமி  இருக்கும் ,ஆனால் மனிதர்கள் வாழ முடியாத சூழல் உண்டாகும்.அந்த அளவிற்கு இந்தப் பூமியின் சுற்றுச்சூழல் என்பது மாசு அடைந்திருக்கிறது. ‘மனித குலம் அழிவில் இருந்து தப்பிக்க வேண்டுமானால் இன்னும் 100 ஆண்டுகளுக்குள் வேறு ஏதாவது கிரகத்திற்குக் குடி போகவேண்டும் ‘ என்று மறைந்த  அறிவியல் அறிஞர் ஸ்டீபன் ஹாக்கின்ஸ் கெடு விதித்தார்.

வேற்றுக் கிரகத்தில் மனிதன் வாழ வேண்டுமென்றால், காற்று(ஆக்ஜிஜன் ) வேண்டும். நீர் வேண்டும். உணவு வேண்டும்.உணவு வேண்டும் என்றால் விவசாயம் வேண்டும். பயிர்கள் பயிரிடப்படவேண்டும். இல்லையென்றால் காட்டுமிராண்டி காலத்து மனிதர்கள் மாதிரி விலங்குகளின் இறைச்சிகளை மட்டும் உண்டு மனிதர்கள் வாழ முடியும். ஆனால் அந்த விலங்குகள் வாழ்வதற்குத் தாவரங்கள் வேண்டும்.அப்போதுதான் தாவர உண்ணி விலங்குகள் இருக்கும்.அந்த விலங்குகளை உண்ணும் விலங்குகள் இருக்கும். இவற்றை உண்ணும் மனிதர்கள் இருக்கமுடியும்.

மனிதனின் நாகரீக வளர்ச்சியில் விவசாயத்திற்கு மிகப்பெரும் பங்கு உண்டு.அமெரிக்கா போன்ற புதிய கண்டங்கள் கண்டுபிடிக்கப் பட்டபோது ,தங்களின் விவசாய முறையை வெள்ளைக்காரர்கள் அந்த மண்ணில் புகுத்தினார்கள்.அதன் மூலம் உணவுப்பொருட்களைப் பெறும் அளவில் விளைவித்தார்கள். விளைவித்த பொருளை அந்த நாட்டிற்கு மட்டுமல்லாது பல்வேறு நாடுகளில் இருக்கும் மனிதர்களும் பயன்படுத்தும் வண்ணம் வியாபாரம் செய்தார்கள்.செய்கிறார்கள்.

மனிதர்கள் வேற்றுக் கிரகத்தில் வாழ வேண்டுமென்றால் விவசாயம் வேண்டும். விவசாயத்தின் மூலமாகப் பயிர்கள் வளர்க்கப்படவேண்டும்.அதன் மூலமாகத்தான் மனிதர்கள் வாழ முடியும் .எனவே பூமிக்கு மேலே பயிர்களை வளர்க்கமுடியுமா? வளருமா? தாவரங்கள் பூக்குமா? காய்க்குமா?பழுக்குமா?  பழுப்பதன் மூலமாகக் கிடைக்கும் புதிய விதைகள் மூலமாக  மீண்டும் பயிரிட முடியுமா ? என்பது போன்ற ஆராய்ச்சிகள் விண்வெளியில் நடக்க ஆரம்பித்திருக்கின்றன.

இந்த ஆராய்ச்சியில் முன்னோடியாகச் சீன நாடு விளங்குகிறது.சீனா வெற்றிகரமாக விண்வெளியில் நெல்லை வளர்த்து, அறுவடை செய்து சாதனையைப் படைத்திருக்கிறார்கள். தியான்காங் என்பது சீனாவின் அதி நவீன விண்வெளி ஆராய்ச்சிமையம்.சீன மொழியில் தியான்காங் என்றால் விண்வெளி அரண்மனை என்று பொருள். விண்வெளியில் ஓர் அரண்மனையைப் போன்று  அமைத்திருக்கும் அதி நவீன ஆராய்ச்சி மையத்தில்தான் சீனர்கள் நெல் பயிரை  நட்டு,வளர்த்து அறுவடை செய்திருக்கிறார்கள். இந்த விண்வெளி விவசாயம் செய்த மூன்று சீன விண்வெளி வீர்ர்களின் பெயர்கள் ஜூ யங்சு,ஜியான்,லய் கா-யிங் நிலவில் முதன் முதலில் இறங்கியவர்  நீல் ஆம்ஸ்ட்ராங்க் என்று சொல்வதுபோல ,முதன்முதலில் விண்வெளி விவசாயம் செய்தவர்கள் இவர்கள் என்று எதிர்காலம் சொல்லும் சாதனையைச் செய்திருக்கிறார்கள்.

இந்த விண்வெளி அரண்மனை பூமியிலிருந்து 350- 450 கி.மீ உயரத்தில் விண்வெளியில் சுற்றிக்  கொண்டிருக்கிறது.நாம் பூமியில் ஒரே இடத்தில் உட்கார்ந்து இருந்தாலும் பூமி சூரியனைச் சுற்றிக்கொண்டுதான் இருக்கிறது.சுற்றும் பூமிக்குள் நாமும் சுழன்று கொண்டுதான் இருக்கிறோம்.ஆனால் அது நமக்குத் தெரிவதில்லை.அதுபோல உயரத்தில் அவர்கள் இருந்தாலும் ஓரிடத்தில் இருப்போதுபோலவே இருந்து சுற்றிக்கொண்டு இருக்கிறார்கள்.கடந்த மே மாதம் 24ம் தேதி ஒரு விண்கலம் மூலமாக விண்வெளி அரண்மனையில் இருப்பவர்களிடம் விதை நெல் கொடுக்கப்பட்டது. நாம் வீட்டு மாடியில் செடி வளர்ப்பதுபோல,அவர்கள் அந்த விண்வெளி மையத்தில் நெல்லை விதைத்து, வளரவிட்டு.முதிர்ந்த பின்பு  அறுவடை செய்திருக்கிறார்கள்.

மாடித்தோட்டம் போலத்தானே என்று நினைக்கிறீர்களா ,இல்லை. விண்வெளி அரண்மனையில் மண் இல்லை.காற்றைத் தரும் மரங்கள் இல்லை.புவியீர்ப்பு விசை முழுவதுமாக இல்லை.இருந்தபோதும் அங்கு எப்படி நெல் வளருகிறது என்பதை அருகில் இருந்த அந்த மூவரும் பார்த்திருக்கிறார்கள்.விதைந்த நெல்லை எடுத்து மறுபடியும் அங்கேயே விதைத்திருக்கிறார்கள்.அந்த நெல்லும் விளைச்சலைக் கொடுத்திருக்கிறது.பூமியில் விளைந்த நெல்லையும் அங்கு விதைத்திருக்கிறார்கள். அதுவும் அங்கு வளர்ந்து விளைச்சலைக் கொடுத்திருக்கிறது. அங்கேயே வளர்ந்த விதை நெல்லின் பயிரும், இங்கிருந்து நேரிடையாகக் கொண்டு செல்லப்பட்ட நெல்லின் விதையால் விளைந்த பயிருக்கும் என்னென்ன வேறுபாடுகள் இருக்கின்றன என்று ஆராய்ச்சி செய்திருக்கிறார்கள்.

இது நமது சூரிய வளி மண்டலத்தில் நடைபெறும் ஆராய்ச்சி.இதைப்போலவே நிலாவைப் பற்றி ,செவ்வாய் கிரகத்தைப் பற்றிய் தொடர்ச்சியான ஆய்வுகள் நடந்து வருகின்றன.நிலாவில் நீர் இருக்கிறது என்பதைக் கண்டுபிடித்த அறிவியல் அறிஞர் மயில்சாமி அண்ணாதுரை அவர்கள் தனது ஆராய்ச்சிக்கு தந்தை பெரியாரின் கருத்துகள் அடிப்படையாக இருந்தது என்று குறிப்பிட்ட செய்தியை ,திராவிடர் கழகத்தலைவர் அய்யா ஆசிரியர் கி.வீரமணி அவர்கள் அண்மையில் நடைபெற்ற வல்லம் பெரியாரியல் பயிற்சி முகாமில் குறிப்பிட்டார்கள்.அறிவுக்கு எல்லை இல்லை.தனது வாழ்க்கை முழுவதும் எதையும் ஆராய்ந்துபார், ஆராய்ந்து பார் என்று சொல்லிக்கொண்டே இருந்தவர் தந்தை பெரியார்.அந்த வகையில் அறிவியல் அறிஞர்கள்  நமது சூரிய மண்டலத்திற்கு உட்பட்ட கோள்களைத் தாண்டி பிரபஞ்சத்தில் இருக்கும் வேறு நட்சத்திரங்களை,அதற்குள் இருக்கும் கோள்களைப் பற்றி ஆராய்ச்சி செய்ய ஆரம்பித்திருக்கிறார்கள்.

“நமது சூரிய வளி மணடலத்தைத் தாண்டி “ தொலைதூர நட்சத்திரம் ஒன்றைச் சுற்றி வரும், பூமியைப் போன்ற பாறைத்தன்மை கொண்ட கோள் ஒன்றின் வளிமண்டலத்தை விஞ்ஞானிகள் முதன் முறையாகக் கண்டறிந்துள்ளனர்.அந்தப் புறக்கோள்,அது சுற்றி வரும் நட்சத்திரத்தில் இருந்து உயிரினங்கள் வாழத் தகுந்த மண்டலத்தில்(habitable Zone) அமைந்துள்ளது.  நமது சூரிய குடும்பத்திற்கு அப்பாலும் பூமியைப் போன்ற உயிர்கள் வாழ ஏதுவான சூழலைக் கொண்ட இருக்கக்கூடும் என்பதற்கு இதுவரை கிடைத்துள்ள மிக வலுவான சான்று இதுதான் என்று ஆய்வாளர்கள் கூறுகின்றனர். அந்த புறக்கோளின் வளிமணடலத்தில் ஹீலியம் வாயு இருக்கிறது…   இந்த ஆய்வின் முதன்மை ஆய்வாளரான ஹார்வர்டு பல்கலைக் கழகத்தைச் சேர்ந்த முனைவர் கால்லின் ,இந்தக் கண்டுபிடிப்பை ‘மிகவும் முக்கியமானது ‘ என்று விவரித்திருக்கிறார். ‘சூரியனல்லாத மற்றொரு நட்சத்திரத்தின் உயிரன்ங்கள் வாழத்தகுந்த மண்டலத்தில் இருக்கும் பாறைத்தன்மை கொண்ட ஒரு கோளில் வளிமண்டலம் இருப்பது கண்டறியப்படுவது இதுவே முதல்முறை ‘ என்று அவர் தெரிவித்திருக்கிறார்..(பிபிசி தமிழ் செய்தி)

அந்தப் புறக்கோளுக்கு LHS 1140b என்று பெயர் வைத்திருக்கிறார்கள்.இது பூமியில் இருந்து சுமார் 48 ஒளி ஆண்டுகள் தொலைவில் அமைந்துள்ளது.இந்தக் கோள் நமது சூரியனை விட அளவில் மிகச்சிறியதாகவும் குளிச்சியாகவும் இருக்கும் ஒரு சிவப்பு நட்சத்திரத்தைச் சுற்றி வருகிறது என்று குறிப்பிட்டு இருக்கிறார்கள்.

ஒளி ஆண்டு என்பது விண்வெளித் தூரத்தைக் கணக்கிட உதவிடும் ஓர் அலகு. ஒளியின் வேகம் நொடிக்குச் சுமார் 3,00,000(மூன்று இலட்சம்) கி.மீ.ஆகும்   ஒரு வருடம் என்பது 365 நாட்கள். ஒரு நாளைக்கு 86,400 நொடிகள். எனவே 365*86400*3,00,000 தோராயமாக ஓர் ஒளி ஆண்டு என்பது 9.46 டிரில்லியன் கிலோமீட்டர்கள். அதாவது 9,46,97,30,47,258 (94697 கோடியே முப்பது இலட்சத்து  நாற்பத்து ஏழாயிரத்து இரு நூற்றி ஐம்பத்தெட்டு) கி.மீ. 48 ஒளி ஆண்டுகள் தூரம் என்றால் மேலே குறிப்பிட்டுள்ள தூரத்தை 48 எனும் எண்ணால் பெருக்கி வரும் விடையாகும்.

பூமியிலிருந்து இவ்வளவு தூரத்தில் இருக்கும் ஒரு கோளைக் கண்டுபிடித்து, அது இன்னொரு நட்சத்திரத்தில் இருக்கிறது என்பதையும் அதற்கும் சூரியனுக்கும் புதிய  நட்சத்திரத்திற்கும் என்ன வேறுபாடு என்பதையும் , நமது பூமியைப் போலவே அங்கும் வளிமண்டலம் இருக்கிறது என்பதையும் அறிவியல் அறிஞர்கள் கண்டு பிடித்திருக்கிறார்கள்.

 செவ்வாய் கிரகத்திற்கு, நிலாவிற்குச் சென்று மனிதர்கள் குடியேறும் நாள் நெருங்கி வருகிறது என்று அறிவியல் அறிஞர்கள் குறிப்பிடுகிறார்கள். நிலாவில் பிளாட் போட்டிருக்கிறோம். இன்ன விலை என்று இணையத்தில் செய்திகள் வெளியிடுகிறார்கள். ஆனால் வான்வெளியில் தனியார் எவரும் இடம் எல்லாம் வாங்கு முடியாது,அதனைச் சர்வதேச விண்வெளிச் சட்டம் அனுமதிக்காது என்றும் செய்திகள் வருகின்றன. ஆனால் அப்படி ஒரு குடியேற்றம் வரும் காலம் மிகவும் நெருங்கி வருகிறது என்பதைத்தான் அறிவியல் ஆய்வுகள் நிருபிக்கின்றன.

சூரியன் மிக வெப்பமாக இருக்கிறது.அதன் அருகில் செல்ல முடியாது என்பதுதான் இன்றைக்கு வரை இருக்கும் அறிவியல் உண்மை. நாளை அது மாறலாம்.நிலா,செவ்வாய் கிரகத்திற்குப் போவதுபோல ,சூரியனுக்கு அல்லது சூரியனைத் தாண்டி இருக்கும் மற்ற நட்சத்திரங்களுக்குச் செல்லும் காலம் இன்னும் சில நூற்றாண்டுகளில் நிகழலாம்.அப்போது நிலாவுக்குச் செல்வது, செவ்வாய் கிரகத்திற்குச் செல்வது எல்லாம் இன்றைக்கு அமெரிக்காவிற்குச் செல்வதுபோல கனடா நாட்டிற்குச் செல்வதுபோல இயல்பாக ஆகியிருக்கலாம்.

அறிவியல் ஆராய்ச்சி ஒரு பக்கம் விண்ணளவு நடந்து கொண்டிருந்தாலும்,சமூகத்தில் ஏற்றத்தாழ்வுகள் இன்னும் அதிகமாகிக் கொண்டே போகிறது.’எல்லோரும் சமம்.உலகத்தில் பிறந்த எல்லா மனிதர்களுக்கும் சம உரிமை, சம உடமை கிடைக்கும் காலம் வரவேண்டும்’ என்ற தந்தை பெரியாரின் கொள்கை நிறைவேறுகிறபோதுதான், இப்படிப்பட்ட விண்வெளி ஆராய்ச்சிகளின் பலன் உலகத்தில் இருக்கும் அனைத்து மனிதர்களுக்கும் கிடைக்கும்..